Ior Ker Mbamlumun sha Mbampin Mba sha Kwagh u Yesu
Ior Ker Mbamlumun sha Mbampin Mba sha Kwagh u Yesu
Orgen u ngeren ityakerada, u i yer un ér Stan Guthrie yô, kaa ér: “Hanmaor nôngo u lun a mhen u nan sha kwagh u or u [Yesu] a lu yô. Sea na Yesu jighjigh shin sea na un jighjigh ga kpa, se cii se mba pin ser ‘Yesu ne yô, ka nyi oro?’”
SAR ior tsung u fan kwagh u Yesu. Ior kpishi soo ityakerada i i er kwagh na yô. Shi ior kpishi soo icer i vidio i er kwagh na yô. Nahan cii kpa, ior kpishi mba pinen mbampin sha kwagh u Yesu her. Ior mba a mbamnenge vev kposo kposo sha kwagh u or u Yesu a lu jim jim la.
Ken anyom a karen kpuaa ken ijime la, mbatôônabaver mbagenev uhar lôhô ior ér ve na mlumun sha mpin ugen sha Intanet, mpin shon yô ér: “Yesu lu nyi oro?” Ka mbamlumun mba yange ior na je ne:
● “Ikyav tese wang ér Yesu lu rabi (ortesen) u yange ver ior ikyav sha kwagh u zungwen ior mhôônom yô.”
● “Yesu lu orumace er se nahan, u er akaa a kpilighyol ken uma na yô.”
● “Ikyav ngi i tesen ér Yesu yange lu ga.”
● “Yesu ka Wan u Aôndo u yange i mar un, va kpe shi nder shin ku sha u paan se sha ikyev i asorabo a ase yô. Ngu uma nyian, shi ngu hiden una va shin tar.”
● “M na jighjigh mer ka Yesu tseegh a lu wan u Aôndo ye, ngu orumace kpôô kpôô shi ngu Aôndo kpaa.”
● “Yesu ka or kpôô kpôô ga, kpa or u ken kwaghhir u i te sha u mbayev ve ungwa di tsô.”
Ikyav tese wang ér mbamhen mba ior ve lu a mi sha kwagh u Yesu kposo kposo, er mba i ter sha heen nahan cii, vea fatyô u lun mba shami ga. Ma takerada ngu u se ne jighjigh ser ua fatyô u nan mbamlumun mba vough sha mbampin mba se pinen sha kwagh u Yesu la yôô? Mbagberen takerada ne na jighjigh ér Bibilo ka Mkaanem ma Aôndo, shi ka i tseegh ia fatyô u ôron se mimi sha kwagh u Yesu vindi vindi ye. *—2 Timoteu 3:16.
Ken ngeren ua dondo ne, se time sha mbamlumun mba Bibilo i ne sha mbampin mbagenev mba ior kpishi ve pinen sha kwagh u Yesu yô. Yesu iyolna yange kaa ér myom ngu sha ci u “hanma or u nan ne un jighjigh” la cii. (Yohane 3:16) Se mba lôhôn we ser gbidye kwar sha mbamlumun mban, nahan nenge aluer gba u u seer fan kwagh u Yesu man er u na un jighjigh la kpaa yô.
[Ngeren u shin kpe]
^ Wea soo u seer kaven kwagh ne yô, ôr ngeren u a lu a itinekwagh ér: “Bibilo—Ka Takerada U Aôndo A Ne Yô” la, ken ityough 2 ki takerada u Bibilo Tese Ér Nyi Jimi? la. Ka Mbashiada mba Yehova ve gber u ye.
