¿Pën Jesusˈäjt?

“Wiˈixëmë jäˈäy wyinmaytyë mä pënën [Jesus]. Niˈamukë, oy nmëbëjkëm o kyaj, të nnayajtëˈëwëm pënën [yëˈë].” (STAN GUTHRIE, ESCRITOR)

MAYË jäˈäy nyijawëyandëp pënën Jesus. Pääty mayˈamë liibrë yajtooky diˈib nyimaytyakypyë Jesus, ets jyaˈˈatyë pelikula diˈib mayë jäˈäy yˈijxtëp. Per duˈunyëmë jäˈäy nyayajtëwëdë pën Jesusˈäjtp, ets wiˈixëm wyinmaytyë mä yëˈë.

Tam nyëjkxnë kanäk jëmëjt, ko majtskë periodistë dyajtëëwdë jäˈäy mä Internet: “¿Pën Jesusˈäjt?”. Näägë jäˈäy duˈun tˈatsoojëmbijttë:

● “Waˈan yëˈëjëty tuˈugë rabino (yaˈëxpëjkpë) diˈib yaˈijxë paˈˈayoˈon.”

● “Tuˈugë yetyëjk extëm oytyim pënëty ets jantsy oy jyukyˈajty.”

● “Nimää kyayajnigajpxy pën ojtsën jyantsy jyukyˈaty.”

● “Yëˈë Diosë yˈUˈunk diˈib maxuˈunkˈäjt, oˈk ets jyukypyejky parë ojts xyaˈˈawäˈätspëtsëˈëmëm mä poky kaytyey. Jesus tam tyam jyukyˈaty ets jëmbitäämp jatëgok yä Naxwiiny.”

● “Nwinmayëts ko yëˈë Diosë tyuˈukˈuˈunk, ets duˈun nyaxwinyëdë jäˈäyëty ets duˈun diosëty.”

● “Yëˈë tuˈugë jekymyaytyaˈaky parë ënäˈkuˈungë mëjatypyë.”

Extëmë tyäˈädë jäˈäy tˈatsoojëmbijttë, ¿diˈibë tëyˈäjtën? Kyaj mbäät njënäˈänëm ko ak tëyˈäjtën. ¿Mä mbäät nnijäˈäjëm ja tëyˈäjtën mä pënën Jesus? Diˈib yajpëtsëëmdëbë tyäˈädë rebistë myëbëjktëp ko Biiblyë yëˈë Diosë yˈAyuk, ets ko yëˈëyë mbäät xytyuknijäˈäjëm ja tëyˈäjtën mä pënën Jesus (2 Timotee 3:16). *

Mä ja tuˈukpë artikulo nnijawëyäˈänëm tijatyë jäˈäy nayajtëëwëdëp mä Jesus ets wiˈixë Biiblyë tnimaytyaˈaky. Jesus ojts tyukniˈˈixë ko yëˈë pyäädandëbë nitsokën pënaty mëbëjkëp (Fwank 3:16). Pääty, oy ko xynyijawët wiˈixë Biiblyë jyënaˈany. Ta net këˈëm xywyinmayët pën mˈaknijawëyaampy pënën Jesus parë xypyëjtäˈägëdë mëbëjkën.

[Notë diˈib noky ëxˈääy]