Ndị Mmadụ Chọrọ Ịma Onye Jizọs Bụ
Ndị Mmadụ Chọrọ Ịma Onye Jizọs Bụ
“Ọ fọrọ obere ka ọ bụrụ na onye ọ bụla nọ n’ụwa nwere ihe ọ ga-ekwu banyere [Jizọs]. Ma ànyị kweere na Jizọs ma ọ bụ na anyị ekweghị, mgbe ụfọdụ, anyị na-ajụ, sị, ‘Ònyedị ka Jizọs bụ?’”—STAN GUTHRIE, ONYE NA-EDE AKWỤKWỌ.
ỌTỤTỤ ndị chọrọ ịmata onye Jizọs bụ. Akwụkwọ ndị kọrọ akụkọ ya so n’akwụkwọ ndị kacha ewu ewu. Fim ndị kọrọ banyere ya na-ewukwa ewu. Ma, a ka nwere ọtụtụ ajụjụ ndị mmadụ na-ajụ banyere Jizọs. E nwere ihe dị iche iche ndị mmadụ chere banyere onye Jizọs bụ.
Afọ ole na ole gara aga, ndị nta akụkọ abụọ jụrụ ndị mmadụ n’Ịntanet, sị: “Ònye bụ Jizọs?” Lee ihe ụfọdụ ndị zara:
● “Ọ dị ka ọ̀ bụ onye nkụzi ndị Juu nke ji ndụ ya niile meere ndị mmadụ ihe ọma.”
● “Ọ bụ mmadụ nkịtị nke biri ndụ pụrụ iche.”
● “O nweghị ihe gosiri na Jizọs dịrị ndụ n’ụwa a.”
● “Jizọs bụ Ọkpara Chineke nke a mụrụ, ya anwụọ, ma si n’ọnwụ bilie ka o wee zọpụta anyị ná mmehie anyị. Ọ dị ndụ ugbu a, ọ ga-abịakwa ọzọ n’ụwa.”
● “Ekweere m na Jizọs Kraịst bụ ọkpara Chineke mụrụ naanị ya, ọ bụ mmadụ, bụrụkwa Chukwu.”
● ‘Akụkọ Jizọs bụ akụkọ ụmụaka.’
O doro anya na ihe a niile ndị mmadụ kwuru banyere Jizọs agaghị abụcha eziokwu. Ò nwere otu ebe anyị nwere ike isi nweta ezigbo azịza nke ajụjụ niile anyị na-ajụ banyere Jizọs? Ndị na-ebipụta magazin a kweere na Baịbụl bụ Okwu Chineke, kwerekwa na ọ bụ naanị ya nwere ike ịgwa anyị nke bụ́ eziokwu banyere Jizọs. *—2 Timoti 3:16.
N’isiokwu na-esonụ, anyị ga-eleba anya n’ụfọdụ ajụjụ ndị mmadụ na-ajụkarị banyere Jizọs na otú Baịbụl si zaa ha. Jizọs n’onwe ya kwuru na “onye ọ bụla nke nwere okwukwe na ya” ga-enweta nzọpụta. (Jọn 3:16) Biko leba anya n’ihe ndị a Baịbụl zara ma jiri aka gị kpebie ma ị̀ ga-achọ ịmatakwu banyere Jizọs, matakwa otú ị ga-esi enwe okwukwe na ya.
[Ihe e dere n’ala ala peeji]
^ par. 11 Ọ bụrụ na ị chọrọ ịmatakwu ihe mere anyị ji kwuo na Baịbụl bụ Okwu Chineke, gụọ isiokwu bụ́ “Bible—Akwụkwọ Sitere n’Aka Chineke” n’akwụkwọ bụ́ Gịnị n’Ezie Ka Bible Na-akụzi? Ọ bụ Ndịàmà Jehova bipụtara ya.
