A Skel a Nger

“Oumesingd er a rechad a kakerous a uldesuir el kirel a [Jesus]. Me a doumerang er ngii me a lak, me kid a dirk melatk er a ker el kmo, ‘Ngikang techa el chad?’ ”​—AUTHOR STAN GUTHRIE.

A REBETOK el chad a melatk er a Jesus. Me a betok el babier el mesaod er ngii me a mubi a mla meketmokl el kmal merael a chisel. Engdi ngdirk betok a ker el kirel a Jesus. Me a rechad a kakerous a uldesuir el kirel a kmo, a Jesus ngua techa el chad.

Sesei el rak er a uchei e a reteru el meluches a simbung a mlo er a Internet e meluches er a ker el kmo “Ngtechang a Jesus?” Me aikakid a nger er a rechad:

● “Ngmle sensei el ungil kerebai el kirel a klechubechub.”

● “Ngdi chad el kilie el mle ileakl a rolel a klengar er ngii.”

● “Ngdiak a olechotel a kmo a Jesus a mera el mle chad er a irechar.”

● “A Jesus a Ngelekel a Dios el milechell e mlad e milekiis er a kodall el melubet a kngtid. Ngdirk chad, e dirrek el lmuut el mei er a chutem.”

● “Ak uumerang el kmo a Jesus Kristus a di ta el ngelekel a Dios el mle chelid e chad er a osisiu el taem.”

● “A Jesus a di ua cheldecheduch el chelid.”

Ngbleketakl el kmo aika el kakerous el uldasu a diak el sebechel el mo klemerang el rokui. Me a leuaisei e ngngar er ngii a tekoi el sebechel el ochotii a mera el nger er a kerid el kirel a Jesus? A remeluches er tia el Babier a oumerang el kmo a Biblia a Tekingel a Dios e di ta el babier el sebechel el ocholt a klemerang el kirel a Jesus. *​—2 Timoteus 3:16.

Sel ongingil suobel e kede mo mesaod a nger er a Biblia el kirel a bebil el ker el kirel a Jesus. Me ngii el Jesus a dilu el kmo, “tirikel rokui loumera er ngii” a sebechir el mo suobel. (Johanes 3:16) Aki olengit er kau me bo morriter aika el nger e di le kau el melilt el kmo ngsoam el mo mesuub a lmuut el betok el kirel a Jesus me sel rolel e ke mo oumerang er ngii.

[Footnote]