Jiisusi pillugu apeqqutitta akissutaat

“Inuit kinaanerarpaannga?” — LUKASI 9:18.

JIISUSIP ajoqersukkani taama aperivai nalunnginnamiuk inuit pilluni assigiinngitsunik isumaqartut. Paatsiveerunnissamulli pissutissaqanngilaq. Jiisusi kisimiinniartuunngilaq, inunnut toqqortugaqartutut illuni toqqortortuunngilaq. Akerlianilli nunaqarfinni illoqarfinnilu inunnut akuliuttuuvoq. Tamanut ajoqersuisarlunilu oqaluussisarpoq kissaatigigamiuk inuit pilluni eqqortoq ilisimassagaat. — Lukasi 8:1.

Jiisusi pillugu sallusuissutit taassuma oqaasiisigut iliuusiisigullu ersertut Biibilimi iivangkiiliuni sisamani — Matthæusip, Markusip, Lukasip Johannesillu allagaanni — atuarneqarsinnaapput. Allakkat isumassarsiarititaasut taakku tunngavigalugit Jiisusi pillugu apeqqutigineqartut akissavavut. — Johannesi 17:17.

 APEQQUT: Jiisusi ilumut inuunikuua?

AKISSUT: Aap. Ukiuni hundredelinni oqaluttuarisaanermik ilisimatuut, ilaatigut Josefusip Tacitusillu, Jiisusi ilumut inuusimasutut eqqartorpaat. Pingaarnerusumilli iivangkiiliuni nalorninaatsumik ersersinneqarpoq Jiisusi oqaluttualiaannaanani ilumut inuusimasoq. Sumi qangalu pisimaneri eqqorluartumik sukumiisumillu oqaluttuani taakkunani allanneqarsimapput. Assersuutigalugu Jiisusip kiffartornini qanga aallartissimaneraa uppernarsarniarlugu iivangkiiliumik allattup Lukasip naalakkat arfineq-marluk — aqqi oqaluttuarisaanermik ilisimatuunit uppernarsarneqarsimasut — eqqaavai. — Lukasi 3:1, 2, 23.

Jiisusi ilumut inuusimaneranik uppernarsaatit assortorneqarsinnaanngillat. “Ilisimatuut amerlanerit nassuerput angut Jiisusimik Nazaretimiumik taaneqartartoq ukiuni hundredelinni siullerni inuusimasoq,” atuakkami Evidence for the Historical Jesus-imi allassimavoq.

APEQQUT: Jiisusi ilumut Guutiua?

AKISSUT: Naagga. Jiisusi isumaqanngisaannarsimavoq Guuti naligalugu. Akerlianilli Jiisusip ersersittuaannarsimavaa Jehovamut naalatsigitittuulluni. * Assersuutigalugu Jiisusip Jehova ‘Guutiminik’ aamma “ilumut kisimi Guutiusumik” taavaa. (Matthæusi 27:46; Johannesi 17:3) Allamut naalatsigitittoq kisimi taama oqarsinnaavoq. Sulisup sulisitsisuni “ittuminik” imaluunniit “qullersaminik” taagaangamiuk takutittarpaa pingaannginnerulluni.

Jiisusip aamma takutippaa tassaanani Guuti. Jiisusi ilaanni oqartussaassutsiminik upperinninngitsunut oqarpoq: ‘Ilissi nammineq inatsisissinni allassimavoq inuit marluusut nalunaajaataat atuuttuusussaasoq. Uanga imminut nalunaajaatigaanga, aammattaaq Ataatap uannik aallartitsisup nalunaajaatigaanga.’ (Johannesi 8:17, 18) Jiisusi Jehovalu immikkut kinaassusiliusimassapput, qanormi ilillutik marluullutik nalunaajaasuussagaluaramik? *

APEQQUT: Jiisusi tassaaginnarpa inuk ajunngitsoq?

AKISSUT: Naagga. Tassaaginnanngilaq inuk ajunngitsoq. Jiisusip nalunngilaa Guutip piumasaanik naammassinninnissaminut pingaarutilinnik arlalinnik akisussaaffeqarluni. Aajuku ilai:

● ‘Guutip ernitua.’ (Johannesi 3:18) Jiisusip suminngaanneernini nalunngilaa. Nunarsuarmi inunngunngikkallaramili inuunera aallartippoq. “Qilammimmi aqqarpunga,” nassuiaavoq. (Johannesi 6:38) Guutip Jiisusi siulliullugu pinngortippaa allanillu tamanik pinngortitsinermini ikiortigalugu. Guutimit toqqaannartumik pinngortitatuaammat ‘Guutip ernituanik’ taaneqarnera naleqqulluarpoq. — Johannesi 1:3, 14; Kolossemiut 1:15, 16.

● ‘Inuup ernera.’ (Matthæusi 8:20) Jiisusi arlaleriaqaluni ‘Inuup Erneranik’ imminut taasarpoq, oqariartaaseq 80-it missaanni iivangkiiliuni atorneqartarpoq. Oqariartaatsimi ersersinneqarpoq Jiisusi Guutiunngitsoq, inuusorli.  ‘Guutip ernitua’ qanoq ililluni inuttut erniusinnaagami? Anersaaq illernartoq aqqutigalugu. Jehovap ernermi inuunera niviarsiassap Mariap juutiusup illiaanut nuuppaa Maria naartulersillugu. Tamatuma kingunerisaanik Jiisusi ajorteqarani naammalluinnartuullunilu inunngorsinnaasimavoq. — Matthæusi 1:18; Lukasi 1:35; Johannesi 8:46.

● ‘Ajoqersuisoq.’ (Johannesi 13:13) Jiisusip erseqqissarpaa suliassani Guutimeersoq tassaasoq ‘ajoqersuineq’ Guutillu naalagaaffia pillugu nutaarsiassamik nuannersumik ‘oqaluussineq’. (Matthæusi 4:23; Lukasi 4:43) Guutip naalagaaffia sunaanersoq tamatumalu Jehovap piumasaa qanoq naammassiumaaraa ersarissumik paasiuminartumillu nassuiarpai. — Matthæusi 6:9, 10.

● “Oqaaseq.” (Johannesi 1:1) Jiisusi Guutip oqaaseqartitaraa — taanna aqqutigalugu Guuti paasissutissiisarlunilu ajoqersuisarpoq. Tassa Jehova Jiisusi aqqutigalugu inunnut nunarsuarmiittunut tusarliussisarpoq. — Johannesi 7:16, 17.

APEQQUT: Jiisusi Missiarsiua neriorsuutigisaq?

AKISSUT: Aap. Biibilimi siulittuutigineqarpoq Missiarsi imaluunniit Kristusi, isumaqartoq “tanitaq”, tikiukkumaartoq. Neriorsuutigisaq taanna Jehovap siunertaata naammassineqarnerani pingaaruteqarnerpaavoq. Ilaanni arnaq Samariamiu Jiisusimut oqarpoq: “‘Nalunngilara Missiarsi tikiukkumaartoq’ — tassa Kristusi pineqarpoq.” Jiisusip toqqaannartumik oqarfigaa: “Uanga, ilinnut oqaluttoq, taannaavunga.” — Johannesi 4:25, 26.

Jiisusip ilumut Missiarsiuneranut uppernarsaatissaqarpa? Soorlu inussat ipai inuup ataasiinnaap kinaaneranut uppernarsaataasartut taamatuttaaq Jiisusip Missiarsiuneranut assortugassaanngitsunik pingasunik uppernarsaatissaqarpoq. Tulliuttut eqqarsaatigeriakkit:

● Siuaasai. Biibilimi siulittuutigineqarpoq Missiarsi Daavikkut Aaperaamut kinguaajussasoq. (1 Mosesi 22:18; Tussiaat 132:11, 12) Taakku marluk Jiisusip siuaasarai. — Matthæusi 1:1-16; Lukasi 3:23-38.

● Siulittuutit eqquuttut. Allakkat Hebræerisuut Jiisusip nunami inuunera pillugu aamma inunngornera toquneralu pillugit sukumiisumik siulittuuterpassuarnik imaqarput. Siulittuutit tamarmik Jiisusimut eqquutitinneqarput. Ilaatigut uku: Betlehemimi inunngorpoq, (Mika 5:1; Lukasi 2:4-11) Egyptenimit qaaqquneqarpoq (Hosea 11:1; Matthæusi 2:15) aamma saarngi nallornagit toqutaavoq. (Tussiaat 34:21; Johannesi 19:33, 36) Jiisusip nammineerluni Missiarsimik siulittuutinik tamanik eqquutititsinnissaa ajornarluinnarpoq. *

● Guutip nammineq uppernarsaanera. Jiisusip inunngornerata nalaani Guuti inngilinik aallartitsivoq savanik paarsisunik nalunaariartortitsilluni Missiarsi inunngorsimasoq. (Lukasi 2:10-14) Jiisusip kiffartornerata nalaani Guuti arlaleriarluni Jiisusimik iluarinninnini ersersillugu qilammiit oqaluppoq. (Matthæusi 3:16, 17; 17:1-5) Jiisusip Missiarsiuneranik ersersitsisumik Jehovap Jiisusi tupinnartuliungaarsinnaatippaa. — Apustilit Suliaat 10:38.

 APEQQUT: Sooq Jiisusi naalliullunilu toqusariaqarpa?

AKISSUT: Jiisusi ajorteqannginnami naalliuttariaqanngikkaluarpoq. Aamma pinerluttupalaatut nappakkamut kikiattugaasariaqanngikkaluarlunilu mitaatigineqarluni toqutaasariaqanngikkaluarpoq. Taamaakkaluartorli Jiisusip ajortumik pineqarnissani nalunngilaa piumassuseqarlunilu akueralugu. — Matthæusi 20:17-19; 1 Petrusi 2:21-23.

Inuit ajortuliaannik saammaanniarlugit Missiarsi naalliulluni toqusariaqarnera Missiarsimik siulittuutini allaaserineqarpoq. (Esaja 53:5; Danieli 9:24, 26) Jiisusi nammineq oqarpoq tikiukkuni ‘inuunini akissatut tunniutissallugu amerlasuut utertinneqaatissaattut’. (Matthæusi 20:28) Pilliutitut toqunera inunnut saammaannartitsisinnaaneranik upperinnittut toqumik ajortimillu annaanneqarsinnaapput nunamilu paratiisiusumi naassaanngitsumik inuusinnaassallutik. * — Johannesi 3:16; 1 Johannesi 4:9, 10.

APEQQUT: Ilumut Jiisusip toqumit makititaanera upperisinnaavarput?

AKISSUT: Aap. Jiisusip toqumit makititaajumaarnini upperilluinnarpaa. (Matthæusi 16:21) Maluginiarnarpoq Jiisusi Biibilimilluunniit allattut isumaqarmata makititsineq tupinnartuliakkut taamaallaat pisinnaasoq. Tamatumani Guuti akuusariaqarpoq. Biibilimi allassimavoq: ‘Guutip toqup annernartui kipitillugit toqusunit makitikkaa.’ (Apustilit Suliaat 2:24) Guuteqarnera taannalu tamanik pinngortitsisuunera akuerigutsigu, taava aamma ernini toqumit makitissinnaagaa upperinissaanut tunngavissaqarpugut. — Hebræerit 3:4.

Jiisusip makititaasimaneranik tutsuiginartunik uppernarsaatissaqarpa? Tulliuttut maluginiakkit.

● Isiginnittut. Jiisusip toqunerata kingorna ukiut 22-t missaat qaangiuttut apustili Paulusi allappoq inuit 500-nit amerlanerusut Jiisusi makissimasoq takusimagaat, tamannalu pillugu Paulusi allammat amerlanersaat suli inuupput. (1 Korinthimiut 15:6) Immaqa ataatsip marlulluunniit takunnissimasorinninnerat assortorneqarsinnaavoq, isiginnittulli 500-t kia assortorsinnaavai?

● Nalunaajaasut tutsuiginartut. Jiisusip ajoqersugaasa siulliit — susoqarsimaneranik ilisimasaqarluartut — Jiisusi makititaasimasoq sapiillutik oqaluussissutigaat. (Apustilit Suliaat 2:29-32; 3:13-15) Aap, isumaqarput taassuma makititaanera kristumiut upperisaannut tunngaviusoq. (1 Korinthimiut 15:12-19) Ajoqersukkat taakkua Jiisusimut uppernerminnik iperaanissaminngarnit toqorusunnerupput. (Apustilit Suliaat 7:51-60; 12:1, 2) Sallu pillugu toqorusuttumik ilisarisimasaqarpit?

Jiisusi pillugu apeqqutit pingaarutillit arfinillit Biibilimi akineqartut sammereerpavut. Akissutit taakkua Jiisusip kinaaneranik ersarissumik paasitippaatigut. Akissutilli taakku ilumut pingaaruteqarpat? Allatut oqaatigalugu, Jiisusi pillugu qanoq upperisaqarnerit pingaaruteqarpa?

[Quppernerup ataani ilanngussat]