Pipol Lukaotem Olketa Ansa

“Klosap evriwan garem own tingting bilong olketa abaotem hu nao [Jesus]. Nomata iumi garem faith long Jesus or nomoa, iumi evriwan laek for savve, ‘Hu nao datfala man?’” —STAN GUTHRIE, AUTHOR.

PIPOL interest tumas for savve hu nao Jesus. Olketa salem staka buk abaotem Jesus. Staka pipol laek for lukim olketa movie abaotem Jesus. Nomata olsem, pipol garem staka kwestin abaotem Jesus, and pipol garem staka difren tingting tu abaotem hu nao hem.

Tu-thri year go finis, tufala reporter askem pipol for ansarem long internet disfala kwestin, “Hu nao Jesus?” Samfala ansa long kwestin hia hem olsem:

● “Luk olsem hem wanfala rabbi (teacher) wea sorre long pipol and trae for helpem olketa.”

● “Hem wanfala man olsem iumi nomoa, bat taem hem laef hem duim staka spesol samting.”

● “No eni samting pruvim Jesus stap bifor.”

● “Jesus hem Son bilong God wea born long earth, hem dae and laef bak for sevem iumi from olketa sin bilong iumi. Hem laef distaem and bae Hem kam bak moa long earth.”

● “Mi biliv Jesus Christ hem son bilong God wea hem wanfala man and long semtaem hem wanfala god tu.”

● “Story abaotem Jesus hem bilong olketa pikinini nomoa.”

Hard for olketa difren kaen idea olsem hem stret. Wea nao iumi savve kasem olketa stretfala ansa abaotem Jesus wea iumi savve trustim? Olketa wea pablisim disfala magasin bilivim Bible hem toktok bilong God, and long Bible nomoa iumi savve faendem evri tru samting abaotem Jesus. *—2 Timothy 3:16.

Long next article, bae iumi storyim olketa ansa from Bible for olketa kwestin wea staka pipol garem abaotem Jesus. Jesus seleva nao sei, man bae kasem laef olowe sapos hem “showimaot faith long hem.” (John 3:16) Mifala laekem iu for ting raonem olketa ansa and for iuseleva disaed sapos iu laek for lane moa abaotem Jesus and wanem iu savve duim for showimaot faith long hem.

[Footnote]