Sma wani kon sabi den piki

„Pikinmoro ala sma abi den eigi denki fu [Yesus]. Awansi fa a bribi fu wi tranga, noso awansi fa wi e tweifri, toku wi alamala e aksi wisrefi: ’Suma na a man disi?’”​—SKRIFIMAN STAN GUTHRIE.

SMA wani kon sabi moro fu Yesus. Bun furu buku seri di abi fu du nanga en. Felem di abi fu du nanga Yesus e hari furu sma. Toku furu sani de ete di sma wani kon sabi fu Yesus. Sma abi difrenti denki fu en.

Wan tu yari pasa, tu nyunsuman gi sma wan kari fu piki wan aksi tapu Internet. Na aksi ben de: „Suma ben de Yesus?” Luku wan tu fu den piki:

● „Mi denki taki a ben de wan rabi (leriman) di libi na wan fasi di e leri wi fa fu sori sari-ati gi trawan.”

● „A ben de neleki ala tra man èn a libi fu en ben abi furu krakti tapu sma.”

● „Buweisi no de taki Yesus ben libi trutru.”

● „Yesus na a Manpikin fu Gado di gebore, di dede, èn di wiki baka fu frulusu wi fu den sondu fu wi. A e libi now èn A o kon na grontapu baka.”

● „Mi e bribi taki Yesus Krestes na a wan-enkri manpikin fu Gado èn taki a ben de wan trutru libisma èn sosrefi wan trutru Gado.”

● „Na pikin-nengre wawan e bribi den tori fu Yesus.”

A de krin taki ala den denki disi no kan de tru. Pe wi kan feni krin piki tapu den aksi di sma abi fu Yesus? Den sma di tyari a tijdschrift disi kon na doro e bribi taki Bijbel na a Wortu fu Gado èn taki a buku disi wawan kan fruteri wi tru tori fu Yesus. *​—2 Timoteyus 3:16.

Na ini a tra artikel wi o luku san Bijbel e taki fu sonwan fu den sani di sma gwenti aksi fu Yesus. Ensrefi ben taki dati „ala sma di e bribi na ini en” kan kisi frulusu (Yohanes 3:16). Wi e gi yu wan kari fu luku san na den piki. Baka dati, yu kan luku efu yu musu kon sabi moro fu Yesus èn fa yu kan sori taki yu e bribi na ini en.

[Futuwortu]