Jesu-Kristo—Mga Pangutana Gitubag

“Kinsa ako sumala . . . sa katawhan?”—LUCAS 9:18.

GIPANGUTANA kana ni Jesus sa iyang mga tinun-an kay nahibalo siyang ang mga tawo lainlaig opinyon bahin niya. Apan, dili sila angayng maglibog. Si Jesus wala magtago sa iyang kalihokan. Hinunoa, siya nakig-uban sa mga tawo diha sa ilang mga balangay ug siyudad. Siya nagsangyaw ug nagtudlo sa dayag kay buot niyang ang mga tawo mahibalo sa kamatuoran bahin niya.—Lucas 8:1.

Ang kamatuoran bahin kang Jesus makita sa iyang mga pulong ug buhat, nga narekord sa upat ka Ebanghelyo—Mateo, Marcos, Lucas, ug Juan. Ang maong inspiradong rekord maoy basehanan sa pagtubag sa mga pangutana bahin kang Jesus. *—Juan 17:17.

 PANGUTANA: Tinuod bang naglungtad si Jesus?

TUBAG: Oo. Ang sekular nga mga historyano, lakip kang Josephus ug Tacitus sa unang siglo, naghisgot bahin kang Jesus. Labawng hinungdanon, gipamatud-an gayod sa mga Ebanghelyo nga si Jesus tinuod nga persona, dili kay minugna lang. Ang rekord espesipiko ug detalyadong naghisgot sa panahon ug dapit. Pananglitan, ang magsusulat sa Ebanghelyo nga si Lucas naghisgot ug pito ka nagmandong opisyal—kansang mga ngalan gikompirmar sa sekular nga mga historyano—sa pagpamatuod sa tuig nga gisugdan ni Jesus ang iyang ministeryo.—Lucas 3:1, 2, 23.

Lig-on ang pamatuod nga si Jesus naglungtad gayod. “Kadaghanang eskolar mouyon nga ang tawo nga nailhang Jesus sa Nasaret nabuhi gayod sa unang siglo,” nag-ingon ang librong Evidence for the Historical Jesus.

PANGUTANA: Si Jesus ba mao ang Diyos?

TUBAG: Dili. Wala gayod isipa ni Jesus nga katumbas siya sa Diyos. Sa kasukwahi, balikbalik niyang gipakita nga siya ubos kang Jehova. * Pananglitan, gitawag ni Jesus si Jehova ingong ‘akong Diyos’ ug “ang bugtong matuod nga Diyos.” (Mateo 27:46; Juan 17:3) Ang usa nga ubos mao lamay mogamit niana nga ekspresyon ngadto sa lain. Ang usa ka trabahante nga motawag sa iyang amo ingong “akong boss” o “ang tagdumala” tin-awng nagpakita nga siya ubos ug katungdanan.

Gipakita usab ni Jesus nga siya ug ang Diyos managlahi nga persona. Kas-a si Jesus miingon sa mga magsusupak nga mikuwestiyon sa iyang awtoridad: “Sa inyong kaugalingong Balaod kini nahisulat, ‘Ang pamatuod sa duha ka tawo maoy tinuod.’ Usa ako nga nagpamatuod bahin sa akong kaugalingon, ug ang Amahan nga nagpadala kanako nagpamatuod bahin kanako.” (Juan 8:17, 18) Busa si Jesus ug si Jehova managlahi nga persona. Kay kon dili pa, nganong gipakita man sa teksto nga sila duha ka saksi? *

PANGUTANA: Usa lang ba ka maayong tawo si Jesus?

TUBAG: Dili. Mas labaw pa siya niana. Nahibalo si Jesus nga daghan siyag hinungdanong papel sa pagtuman sa kabubut-on sa Diyos. Ania ang pipila niana:

● “Bugtong nga Anak sa Diyos.” (Juan 3:18) Si Jesus nahibalo kon diin siya gikan. Siya dugay nang naglungtad sa wala pa siya matawo sa yuta. “Ako nanaog gikan sa langit,” siya miingon. (Juan 6:38) Si Jesus mao ang unang gilalang sa Diyos, ug siya mitabang sa paglalang sa tanang ubang butang. Kay siya lang ang direktang gilalang sa Diyos, si Jesus haom tawgong “bugtong nga Anak sa Diyos.”—Juan 1:3, 14; Colosas 1:15, 16.

● “Anak sa tawo.” (Mateo 8:20) Si Jesus makadaghang nagtawag sa iyang kaugalingon ingong “Anak sa tawo,” usa ka ekspresyon nga mga 80 ka beses makita diha sa mga Ebanghelyo. Kini nagpakitang siya tinuod gayong tawo ug dili Diyos nga nagsul-ob ug tawhanong lawas. Sa unsang paagi ang bugtong Anak sa Diyos gipanganak ingong tawo? Pinaagi sa balaang espiritu, gibalhin ni Jehova ang kinabuhi sa iyang Anak  ngadto sa tagoangkan sa Hudiyang ulay nga si Maria, maong nagsabak kini. Tungod niana, si Jesus natawong walay sala ug hingpit.—Mateo 1:18; Lucas 1:35; Juan 8:46.

● “Magtutudlo.” (Juan 13:13) Tin-awng giingon ni Jesus nga ang buluhaton nga gihatag sa Diyos kaniya mao ang ‘pagtudlo ug pagwali sa maayong balita’ bahin sa Gingharian sa Diyos. (Mateo 4:23; Lucas 4:43) Iyang gisaysay sa tin-aw ug simple kaayong paagi kon unsa ang Gingharian sa Diyos ug kon unsay buhaton niana sa pagtuman sa kabubut-on ni Jehova.—Mateo 6:9, 10.

● “Ang Pulong.” (Juan 1:1) Si Jesus mao ang Tigpamaba sa Diyos—ang tigpahibalo sa uban sa mga impormasyon ug instruksiyon gikan sa Diyos. Gigamit ni Jehova si Jesus sa paghatod sa Iyang mensahe ngadto sa mga tawo.—Juan 7:16, 17.

PANGUTANA: Si Jesus ba ang gisaad nga Mesiyas?

TUBAG: Oo. Gitagna sa Bibliya ang pag-abot sa Mesiyas, o Kristo, nga nagpasabot ug “Usa nga Dinihogan.” Kining Sinaad nga Usa may hinungdanong papel sa katumanan sa katuyoan ni Jehova. Dihay higayon nga ang usa ka babayeng Samarianhon miingon kang Jesus: “Nahibalo ako nga ang Mesiyas moanhi, kinsa gitawag nga Kristo.” Dayon, si Jesus miingon: “Ako nga nakigsulti kanimo mao siya.”—Juan 4:25, 26.

May pamatuod bang si Jesus mao gayod ang Mesiyas? Dunay tulo ka ebidensiya nga lig-ong nagpamatuod niini, samag fingerprint nga nagpaila sa usa lamang ka persona. Mohaom ba si Jesus niana? Tagda kini:

● Iyang kagikan. Ang Bibliya nagtagna nga ang Mesiyas maggikan kang Abraham pinaagi sa banay ni David. (Genesis 22:18; Salmo 132:11, 12) Si Jesus maoy kaliwat nilang duha.—Mateo 1:1-16; Lucas 3:23-38.

● Natuman nga mga tagna. Ang Hebreohanong Kasulatan dunay daghang tagna bahin sa kinabuhi sa Mesiyas dinhi sa yuta, lakip na ang detalye bahin sa iyang pagkatawo ug kamatayon. Gituman ni Jesus ang tanan niining mga tagnaa. Kini ang pipila niana: Siya natawo sa Betlehem (Miqueas 5:2; Lucas 2:4-11), gitawag gikan sa Ehipto (Oseas 11:1; Mateo 2:15), ug gipatay nga walay bukog nga nabali (Salmo 34:20; Juan 19:33, 36). Imposible gayong gimaniobra ni Jesus ang iyang kinabuhi aron lang mohaom sa gitagna bahin sa Mesiyas. *

● Pamatuod mismo sa Diyos. Sa pagkatawo ni Jesus, ang Diyos nagpadalag mga anghel sa pagpahibalo sa mga magbalantay sa karnero nga natawo ang Mesiyas. (Lucas 2:10-14) Sa ubay-ubayng higayon panahon sa ministeryo ni Jesus, ang Diyos mismo misulti gikan sa langit, nga nagpahayag sa iyang pag-uyon kang Jesus. (Mateo 3:16, 17; 17:1-5) Gipahinabo ni Jehova nga si Jesus makahimog dagkong milagro, nga dugang nagpamatuod nga si Jesus mao ang Mesiyas.—Buhat 10:38.

 PANGUTANA: Nganong kinahanglang mag-antos ug mamatay si Jesus?

TUBAG: Kay walay sala, si Jesus dili unta angayng mag-antos. Dili sab siya angayng ilansang sa estaka samag ordinaryong kriminal ug pasagdang makaagom ug makauulawng kamatayon. Bisan pa niana, gidahom ni Jesus ang maong pagmaltratar ug kinabubut-on siyang nagpailalom niana.—Mateo 20:17-19; 1 Pedro 2:21-23.

Ang mga tagna bahin sa Mesiyas nag-ingon nga siya kinahanglang mag-antos ug mamatay aron sa pagtabon sa sala sa uban. (Isaias 53:5; Daniel 9:24, 26) Si Jesus mismo miingon nga siya mianhi aron sa “paghatag sa iyang kalag nga usa ka lukat baylo sa daghan.” (Mateo 20:28) Kadtong nagbaton ug pagtuo sa bili sa iyang halad may paglaom nga maluwas gikan sa sala ug kamatayon ug mabuhi sa walay kataposan sa Paraiso sa yuta. *—Juan 3:16; 1 Juan 4:9, 10.

PANGUTANA: Makatuo ba gayod kita nga si Jesus nabanhaw gikan sa mga patay?

TUBAG: Oo. Si Jesus nagdahom gayod nga siya banhawon gikan sa mga patay. (Mateo 16:21) Apan, angay natong hinumdoman nga si Jesus ug ang mga magsusulat sa Bibliya wala gayod mangangkon nga siya mabanhaw sa kinaiyanhong paagi. Ang maong ideya dili gayod katuohan. Hinunoa, ang Bibliya nag-ingon: “Ang Diyos nagbanhaw kaniya pinaagi sa pagtangtang sa kahapdos sa kamatayon.” (Buhat 2:24) Kon atong dawaton nga dunay Diyos ug nga siya ang Maglalalang sa tanang butang, nan makataronganon gayod nga motuo kita nga siya makabanhaw sa iyang Anak gikan sa mga patay.—Hebreohanon 3:4.

May kasaligan bang ebidensiya nga si Jesus gibanhaw? Tagda ang mosunod:

● Pamatuod sa mga nakasaksi. Mga 22 ka tuig human sa kamatayon ni Jesus, si apostol Pablo misulat nga dihay kapig 500 ka saksi nga nakakita sa binanhawng si Jesus ug kadaghanan nila buhi pa sa panahong gisulat kini ni Pablo. (1 Corinto 15:6) Kon usa o duha ray nakasaksi, daw dili ra kini katuohan. Apan, kinsay makalalis sa pamatuod sa 500 nga nakasaksi niana?

● Kasaligang mga saksi. Ang unang mga tinun-an ni Jesus—nga maoy aktuwal nga nakakita sa nahitabo—maisogong nagpahayag nga si Jesus gibanhaw. (Buhat 2:29-32; 3:13-15) Gani, ilang giisip nga hinungdanon sa mga Kristohanon ang pagtuo sa iyang pagkabanhaw. (1 Corinto 15:12-19) Ang maong mga tinun-an andam mamatay inay isalikway ang ilang pagtuo kang Jesus. (Buhat 7:51-60; 12:1, 2) May nailhan ka bang andam mamatay alang sa usa ka butang nga dili tinuod?

Atong nahisgotan ang tubag sa Bibliya sa unom ka pangutana bahin kang Jesus. Ang maong mga tubag tin-awng nagtug-an kanato kon kinsa si Jesus. Apan hinungdanon ba gayod kini? Sa laing pagkasulti, hinungdanon ba kon unsay imong gituohan bahin kang Jesus?

[Mga footnote]