Kigamo Lapenywa Madok i Kom Yecu Kricito

“Dano mono giwacci an anga?”​—LUKA 9:18.

YECU openyo lupwonnyene ki lapeny meno pien en onongo ngeyo ni dano gitye ki tam mapat pat i kome. Ento, onongo pe tye tyen lok mo ma weko dano gibedo ki tam mapat pat i kome. Yecu pe onongo bedo kekene kun tiyo ticce i mung. Ma ka meno, en onongo bedo kacel ki lwak ma i carogi ki dong bomagi. En otito kwena dok bene opwonyo dano ka maleng pien onongo en mito ni gunge lok ada i kome.​—Luka 8:1.

Watwero niang lok ada madok i kom Yecu ki i lokke kacel ki ticce ma kicoyogi i Jiri angwen me Baibul​—Matayo, Marako, Luka, ki dong Jon. Lok magi ma cwiny maleng aye omiyo kicoyogi-ni aye konyo me gamo lapenywa madok i kom Yecu.​—Jon 17:17.

 LAPENY: Yecu mono ada obedo dano ma okwo i tekwaro?

LAGAM: Tye lok ada pien lucoc mapol me tekwaro ma i kingi tye iye Josephus ki Tacitus ma gukwo i cencwari me acel, gucoyo lok i kom Yecu calo ngat ma okwo ada i tekwaro. Ma pud dong ngene loyo aye ni Jiri nyuto ni Yecu obedo tye ada ento pe lok mo me ododo ata. Lok meno donyo matut kun nyuto wa kare kacel ki kabedo ma gin moni otimme iye. Me labolle, Luka ma ocoyo Jiri oloko i kom luloc abiro ma lucoc me tekwaro bene guloko i komgi​—pi nyuto mwaka ma Yecu ocako kwede ticce me pwony.​—Luka 3:1, 2, 23.

Jami ma nyuto ni Yecu obedo ngat ma okwo i tekwaro dwong ma pe wacce. Buk me Evidence for the Historical Jesus waco ni “pol pa lukwan matego giye ni laco mo ma nyinge Yecu me Najaret okwo gire i cencwari mukwongo.”

LAPENY: Yecu mono en aye obedo Lubanga?

LAGAM: Pe. Yecu pe omedo ki kete wacel ni erom ki Lubanga. Ma ka meno, tyen mapol en onyuto ni Jehovah gire dit loye. * Me labolle, Yecu olwongo Jehovah ni ‘Lubangana’ ki dok ni ‘Lubanga acel me ada.’ (Matayo 27:46; Jon 17:3) Ngat ma tye ki rwom ma lapiny keken aye twero tic ki lok ma kit man i kom ngat ma loye. Latic ma lwongo ngat mumiye tic ni “laditta” nyo ni “ngat ma loyo kany” nongo tye ka nyuto ka maleng ni rwomme tye lapiny.

Yecu dok onyuto bene ni en gin ki Lubanga pe gitye kom acel. I nino mo Yecu owaco bot jo ma gikwere ni: “I cikwu gicoyo ni, lok pa caden aryo bedo ada; an abolo lok me caden i koma kena, dok Wora ma oora bene cadenna.” (Jon 8:17, 18) Kadi ningo Yecu gin ki Jehovah pe gitye kom acel. Ka pe kumeno ci i yo ngo ma gin aryo-ni onongo gitwero bedo lucaden aryo?

LAPENY: Yecu mono obedo mere laco mo ma kite ber?

LAGAM: Pe kumeno. En onongo pe obedo ngat ma kite ber keken. Yecu onongo ngeyo ni tic mapol ma pigi tego cung i wiye ma lubbe ki cobo miti pa Lubanga. Magi aye mogo manok i kine:

● “Wod acel keken pa Lubanga.” (Jon 3:18) Yecu onongo ngeyo kwene ma ea ki iye. Ki lok ada en ocako kwo wacon ma peya obino i lobo. En owaco ni, “alor piny ki i polo.” (Jon 6:38) Yecu aye obedo acakki me ginaketa ducu pa Lubanga dok bene en okonyo Lubanga ki cweyo jami mukene-ni ducu. Macalo ngat acel keken ma Lubanga ocweyo en kikome, Yecu twero lwonge ka kare ni “Wod acel keken pa Lubanga.”​—Jon 1:3, 14; Jo Kolocai 1:15, 16.

● “Wod pa dano.” (Matayo 8:20) Yecu olwonge kekene tyen mapol ni “Wod pa dano,” dok lok ma kit man nonge cokcok tyen 80 kulu i Jiri. Lok man nyuto ni en obedo gire dano adana ento pe Lubanga ma  oruko kom pa dano. Wod acel keken pa Lubanga-ni kono dong ocako doko dano nining? Jehovah otiyo ki cwiny maleng me nako kwo pa Wode ci oketo i ot nyodo pa anyaka me Judaya ma nyinge Maliam ma peya onongo ngeyo laco, man omiyo en ogamo ic. Macalo adwogine, kinywalo Yecu labongo bal ki roc mo.​—Matayo 1:18; Luka 1:35; Jon 8:46.

● “Lapwony.” (Jon 13:13) Yecu onyuto ka maleng ni tic ma Lubanga omiye aye “pwonyo . . . lok me kwena maber” i kom Ker pa Lubanga. (Matayo 4:23; Luka 4:43) En otito lok i kom Ker pa Lubanga ki dong gin ma Ker-ri bitimone me cobo mitti pa Jehovah i yo ma pwot dok mulil.​—Matayo 6:9, 10.

● “Lok.” (Jon 1:1) Yecu otiyo macalo lalok pa Lubanga​—ngat ma Lubanga otiyo kwede me cwalo ngec bot jo mukene. Jehovah otiyo ki Yecu me tito Kwenane bot dano ma i lobo.​—Jon 7:16, 17.

LAPENY: Yecu aye mono obedo Meciya ma kiciko pire-ni?

LAGAM: Ee. Baibul otito wacon pi bino pa Meciya, nyo Kricito, ma te lokke gonye ni “Ngat ma Kiwiro.” Ngat ma Kiciko Pire-ni kiwaco ni bitic matek i cobbe pa Yub pa Jehovah. I nino mo acel dako mo me Camaria owaco ki Yecu ni: “Angeyo ni Meciya (ma gilwongo ni Kricito) bibino.” Yecu odok i lokke ni ka maleng ni: “An a en ma loko kwedi-ni.”​—Jon 4:25, 26.

Tika tye gin mo ma nyuto atir ni Yecu aye ada obedo Meciya? Tye jami adek ma ginyuto, calo ka ngat mo odiyo cinge, gin ma dong i karatac nyuto ngat meno. Tika otimme kumeno bene i kom Yecu?

● Kwaro pa Yecu. Baibul otito wacon ni Meciya bituc kun a ki kom Abraim kube kwede wa bot Daudi. (Acakki 22:18; Jabuli 132:11, 12) Yecu obedo lakwaro jo aryo-ni ducu.​—Matayo 1:1-16; Luka 3:23-38.

● Lok pa lunebi ma gucobbe. Ginacoya me leb Ibru opong ki lok pa lunebi ma gucobbe i kom Meciya i kare ma en tye i lobo, ma man tye iye lok matut madok i kom nywalle ki tone. Lok pa lunebi ducu gucobbe i kom Yecu. I kingi tye iye: Kinywale i Beterekem (Mika 5:2; Luka 2:4-11), Kilwongo en ki i lobo Ejipt (Kocea 11:1; Matayo 2:15), dok kineke labongo turo cogone mo keken (Jabuli 34:20; Jon 19:33, 36). Pe tye kit yo mo keken ma Yecu onongo twero doro kwone wek ocob lok ducu ma lunebi guloko i kom Meciya. *

● Caden ma Lubanga omiyo en kikome. I kare ma kinywalo Yecu, Lubanga ocwalo lumalaika wek gubin guwac bot lukwat ni dong kityeko nywalo Meciya. (Luka 2:10-14) I kare ma Yecu tye i lobo i ticce me pwony, Lubanga oloko ki i polo tyen mapol kun nyuto cwakke i kom Yecu. (Matayo 3:16, 17; 17:1-5) Jehovah omiyo Yecu otimo tango matego dok mapol wek obed calo lanyut ni Yecu aye Meciya.​—Tic pa Lukwena 10:38.

 LAPENY: Gin ango mumiyo Yecu kong odeno can ka oto?

LAGAM: Kit ma Yecu onongo balle pe kwede-ni, onongo pe pore pi en me deno can. Dok bene onongo pe pore ni myero gigure i kom yat calo labalo kun kiweke ni oto kunnu calo gwok. Yecu onongo ongeyo ni tim alany ma kit meno bibedo tye dok bene oye ni kitere i yo marac kit meno.​—Matayo 20:17-19; 1 Petero 2:21-23.

Lok pa lunebi ma lubbe ki Meciya onongo nyuto ni en myero oden can dok oto me kwanyo bal pa jo mukene. (Icaya 53:5; Daniel 9:24, 26) Yecu kikome bene owaco ki doge ni ebino “pi miyo kwone me koko jo mapol.” (Matayo 20:28) Jo ma giketo niyegi i teko pa ginkok pa Yecu me kwanyo bal gibedo ki gen me kwo labongo bal ki to kun gibedo pi naka i lobo me Paradic. *​—Jon 3:16; 1 Jon 4:9, 10.

LAPENY: Tika omyero waye ni Yecu ocer?

LAGAM: Ee. Yecu onongo ngeyo atir ni kibicere ki i kin jo muto. (Matayo 16:21) Omyero wange bene ni, kadi Yecu nyo jo ma gucoyo Baibul pe guwaco ni Yecu bicer ki i kin jo muto i yo mo ata. Ye i lok ma kumeno tek. Ma ka meno, Baibul waco ni: “Lubanga ocero en woko, kun gonye woko ki i arem me to.” (Tic pa Lukwena 2:24) Ka waye ni Lubanga mo olo tye dok ni en aye Lacwe jami ducu, ci wabedo labongo akalakala mo ni en twero cero Wode ki i kin jo muto.​—Jo Ibru 3:4.

Tika tye caden ma moko ni kicero Yecu? Kong inen jami magi.

● Caden pa jo ma guneno ki wanggi. Ma romo kine ka mwaki 22 i nge to pa Yecu, lakwena Paulo otito ni dano ma welgi kato 500 kulu guneno Yecu i nge cere dok ni pol pa jo magi onongo pud gitye makwo ma en coyo lok man. (1 Jo Korint 15:6) Caden ma ngat acel nyo dano aryo gumiyo kitwero kwerone, ento anga ma twero pyem ki caden pa dano 500 ma guneno gin moni ki wanggi?

● Lucaden ma gigene. Lupwonnye pa Yecu​—ma onongo gingeyo maber adada gin mutimme-ni​—gutito ki tekcwiny ni kicero Yecu woko. (Tic pa Lukwena 2:29-32; 3: 13-15) Dok bene gin gutero ye i kom cerre calo guti ma pire tek i niye pa Lukricitayo. (1 Jo Korint 15:12-19) Lupwonnye-ni onongo giye to ma ka kwero niyegi i kom Kricito. (Tic pa Lukwena 7:51-60; 12:1, 2) In itamo ningo i kom ngat ma ye to pi gin ma en ngeyo ni obedo lok goba?

Dong watyeko neno lagam me Baibul pi lapeny abicel mucwiny madok i kom Yecu. Lagam magi ginyutiwa ka maleng ngat ma Yecu obedo. Ento tika lagam me lapeny magi pigi tek boti? Nyo ni tika gin ma iyero me ye i kom Yecu pire tek?

[Lok ma tye piny]