Pananap ed Saray Ebat
Pananap ed Saray Ebat
“Amin lawarin totoo et walaan na teorya no siopa si [Jesus]. Manisia itayo man odino andi ed sikato, siansia nin itetepet tayo, ‘Siopa iyan too?’”—AUTHOR STAN GUTHRIE.
INTERESADO iray totoo ed si Jesus. Masalisaliw tan labalabay na totoo iray libro tan pelikula nipaakar ed sikato. Balet, dakel nin siansiay agmikabat ed sikato. Nandurumay opinyon da no siopan talaga si Jesus.
Diad agano ni labat, im-post na duaran journalist ed Internet so tepet ya “Siopa si Jesus?” Nia so pigarad saray ebat a naawat da:
● “Nayarin sikatoy sakey a rabbi (managbangat) ya angipatnag na panangiyansakit legay bilay to.”
● “Sikatoy ordinaryon too ya makapadinayew so impanbilay to.”
● “Anggapoy prueban nambilay si Jesus.”
● “Si Jesus et Anak na Dios ya inyanak, inatey, tan inmoli ed bilay pian dondonen so kasalanan tayo. Sikatoy mabilay, tan Sikatoy ompawil lamet diad dalin.”
● “Manisia ak ya si Jesu-Kristo so bogbogtong ya anak na Dios, namparan sigpot a too tan sigpot a masanto.”
● “Si Jesus et istorya labat a parad ugugaw.”
Siempre, agtayo nibagan dugan amin irayan ebat. Wala kasi napangalaan tayoy napanmatalkan iran ebat ed saray tepet tayo nipaakar ed si Jesus? Manisia iray nan-publish ed sayan magasin a say Biblia et Salita na Dios tan satan labat so makapangipaamta na katuaan nipaakar ed si Jesus. *—2 Timoteo 3:16.
Diad onsublay ya artikulo, nengnengen tayoy ebat na Biblia ed saray maslak ya itetepet nipaakar ed si Jesus. Imbagan mismo nen Jesus ya niliktar so “balang sakey a mangipapanengneng na pananisia ed sikato.” (Juan 3:16) Imbitaan mi kan usisaen iray ebat insan ka mandesisyon no kasin kaukolan mo ni kaaruman ya impormasyon nipaakar ed si Jesus, tan no panon kan nawalaay pananisiad sikato.
[Paimano ed leksab]
^ par. 11 Parad kaaruman nin impormasyon, nengnengen so teman “Say Biblia—Libro a Nanlapud Dios,” diad kapitulo 2 na libron Anto so Peteg ya Ibabangat na Biblia? ya im-publish na Saray Tasi nen Jehova.
