Kimi Anga i te au Pauanga
Kimi Anga i te au Pauanga
“Tukeke te au tamanakoanga a te au tangata e koai tikai a [Iesu]. Noatu eaa te tu o to tatou akarongo me kore te manako ekoko, e manako ana tatou katoatoa e, ‘Koai ra teia tangata?’”—TANGATA TATA KO STAN GUTHRIE.
KUA inangaro ana te au tangata i te kite e koai a Iesu. Maata te au puka no runga iaia tei riro mai ei au puka oko maataia. Maata rai te au teata no runga iaia tei riro mai ei au teata reka tikai. Inara, e au uianga ta te au tangata e manganui no runga ia Iesu, e tukeke to ratou au manako e koai tikai aia.
Ei akatauanga, i tetai au mataiti i topa akenei kua pati tetai nga tangata tata puka i te au tangata kia pau mai i te uianga i runga i te initaneti e “Koai a Iesu?” Teia ta ratou pauanga:
● “Manakoia ana aia e e rabi (puapii) tei akariro i tona oraanga ei akaraanga no te tu tangi aroa.”
● “E tangata noa ua aia tei noo ana i tetai oraanga umere tikai.”
● “Kare e akapapuanga e i ora ana a Iesu.”
● “E Tamaiti a Iesu na te Atua tei anauia mai, tei mate, e tei akatuia mai mei te mate ei akaora ia tatou mei ta tatou ara. Te ora nei Aia i teia ra, e ka oki akaou mai aia ki te enua nei.”
● “Kua irinaki au e ko Iesu Karaiti te tamaiti okotai a te Atua, tei riro mai ei tangata e ei atua, i taua taime rai.”
● “E tua maani ua a Iesu na te au tamariki mamaata.”
Taka ua ra e, kare te au manako tukeke e tano ana. E ngai ainei tetai ka rauka mai te au pauanga tau tikai ki ta tatou au uianga no runga ia Iesu? Te irinaki nei te aronga nenei o teia tianara e e Tuatua na te Atua te Pipiria e na te reira anake ua e akakite mai kia tatou i te tikaanga tikai no runga ia Iesu. *—2 Timoteo 3:16.
I roto i te atikara ka aru mai, ka akamanako ana tatou i te au pauanga Pipiria no tetai au uianga matauia no runga ia Iesu. Nana uaorai i akakite mai e ka orongaia te ora ki te katoatoa tei “akarongo iaia.” (Ioane 3:16) Te pati atu nei matou ia koe kia akara i te au pauanga, e oti e iki me ka inangaro koe kia apii maata atu no runga ia Iesu e akapeea me tuku i toou akarongo ki roto iaia.
[Tataanga Rikiriki i Raro]
^ para. 11 No tetai au akakiteanga, akara i te pene 2, “Te Pipiria—E Puka mei te Atua Mai,” i roto i te puka Eaa Tikai ta te Pipiria e Apii Maira? neneiia e te Au Kite o Iehova.
