‘I he Fekumi ki he Ngaahi Talí

“‘Oku meimei ko e tokotaha kotoa ‘oku ‘i ai ‘ene fakakaukau fekau‘aki mo [Sīsū]. Tatau ai pē pe ko e hā ‘a e tu‘unga ‘oku ‘i ai ‘etau tuí pe ko ‘etau veiveiuá, ko kitautolu kotoa ‘oku tau fifili, ‘Ko hai ‘a e tangata ko ení?’”—FA‘UTOHI KO STAN GUTHRIE.

‘OKU fie‘ilo ‘a e kakaí ‘o fekau‘aki mo Sīsū. Ko e ngaahi tohi fekau‘aki mo iá kuo hoko ia ‘o fakataua lahi. Kuo hoko ‘a e ngaahi faiva fekau‘aki mo iá ‘o manakoa ‘aupito. Neongo ia, ‘oku kei tu‘u pē ‘a e ngaahi fehu‘i fekau‘aki mo Sīsuú. ‘Oku ma‘u ‘e he kakaí ‘a e ngaahi fakakaukau kehekehe fekau‘aki mo Sīsū pe ko hai mo‘oni ia.

‘I he ngaahi ta‘u si‘i kuo maliu atú, na‘e fai ai ‘e ha ongo faiongoongo ha fakaafe ki he kakaí ke nau tali mai ‘i he ‘initanetí ‘a e fo‘i fehu‘i, “Ko hai ‘a Sīsū?” Ko e ngaahi talí na‘e kau ai ‘a e ngaahi me‘a ko ení:

● “Ko ha lāpai (faiako) nai ia ‘a ia na‘á ne ‘ai ‘ene mo‘uí ko ha fa‘ifa‘itaki‘anga ia ‘o e manava‘ofá.”

● “Ko ha tangata anga-maheni pē ia na‘á ne mo‘ui ‘i ha mo‘ui na‘e makehe atu.”

● “‘Oku ‘ikai ke ‘i ai ha fakamo‘oni ia na‘e ‘i ai ha tokotaha ko Sīsū.”

● “Ko Sīsū ko e ‘Alo ia ‘o e ‘Otuá ‘a ia na‘e ‘alo‘i mai, pekia, pea fokotu‘u hake mei he maté ke fakahaofi kitautolu mei he‘etau ngaahi angahalá. ‘Okú ne lolotonga mo‘ui he ‘ahó ni, pea Te Ne toe ha‘u ki he māmaní.”

● “‘Oku ou tui ko Sīsū Kalaisí ko e ‘alo pē ia ‘e taha ‘o e ‘Otuá, ko ha tangata kakato pea ko ha ‘otua kakato, fakatou‘osi ‘i he taimi tatau pē.”

● “Ko Sīsuú ko ha fo‘i talanoa fananga pē ia ki he fānau lalahí.”

‘Oku hā mahino, ko e ngaahi fakakaukau kehekehe lahi ko ení ‘e ‘ikai lava ke tonu kotoa pē ia. ‘Oku ‘i ai ha ma‘u‘anga fakamatala falala‘anga ‘e taha ‘a ia ‘e lava ke ne ‘omai ha tali ‘oku ‘i ai hano mafai ki he‘etau ngaahi fehu‘i fekau‘aki mo Sīsuú? Ko e kau faipulusi ‘o e makasini ko ení ‘oku nau tui ko e Tohi Tapú ko e Folofola ia ‘a e ‘Otuá pea ko ia pē taha ‘okú ne tala mai kia kitautolu ‘a e mo‘oni kakato ‘o fekau‘aki mo Sīsuú. *—2 Tīmote 3:16.

‘I he kupu hokó, te tau vakai ai ki he tali ‘a e Tohi Tapú ki he ngaahi fehu‘i anga-maheni ‘e ni‘ihi fekau‘aki mo Sīsū. Ko ia tonu na‘á ne pehē ko e hala ki he fakamo‘uí ‘oku ‘atā ia ki he “tokotaha kotoa pē ‘okú ne ngāue‘i ‘a e tui kiate iá.” (Sione 3:16) ‘Oku mau fakaafe‘i atu koe ke ke sivisivi‘i ‘a e ngaahi talí peá ke fai ha‘o fili pe ‘oku fiema‘u kiate koe ke ke ako lahi ange fekau‘aki mo Sīsū pea mo e founga ke ngāue‘i ai ‘a e tui kiate iá.

[Fakamatala ‘i lalo]