Epanọ Ma Sae rọ Riẹ Iyo Na

“Enwenọ ohwo kpobi o wo ọvuọ oghẹrẹ nọ o re dhesẹ [Jesu] fihọ. Oghẹrẹ kpobi nọ ẹrọwọ mai ọ rrọ kẹhẹ, ẹsejọ ma rẹ jọ iroro mai nọ inọ, ‘Ono họ ohwo nana?’”—OKERE-EBE NỌ A RE SE STAN GUTHRIE.

AHWO buobu a gwọlọ riẹ kpahe Jesu. Ahwo a bi kie lele ebe nọ e ta kpahe iẹe. Ahwo buobu a rẹ dẹ ifimu nọ a jọ dhesẹ Jesu. Ghele na, ahwo a wo enọ buobu kpahe Jesu. Ahwo a wo ọvuọ iroro riẹ kpahe oghẹrẹ ohwo nọ Jesu ọ ginẹ jọ.

Umutho ikpe jọ nọ e vrẹ, imava jọ nọ e rẹ n’iyẹrẹ a jọ Itanẹte zizie ohwo kpobi re a kẹ uyo onọ nana, “Oghẹrẹ ohwo vẹ Jesu ọ jọ?” Iyo nọ ahwo jọ a kẹ họ:

● “U mu omẹ ẹro nọ owuhrẹ ọ jọ, ọnọ o fi oriruo ohrọ-oriọ h’otọ.”

● “Ọ jọ ohwo-akpọ gheghe nọ o yeri oghẹrẹ uzuazọ ofa.”

● “Imuẹro evuevo e riẹ hẹ inọ Jesu ọ jọ uzuazọ.”

● “Jesu yọ Ọmọ Ọghẹnẹ nọ a yẹ, o whu, jẹ kparoma no uwhu ze re ọ sai siwi omai no izieraha mai. Ọ rrọ uzuazọ enẹna, yọ ọ te wariẹ zihe ziọ akpọ na.”

● “Me roro nọ Jesu Kristi ọvo họ ọmọ Ọghẹnẹ, yọ evaọ oke ovona, ọ rrọ ohwo-akpọ, ọ tẹ jẹ rrọ ọghẹnẹ.”

● “Iku kpahe Jesu yọ iku-esia, ohwo ogheghẹ o re fi eva họ iku itieye.”

Ma sae nwane ta nọ eriwo yena kpobi e gba ha. Kọ oria jọ o riẹ nọ ma rẹ sai fi eva họ nọ ma sae jọ ruẹ iyo enọ nọ ma wo kpahe Jesu? Ahwo nọ a kere obe nana a rọwo inọ Ebaibol na yọ Ẹme Ọghẹnẹ gbe inọ eva riẹ ọvo ma sae jọ ruẹ uzẹme na kpahe Jesu. *—2 Timoti 3:16.

Ma te jọ uzoẹme nọ o rrọ aro na ta kpahe oware nọ Ebaibol ta, nọ o kẹ iyo enọ nọ ahwo buobu a nọ kpahe Jesu no. Jesu omariẹ ọ ta nọ edhere esiwo o rovie họ kẹ “kohwo kohwo nọ ọ rọwo riẹ.” (Jọn 3:16) Ma tuduhọ owhẹ awọ nọ, romatotọ roro kpahe iyo na, re whọ jiroro na kẹ omara sọ who re gbe wuhrẹ kpahe Jesu gbe epanọ whọ sai ro fi ẹrọwọ họ iẹe.

[Oruvẹ-obotọ]