Jesús, ¿pitaj karqarí?
Jesús, ¿pitaj karqarí?
“Tukuy runas [Jesusmanta] tukuy imata ninku. Chaywanpis tukuy, paypi creejkuna, mana creejkuna ima, maykʼajllapis pipunichus kasqanta tapukorqanchej.” (STAN GUTHRIE, QHELQAJ)
TUKUY Jesusmanta yachayta munanku. Chayraykutaj ashkha runas paymanta qhelqasqa librosta rantinku, paymanta parlaj peliculasta cineman qhawaj rinku. Chaywanpis runasqa, paymanta tapukullankupuni, tukuy imatataj ninku.
Pasaj wataspi, iskay periodistas Internetnejta, “¿Pitaj Jesús karqarí?”, nisqa taporqanku. Runastaj jinata kuticherqanku:
● “Payqa, yachachejsina karqa, pichus khuyakuyniyoj runa karqa.”
● “Noqanchej jina runalla karqa, allintataj kausakorqa chaylla.”
● “Mana ni ima rikuchinchu kausasqantapuni.”
● “Jesusqa, Diospa Churin, nacerkorqa, wañorqa, juchasninchejmanta kacharichinawanchejpajtaj kausarimorqa. Payqa kausashan, watejmantataj Jallpʼaman jamonqa.”
● “Jesusqa, Diospa kʼata churinsina, runa jina, dios jinataj.”
● “Payqa, machu runaspaj cuento de hadas nisqapi rikhurej runalla.”
Runa kutichisqanqa, mana tukuynin cheqa kayta atinmanchu. Jesusmanta, ¿maypitaj cheqa kutichiykunata tarisunman? Kay revistata qhelqajkunaqa, Biblia Diospa Palabran kasqanta, Biblialla Jesusmanta cheqata yachachisqankuta ima creenku (2 Timoteo 3:16). *
Qhepan yachaqanapi, Jesusmanta runas imatachus tapukusqankuta, Biblia imatachus kutichisqanta ima yachakusun. Jesusllataj yachacherqa “pillapis paypi creejqa mana chinkayman” rinanta (Juan 3:16). Chayrayku Biblia imatachus kutichisqanta, yachakunaykita munayku. Qan kikiykimantataj Jesusmanta astawan yachakuytachus manachus ajllayta atinki, paypi creenaykipaj.
[Sutʼinchaynin]
^ párr. 11 Astawan yachakuyta munaspaqa, ¿Imatapunitaq Biblia yachachin? libroj 2 yachaqananta “Bibliaqa Diosninchikmanta jamun”, nisqata leey. Kaytaqa Jehovamanta sutʼinchajkuna orqhonku.
