Panagbirok iti Sungbat

“Gistay addaan ti tunggal maysa iti bukod a kapanunotan maipapan ken [Jesus]. Mamatitayo man kenkuana wenno saan, mabalin a maisaludsodtayo, ‘Asino daytoy a lalaki?’”​—STAN GUTHRIE, AUTOR.

PAGINTRESAN dagiti tattao ti maipapan ken Jesus. Paggugustoda dagiti libro ken pelikula maipapan kenkuana. Ngem adu latta ti saludsodda maipapan ken Jesus. Nagduduma ti opinion dagiti tattao no asino a talaga ni Jesus.

Sumagmamanon a tawen ti napalabas, dua a periodista ti nangawis kadagiti tattao a sungbatanda iti Internet ti saludsod nga “Asino ni Jesus?” Adtoy ti sumagmamano a sungbat:

● “Nalabit maysa a rabbi (mannursuro) a nagbalin nga ulidan iti kinamanangngaasi.”

● “Ordinario laeng a tao a nagbalin nga ekstraordinario ti biagna.”

● “Awan ti pammaneknek a nagbiag ni Jesus.”

● “Ni Jesus ti Anak ti Dios. Nayanak, natay, ken napagungar tapno isalakannatayo kadagiti basoltayo. Sibibiag itan, ken umayto manen ditoy daga.”

● “Mamatiak a ni Jesu-Kristo ti kakaisuna nga anak ti Dios. Agpadpada a naan-anay a tao ken naan-anay a dios.”

● “Ti biag ni Jesus ket estoria laeng a pang-ubbing a pinatpati dagiti nataengan.”

Nalawag a saan a pudno amin dagitoy a nagduduma nga opinion. Adda kadi mapagtalkan a pagtaudan ti sungbat kadagiti saludsodtayo maipapan ken Jesus? Mamati dagiti nangipablaak iti daytoy a magasin a ti Biblia ket Sao ti Dios ken dayta laeng ti makaibaga iti kinapudno maipapan ken Jesus. *​—2 Timoteo 3:16.

Iti sumaruno nga artikulo, usigentayo dagiti sungbat ti Biblia iti kadawyan a salsaludsod maipapan ken Jesus. Kinuna ni Jesus a mabalin a maisalakan ti ‘tunggal maysa a mamati kenkuana.’ (Juan 3:16) Awisendaka a mangusig kadagiti sungbat ket sika ti agdesision no itultuloymo nga adalen ti kabibiagna ken no kasano a maipakitam ti pammatim kenkuana.

[Footnote]