Jisas Kraes Ansa Blong Sikis Kwestin

“?Ol man oli stap tokbaot mi, se mi hu?”—LUK 9:18.

JISAS i askem kwestin ya from we hem i save se ol man oli gat ol defdefren tingting se hem i hu. Be i narakaen we tingting blong ol man i fasfas, from we oltaem Jisas i joen wetem ol man long vilej blong olgeta mo long taon blong olgeta. Hem i no mekem samting long fasin we i haed. Hem i prij mo i tijim narafala long fored blong plante man, from we hem i wantem se olgeta oli save trutok blong hem.—Luk 8:1.

Ol toktok mo ol fasin blong Jisas oli soemaot trutok long saed blong hem. Long Baebol, fofala buk ya Matiu, Mak, Luk, mo Jon, oli tokbaot ol fasin mo ol toktok blong Jisas. Bambae yumi luk ol tok blong fofala buk ya, blong ansa long ol kwestin blong yumi long saed blong Jisas.—Jon 17:17.

 KWESTIN 1:

?Jisas i wan tru man we i bin laef long wol?

ANSA: Yes. Ol man blong raetemdaon histri, oli tokbaot Jisas se hem i wan tru man we i bin laef long wol. Tu long ol man ya hemia Josephus mo Tacitus. Tufala i laef long taem blong ol fas Kristin. Baebol tu i soemaot se Jisas i wan tru man. Buk blong Matiu, Mak, Luk, mo Jon, oli klia mo oli talem stret ples we Jisas i go long hem mo wetaem Jisas i go long ples ya. Buk blong Luk i tokbaot nem blong seven haeman we oli stap rul long yia we Jisas i statem wok blong prij mo tijim ol man. Ol man blong raetemdaon histri oli tokbaot ol haeman ya tu.—Luk 3:1, 2, 23.

Ol save we i soemaot se Jisas i wan tru man we i bin laef long wol, i klia. Wan buk (Evidence for the Historical Jesus) i talem se: “Plante man blong stadi oli talem se wan man we nem blong hem Jisas blong Nasaret, i laef bifo long ol yia 100.”

KWESTIN 2:

?Jisas hem i God?

ANSA: Nogat. Jisas i neva talem se hem i sem mak long God. Defren olgeta, oltaem Jisas i soemaot se hem i stap daon aninit long Jehova God. * Jisas i singaot Jehova se: “God blong mi.” Mo hem i talem se: “Yu nomo yu tru God.” (Matiu 27:46; Jon 17:3) Man we i talem ol tok olsem, hem i stap daon aninit long narafala. I olsem we wan man blong wok i tokbaot bos blong hem se, “bos blong mi,” no “man we mi wok blong hem.” I klia se man ya i no bos, be hem i stap daon aninit long bos blong hem.

Jisas i soemaot se hem i defren long God. Hem i talem long ol man we oli stap agensem hem se: “Long Loa blong yufala, oli raetem se, ‘Taem we tok blong tu witnes i agri, tok ya blong tufala i save stanap.’ Oraet, mi mi stap talemaot mi, be Papa blong mi we i sanem mi mi kam, hem tu i stap talemaot mi.” (Jon 8:17, 18) Jisas mo Jehova tufala i tu defren man, from we Jisas i talem se hem wetem Papa blong hem tufala i no wan witnes, be tufala i tu witnes.

KWESTIN 3:

?Jisas i wan gudfala man nomo olsem ol narafala man?

ANSA: Jisas i wan gudfala man, be i no hemia nomo. Hem i save se hem i mekem sam wok we oli impoten blong mekem samting we God i wantem i kamtru.

● Hem i “Stret Pikinini blong God.” (Jon 3:18) Jisas i save ples we hem i kamaot long hem. Hem i laef longtaem finis, bifo we hem i kam long wol. Hem i talem se: ‘Mi mi kamaot long heven.’ (Jon 3:13) Fas samting we God i mekem hemia Jisas. Biaen Jisas i givhan long God blong wokem olgeta narafala samting. God hem wan i wokem Jisas, taswe i stret we Baebol i talem se Jisas nomo i “stret Pikinini blong God.”—Jon 1:3, 14; Kolosi 1:15, 16.

● Hem i “Pikinini blong Man.” (Matiu 8:20) Plante taem Jisas i talem se: “Mi, mi Pikinini blong Man.” Toktok ya we hem i talem i stap samwe 80 taem long ol buk ya Matiu, Mak, Luk mo Jon. Toktok ya i soemaot se hem i man. Hem i no God we i kamdaon long bodi blong man. ?Stret Pikinini blong God i bon long wol olsem wanem? Jehova i yusum tabu  spirit blong putum laef blong Pikinini blong hem i go long bel blong wan gel Jiu we nem blong hem Meri. Nao Meri i bonem Jisas. Jisas i no gat sin, hem i stret gud olgeta.—Matiu 1:18; Luk 1:35; Jon 8:46.

● Hem i “Tija.” (Jon 13:13) Jisas i mekem i klia long ol man se wok we God i givim long hem, hemia blong ‘tijim ol man mo blong talemaot gud nius’ blong Kingdom blong God. (Matiu 4:23; Luk 4:43) Hem i eksplenem klia wanem ya Kingdom blong God, blong i isi long ol man blong oli kasem save long hem. Mo hem i talemaot wanem we Kingdom bambae i mekem blong samting we Jehova i wantem i kamtru.—Matiu 6:9, 10.

● Hem i “Tok ya.” (Jon 1:1) Jisas i man blong talemaot ol tok blong God. God i yusum hem blong i givim ol save long ol narafala long heven mo i talem wanem we oli mas mekem. Hem i talemaot ol tok blong God long ol man long wol tu.—Jon 7:16, 17.

KWESTIN 4:

?I tru se Jisas i Mesaea?

ANSA: Yes. Ol profet tok blong Baebol oli talemaot se Mesaea no Kraes, bambae i kamtru. Tufala tok ya Mesaea mo Kraes i minim “Man we God i jusumaot.” Man ya we God i promes blong sanem i kam, bambae i mekem bigfala wok, blong tingting blong Jehova i kamtru. Wan woman Sameria i talem long Jisas se: “Mi mi save we Mesaea ya hem i mas kam.” Ale Jisas i talem long hem se: “Be mi ya nao, mi stap toktok wetem yu.”—Jon 4:25, 26.

?Wanem i pruvum se Jisas i Mesaea? Yu tingbaot ol laen long fingga blong yu. Oli no sem mak long ol laen long fingga blong narafala. Long sem fasin, i gat tri samting long laef blong Mesaea we i stret long hem nomo. ?Olsem wanem? ?Trifala samting ya i stret long laef blong Jisas? Plis yu tingbaot trifala poen ya:

● Laen we hem i kamaot long hem. Baebol i talemaot se bambae Mesaea i kamaot long laen blong Ebraham, long famle blong Deved. (Jenesis 22:18; Ol Sam 132:11, 12) Jisas i laen blong Ebraham mo Deved.—Matiu 1:1-16; Luk 3:23-38.

● Ol profet tok we oli kamtru finis. Fas haf blong Baebol we oli raetem long lanwis Hibru, i tokbaot plante profet tok we bambae oli kamtru long laef blong Mesaea, taem hem i stap long wol. Oli soemaot wanem bambae i hapen taem Mesaea i bon mo taem hem i ded. Ol samting we ol profet tok ya oli talem oli kamtru long laef blong Jisas. Sam long ol profet tok ya se: Hem i bon long taon ya Betlehem. (Maeka 5:2; Luk 2:4-11) God i singaot hem i aot long Ijip. (Hosea 11:1; Matiu 2:15) Mo taem hem i ded, i no gat wan bun blong hem i brok. (Ol Sam 34:20; Jon 19:33, 36) Jisas i no save bos long olgeta samting we i hapen long laef blong hem, blong mekem ol profet tok ya oli kamtru. Nating se i olsem, olgeta evriwan i kamtru long laef blong hem. *

● God hem wan i talemaot Mesaea. Taem Jisas i bon, God i sanem sam enjel oli go talem  long ol man we oli stap lukaot long sipsip se Mesaea i bon. (Luk 2:10-14) Taem Jisas i mekem wok blong God, God hem wan i toktok i kamdaon, i talem se hem i glad long Jisas. (Matiu 3:16, 17; 17:1-5) Jehova i givim paoa long Jisas blong i mekem ol bigfala merikel. Hemia tu i soemaot se Jisas i Mesaea.—Ol Wok 10:38.

KWESTIN 5:

?From wanem Jisas i harem nogud mo i ded?

ANSA: Jisas i no gat sin, taswe i no stret we hem i harem nogud. Ol man oli nilim hem long pos olsem wan man nogud mo hem i hang long pos ya gogo i ded. Jisas i save se bambae ol man oli mekem i no stret long hem, mo hem i letem olgeta oli spolem hem.—Matiu 20:17-19; 1 Pita 2:21-23.

Ol profet tok we oli tokbaot Mesaea, oli talemaot se bambae hem i harem nogud mo i ded from ol sin blong ol narafala man. (Aesea 53:5; Daniel 9:24, 26) Jisas i talem se hem i kam long wol ‘blong givim laef blong hem blong pem rod blong plante man oli go fri.’ (Matiu 20:28) Ol man we oli bilif long sakrefaes blong Jisas, oli save kam fri long sin mo ded, mo oli save laef olwe long Paradaes long wol. *—Jon 3:16; 1 Jon 4:9, 10.

KWESTIN 6:

?I tru se Jisas i laef bakegen?

ANSA: Yes. Jisas i save se bambae hem i laef bakegen. (Matiu 16:21) Be Jisas mo ol man we oli raetem Baebol, oli no ting se bambae Jisas i laef bakegen olsem nomo. Sipos oli tingting olsem, bambae oli no bilif long God. Be Baebol i talem se: “God i tekemaot hem long paoa blong ded, i mekem hem i laef bakegen.” (Ol Wok 2:24) Sipos yumi bilif long God se hem i mekem olgeta samting, i stret blong yumi bilif tu se hem i save mekem Pikinini blong hem i laef bakegen.—Hibrus 3:4.

?Yumi save olsem wanem se Jisas i laef bakegen? Plis yu ridim ol haf we oli kam biaen.

● Ol man we oli luk. Samwe 22 yia afta we Jisas i ded, aposol Pol i talem se i gat moa long 500 man oli luk Jisas i laef bakegen. Mo plante long olgeta oli laef yet taem Pol i talem ol tok ya. (1 Korin 15:6) Sipos wan no tu man nomo oli luk, maet yumi save talem se oli giaman. Be yumi no save talem se 500 man oli giaman.

● Ol witnes we yumi save trastem. Ol fas disaepol blong Jisas oli talemaot long ol man se Jisas i laef bakegen. Olgeta oli save gud wanem i hapen long taem ya. (Ol Wok 2:29-32; 3:13-15) Yes long tingting blong olgeta, ol Kristin oli mas bilif se Jisas i laef bakegen. (1 Korin 15:12-19) Ol disaepol ya oli rere blong ded from we oli no wantem lego bilif blong olgeta long Jisas. (Ol Wok 7:51-60; 12:1, 2) ?Olsem wanem? ?Yu ting se man i rere blong ded from wan samting we hem i save se i giaman?

Yumi kasem ansa we Baebol i givim long sikis impoten kwestin long saed blong Jisas. Ol ansa i soemaot klia se Jisas hem i hu. ?Be olsem wanem? ?Yu mas bilif long Jisas?

[Ol futnot]