Kuyandaula Bwiinguzi

“Bunji bwabantu kuli ncobazyi kujatikizya [Jesu]. Taakwe makani akudooneka naa lusyomo ndotujisi, toonse tulalibuzya kuti, ‘Ino muntu ooyu nguni?’”—MULEMBI STAN GUTHRIE.

BANTU bayanda kuzyiba zinji kujatikizya Jesu. Mabbuku aamba zya Jesu balaakkomanina bantu banji. Aalo mafilimu aamba zyanguwe avwula kapati. Nokuba boobo, bantu banji bacijisi mibuzyo kujatikizya Jesu. Bantu bajisi mizeezo iindene-indene kujatikizya Jesu kuti naa wakali ni.

Myaka misyoonto yainda, basimubweza twaambo bobilo bakalomba bantu kwiinda mukubelesya Intaneti kuti baingule mubuzyo wakuti “Ino Jesu wakali ni?” Bwiinguzi bumwi bwakapegwa mboobu ansi aawa:

● “Ambweni wakali Labbi (mwiiyi) wakali cikozyanyo calubomba mubuumi bwakwe.”

● “Wakali muntu buyo wakapona buumi bulibedelede.”

● “Kunyina bumboni bwakuti Jesu wakaliponede.”

● “Jesu Mwana aa Leza wakazyalwa, wakafwa, alimwi wakabuka kuzwa kubafwu kutegwa atufwutule kuzibi zyesu. Ulapona mazuba aano, alimwi Uyooboola anyika alimwi.”

● “Ndisyoma kuti Jesu Kristo ngomwana aa Leza alikke, muntu wini-wini alimwi aciindi comwe uli mbuli Leza.”

● “Kusyoma makani aajatikizya Jesu kutondezya kuba amaano aabwana.”

Cilisalede kuti mizeezo iili boobu iindene-indene taikonzyi kuba yamasimpe yoonse. Sena kuli nkotukonzya kujana makani aaluzi aakonzya kutupa bwiinguzi kumibuzyo iijatikizya Jesu? Basikulemba magazini eeyi basyoma kuti Bbaibbele ndi Jwi lya Leza alimwi akuti lilikke ndelitwaambila makani aamasimpe kujatikizya Jesu. *—2 Timoteyo 3:16.

Mucibalo citobela, tulalanga-langa bwiinguzi bwamu Bbaibbele kumibuzyo iibuzyigwa-buzyigwa kujatikizya Jesu. Jesu lwakwe mwini wakaamba kuti nzila yalufwutuko nkoili “[ku]muntu uuli woonse uumusyoma.” (Johane 3:16) Twamutamba kuti mulange-lange bwiinguzi mpoonya mulisalile nobeni naa muyanda kwiiya zinji kujatikizya Jesu ambomukonzya kuba alusyomo mulinguwe.

[Bupanduluzi buyungizidwe]