¿Buchʼu jaʼ li Jesuse?
¿Buchʼu jaʼ li Jesuse?
«Jkotoltik jeltos kʼusi ta jnoptik ta sventa li [Jesuse]. Yuʼun jkotoltik, manchuk mi jchʼunojtik ta stojolal o mi muʼyuk, oy onoʼox jakʼbe jbatik ta melel ti buchʼue.» (STAN GUTHRIE, JTSʼIBAJOM)
EP BUCHʼUTIK tskʼan tsnabeik tajek skʼoplal li Jesuse. Jech oxal chchʼam tajek li livroetik ti jaʼ chalbe skʼoplale xchiʼuk li voletoetik kʼalal ch-echʼ junantik pelikula sventa Jesuse. Akʼo mi jech, li krixchanoetike oy kʼusitik tsjakʼbe-o sbaik xchiʼuk ep ta tos kʼusi chalik ti buchʼu jaʼ ta melel li Jesuse.
Oy xa jayibuk jabile oy chaʼvoʼ jtsʼibajometik sventa periodiko la sjakʼik ta Internet. Li buchʼutik tstunesik Internete skʼan ox stakʼik li jun sjakʼobil liʼe: «¿Buchʼu jaʼ li Jesuse?». Jkʼeltik jlomuk li stakʼobiltake.
● «Yaʼeluke jaʼ jun jchanubtasvanej ti lek ta chanbel stalelale, ti laj yichʼ ojtikinel ta skoj li slekil yoʼontone.»
● «Jaʼ jun vinik ti jelel tajek ti kʼuyelan kuxie.»
● «Muʼyuk sprevailtak ti kuxi ta melele.»
● «Jaʼ li Xnichʼon Dios ti vokʼe, ti chame xchiʼuk ti chaʼkuxi sventa tskoltautik li ta jmultike. Li avie kuxul li Jesuse xchiʼuk chchaʼsutal liʼ ta Balumile.»
● «Chkale jaʼ xnichʼon Dios ti jaʼ jun krixchanoe xchiʼuk ti jaʼ jun dios xtoke.»
● «Jaʼ li buchʼu chichʼ albel skʼoplal li ta jecheʼ loʼil sventa mukʼta ololetike.»
¿Bu van junukal ti melele? Jamal ta ilel ti mu skotoluk melele. Vaʼun chaʼa, ¿bu xuʼ jtatik li kʼusi melel ta sventa Jesús ti xuʼ jchʼuntike? Li buchʼu ta jtsʼibakutik li revista liʼe jchʼunojkutik ti jaʼ Skʼop Dios li Vivliae xchiʼuk ti jaʼ noʼox stuk xuʼ xalbutik li kʼusi melel ta sventa Jesuse (2 Timoteo 3:16). *
Li ta yan mantal chtale, ta jkʼeltik junantik sjakʼobil ti jech tsjakʼbe sbaik ta sventa li Jesuse xchiʼuk li kʼusi chal Vivlia ta sventa taje. Li Jesús eke chanubtasvan ti xuʼ sta skolebalik «li bochʼotic ta xchʼunic ti jaʼ Jcoltavanej yuʼunique» (Juan 3:16). Jaʼ yuʼun, ta jtijkutik avoʼonton sventa xanabe li stakʼobiltak lokʼem ta Vivliae. Jech xuʼ xanop ta tsʼakal mi chakʼan chachan mas ta sventa Jesús yoʼ xavakʼ xchʼunel avoʼonton ta stojolal.
[Tsʼib ta yok vun]
^ par. 11 Chatabe mas yaʼyejal ti bu chal «Li Vivliae likem tal ta stojolal Dios», te ta kapitulo 2 li ta livro ¿Kʼusi chchanubtasvan ta melel li Vivliae?, ti pasbil yuʼun yajrextikotak Jeovae.
