Nebã sẽn yete

Seb-gʋlsd a ye yeela woto: “Nebã fãa la bal tara b tagsg [a Zezi] sẽn yaa ned ningã zugu. D tẽed-a lame tɩ d pa tẽed-a me, d fãa mi n sokda d meng woto: ‘Nin-kãngã yaa ãnda?’”—A STAN GUTHRIE.

NEBÃ tʋll n bãnga a Zezi sẽn sɩd yaa ned ninga. Sɛb sẽn gomd a yell naaga sɛb nins nebã sẽn daad n yɩɩdã sʋka. Filim-dãmb sẽn gomd a yell naaga filim nins nebã sẽn nong n yɩɩdã sʋka. La baasgo, nebã ket n pa mi a Zezi sõma ye. B tara tagsg toor-toor a zugu.

Yʋʋm a wãn sẽn looge, kiba-kɩtb a yi n gʋls ẽntɛrnetã pʋgẽ n sok nebã woto: “A Zezi yɩɩ ãnda?” Ad kẽer sẽn leoke:

● “Wõnda a yɩɩ rabẽ (rat n yeel tɩ karen-saamba) sẽn yɩ nimbãan-zoɛta.”

● “A yɩɩ ned wa tõndo, la a maana bõn-kãsemse.”

● “Bũmb kae n wilgdẽ t’a Zezi zĩndame ye.”

● “A Zezi yaa Wẽnnaam Bi-ribl sẽn doge, sẽn ki, la sẽn vʋʋg n na n fãag tõnd ne d yel-wẽnã. Rũndã-rũndã, a vɩɩme la a na n le waa tẽngã zugu.”

● “Mam tẽedame tɩ yaa a Zezi Kirist a ye bal la Wẽnnaam Biiga, n yaa ninsaala, n leb n yaa Wẽnnaam.”

● “A Zezi kibarã yaa solemde. Yaa sẽn ya-b wa kambã bal n tẽed rẽnda.”

Yaa vẽeneg tɩ tags-kãensã sẽn kɩɩsd taab woto wã, b fãa pa tõe n yɩ sɩd ye. La yɛ la d tõe n paam kibay sẽn yaa sɩd a Zezi zugu? Sẽn yiisd-b seb-kãngã wã tẽedame tɩ Biiblã yaa Wẽnnaam gomde, la tɩ yaa a pʋgẽ bal la d tõe n bãng sɩdã a Zezi zugu. *—2 Tɩmote 3:16.

Sõsg ning sẽn pʋgdã pʋgẽ, d na n yãa sogsg kẽer nebã sẽn wae n sokd b mens a Zezi zugu, la Biiblã sẽn leokd-b to-to. A Zezi meng yeelame tɩ yaa “ned ning fãa sẽn tẽed” yẽ n tõe n paam fãagre. (Zã 3:16) Y sã n ges sogs-kãens leoorã, tõe tɩ y na n mikame tɩ y tog n maneg n bao n bãnga a Zezi, la y bãng y sẽn segd n wilg to-to tɩ y tẽed-a lame.

[Tẽngr note]