¿Máax Jesús?

«Cada máakeʼ yaanal baʼax ku tuklik yoʼolal [Jesús]. Tuláakloʼon, tak le máaxoʼob creertik bey xan le maʼoʼ, tsʼoʼok k-tuklik máax wal tu jaajil letiʼeʼ.» (STAN GUTHRIE, ESCRITOR)

YAʼAB máaxoʼob taak u yojéeltikoʼob jach máax Jesús. Le oʼolal jach ku maʼanal le libroʼob ku tʼaanoʼob tiʼ letiʼ yéetel jach ku bin chaʼantbil le peliculaʼob ku tʼaanoʼob tu yoʼolaloʼ. Kex beyoʼ láayliʼ jejeláas baʼaloʼob ku tuklaʼal tu yoʼolal, yéetel yaʼab máakoʼob maʼ u yojéeltoʼob jach máax Jesusiʼ.

Maʼ sen úucheʼ, beetaʼab junpʼéel encuesta tiʼ Internet tumen kaʼatúul periodistaʼob. Le máakoʼob táakpajoʼob teʼ encuestaaʼ tu núukoʼob le kʼáatchiʼaʼ: «¿Máax Jesús?». Koʼox ilik jujunpʼéel baʼax tu núukoʼob.

● «Teneʼ in naʼatikeʼ juntúul rabino (wa j-kaʼansaj) kuxlaj úuchjeakil jach tu yeʼesaj u yutsil.»

● «Juntúul máak jeʼexoʼonaʼ, chéen jelaʼan bix úuchik u kuxtal.»

● «Mix baʼal eʼesik wa jach anchaji.»

● «U Hijo Dios síij, kíim yéetel kaʼa kuxkíintaʼab utiaʼal u jáalkʼabtikoʼon tiʼ k-kʼebanoʼob. Jesuseʼ láayliʼ kuxaʼaneʼ yéetel yaan u kaʼa suut way Luʼumeʼ.»

● «U juntúuliliʼ paal Dios, jach wíinik jeʼexoʼonaʼ baʼaleʼ jach jeʼex Dios xaneʼ.»

● «Chéen juntúul máax jeʼex le ku chíikpajal tiʼ le cuentoʼob utiaʼal mejen paalaloʼ.»

Tiʼ le baʼaxoʼob ku yaʼalaʼalaʼ, ¿máakalmáak u jaajil? Tumen maʼ tuláakal jaajiʼ. Le oʼolaleʼ, ¿tuʼux túun ken k-ojéelt u jaajil tu yoʼolal Jesús? Toʼon, máaxoʼob beetik le revistaaʼ, k-creertikeʼ le Bibliaoʼ u Tʼaan Dios, le beetik chéen teʼ jeʼel u páajtal k-ojéeltik u jaajil tu yoʼolal Jesusoʼ (2 Timoteo 3:16). *

Teʼ tuláakʼ xookoʼ yaan k-ilik jujunpʼéel kʼáatchiʼob ku beetik yaʼab máakoʼob yoʼolal Jesús. Yaan k-ilik xan baʼax ku yaʼalik le Biblia tu yoʼolaloʼ. Jesuseʼ tu kaʼanseʼ le salvacionoʼ utiaʼal «tuláakal le máax ku yoksik u yóol tiʼeʼ» (Juan 3:16). K-invitartikech a wil u núukil le kʼáatchiʼob ku tsʼáaik le Bibliaoʼ. Beyoʼ ta juunal ken a chʼaʼtukult wa yaan a maas kaanbal tiʼ Jesús utiaʼal a tsʼáaik a fe tiʼ letiʼ.

[Tsolajil]