“Ntembe kele ve nde konso muntu kevandaka ti mabanza na yandi na yina metala [Yezu]. Yo vanda beto kele ti lukwikilu to ve, beto yonso kekudiyulaka nde: ‘Yezu kele nani?’”​—AUTHOR STAN GUTHRIE.

BANTU kele ti mpusa ya kuzaba mambu ya metala Yezu. Mikanda mpi bafilme yina ketubilaka mambu na yandi ketekamaka mingi. Kansi, bantu mingi kelandaka na kuyula bangyufula na yina metala yandi. Bantu kele ti mabanza ya kuswaswana na kuzaba kyeleka ya metala Yezu.

Mwa bamvula meluta, bimwangi-nsangu zole yulaka bantu ngyufula yai: “Yezu vandaka nani?” Tala mwa bamvutu ya bo pesaka:

● “Yo kemonana nde yandi vandaka longi yina kumisaka luzingu na yandi mbandu na yina metala kuwila bantu mawa.”

● “Yandi vandaka muntu bonso bantu yonso yina vandaka ti luzingu ya mbote.”

● “Ata nzikisa mosi ve kemonisa nde Yezu zingaka.”

● “Yezu vandaka Mwana ya Nzambi yina butukaka, fwaka mpi futumukaka sambu na kugulusa beto na masumu. Yandi kezinga bubu yai mpi tavutuka dyaka na ntoto.”

● “Mono kekwikila nde Yezu Kristu kele mwana mosi kaka ya Nzambi, yandi vandaka muntu mpi Nzambi.”

● “Disolo ya Yezu kele disolo ya luvunu yina bantu ketelaka bana.”

Ya kyeleka, mabanza yai yonso ya kuswaswana ya memwanganaka lenda vanda ve ya kyeleka. Keti kele ti nto mosi ya sikisiki yina lenda pesa bamvutu ya mbote na bangyufula na beto na yina metala Yezu? Bambasisi ya zulunalu yai kendimaka nde Biblia kele Ndinga ya Nzambi mpi yo mpamba ketelaka beto kyeleka yonso na yina metala Yezu. a​—2 Timoteo 3:16.

Na disolo yina kelanda, beto tatadila bamvutu ya Biblia na mwa bangyufula yina bantu mingi keyulaka na yina metala Yezu. Yandi mosi tubaka nde “konso muntu yina me ndima yandi na ntima na yandi” taguluka. (Yoane 3:16) Beto kelomba nge na kutadila bamvutu mpi kubaka lukanu kana nge fwete longuka mambu mingi na yina metala Yezu mpi mutindu ya kukwikila na yandi.

[Noti na nsi ya lutiti]