Painim Ol Bekim

“Klostu olgeta man i gat tingting bilong ol yet long [Jisas] em i husat. Maski yumi gat strongpela bilip o nogat, yumi olgeta i save askim olsem, ‘Dispela man em i husat tru?’”—TOK BILONG STAN GUTHRIE.

OL MAN i laik save long Jisas. Planti man tru i save baim ol buk na ol muvi i stori long em. Tasol planti man i gat yet ol askim long Jisas. Ol man i gat narapela narapela tingting long Jisas em i husat tru.

Sampela yia i go pinis, tupela nius ripota i invaitim ol man long bekim dispela askim long Intenet, olsem “Jisas em i husat?” Sampela bekim i olsem:

● “Em wanpela rabai (tisa) na em i stap gutpela piksa long pasin bilong sori long ol narapela.”

● “Em i wanpela man nating, tasol laip bilong em i narapela kain tru.”

● “I no gat wanpela samting i soim olsem Jisas i bin stap tru.”

● “Jisas em i Pikinini Bilong God. Em i bin bon, dai, na kirap bek bilong baim bek yumi long sin. Em i stap laip long nau, na em bai kam bek gen long graun.”

● “Mi bilip olsem Jisas Krais wanpela tasol em i pikinini bilong God, em olsem man na god wantaim.”

● “Stori bilong Jisas em wanpela stori nating bilong ol pikinini.”

Em i klia tru, taim ol man i gat narapela narapela tingting, i no olsem olgeta dispela tingting i stret. Yu ting i gat wanpela gutpela rot bilong yumi ken kisim ol stretpela bekim long ol askim bilong yumi long Jisas? Lain bilong wokim dispela nius i bilip olsem Baibel em Tok Bilong God na em tasol i kamapim tok i tru long Jisas. a—2 Timoti 3:16.

Long neks atikol, yumi bai skelim ol bekim em Baibel i kamapim long sampela askim em planti man i gat long Jisas. Em yet i tok olsem God i opim rot bilong kisim bek “olgeta man husat i bilip long em.” (Jon 3:16) Mipela i singautim yu long skelim ol bekim na bai yu yet i ken makim olsem yu mas kisim sampela save moa long Jisas o nogat, na olsem wanem yu ken bilip long em.

[Futnot]