ចម្លើយចំពោះសំណួររបស់យើងស្ដីអំពីលោកយេស៊ូ
ចម្លើយចំពោះសំណួររបស់យើងស្តីអំពីលោកយេស៊ូ
«តើបណ្ដាជនថាខ្ញុំជាអ្នកណា?»។—លូកា ៩:១៨
លោកយេស៊ូបានសួរសំណួរនេះ ដោយសារលោកបានដឹងថាបណ្ដាជនមានទស្សនៈផ្សេងៗស្តីអំពីលោក។ ប៉ុន្តែ គ្មានមូលហេតុដែលធ្វើឲ្យពួកគេយល់ច្រឡំអំពីលោកទេ ព្រោះលោកយេស៊ូមិនបានផ្ដាច់ខ្លួនពីអ្នកដទៃ ឬធ្វើអ្វីដោយសម្ងាត់ឡើយ។ ផ្ទុយទៅវិញ លោកបានដើរសំណេះសំណាលជាមួយនឹងមនុស្សនៅក្នុងភូមិ និងក្នុងទីក្រុងរបស់ពួកគេ។ លោកបានផ្សព្វផ្សាយ និងបង្រៀនមនុស្សនៅទីសាធារណៈ ពីព្រោះលោកចង់ឲ្យមនុស្សស្គាល់សេចក្ដីពិតអំពីលោក។—លូកា ៨:១
យើងអាចដឹងសេចក្ដីពិតអំពីលោកយេស៊ូតាមរយៈពាក្យសម្ដីនិងការប្រព្រឹត្តរបស់លោក ដែលបានកត់ទុកនៅក្នុងសៀវភៅដំណឹងល្អទាំងបួនក្នុងគម្ពីរគឺម៉ាថាយ ម៉ាកុស លូកា និងយ៉ូហាន។ កំណត់ហេតុដែលបានត្រូវសរសេរក្រោមការដឹកនាំរបស់ព្រះនេះគឺជាមូលដ្ឋានសម្រាប់ចម្លើយចំពោះសំណួររបស់យើង ស្តីអំពីលោកយេស៊ូ។—យ៉ូហាន ១៧:១៧
សំណួរ: តើពិតជាធ្លាប់មានលោកយេស៊ូឬទេ?
ចម្លើយ: ពិតជាធ្លាប់មាន។ ប្រវត្ដិវិទូជាច្រើន រួមមានយ៉ូសេហ្វឺស និង ថាស៊ីថឹសដែលរស់នៅសតវត្សរ៍ទី១ បានបញ្ជាក់ថាលោកយេស៊ូជាបុគ្គលម្នាក់ដែលលេចធ្លោក្នុងទំព័រប្រវត្ដិសាស្ត្រ។ សំខាន់ជាងនោះទៅទៀត សៀវភៅដំណឹងល្អទាំងនោះបានបញ្ជាក់តាមរបៀបដែលនាំឲ្យយើងជឿជាក់ថាលោកយេស៊ូជាបុគ្គលមួយពិតមែន មិនមែនជាតួអង្គមួយដែលគេប្រឌិតឡើងឡើយ។ កំណត់ហេតុនោះបានបញ្ជាក់យ៉ាងចំៗនិងល្អិតល្អន់អំពីពេលវេលានិងទីកន្លែង។ ជាឧទាហរណ៍ លូកាដែលជាអ្នកសរសេរសៀវភៅដំណឹងល្អបានរៀបរាប់អំពីអ្នកគ្រប់គ្រង៧នាក់ ពេលដែលគាត់បញ្ជាក់អំពីឆ្នាំដែលលោកយេស៊ូចាប់ផ្ដើមកិច្ចបម្រើរបស់លោក ហើយប្រវត្ដិវិទូបានផ្ដល់ទីសំអាងថាមានឈ្មោះទាំងនោះមែន។—លូកា ៣:១, ២, ២៣
ទីសំអាងគឺពិតជាគួរឲ្យជឿជាក់មែនដែលថាធ្លាប់មានលោកយេស៊ូ។ សៀវភៅមួយបានរៀបរាប់ថា៖ «ប្រវត្ដិវិទូភាគច្រើនទទួលស្គាល់ថា បុរសម្នាក់ដែលត្រូវគេស្គាល់ជាយេស៊ូពីក្រុងណាសារ៉ែត ពិតជាបានរស់នៅសតវត្សរ៍ទី១មែន» (Evidence for the Historical Jesus)។
សំណួរ: តើលោកយេស៊ូជាព្រះឬ?
ចម្លើយ: មិនមែនទេ។ លោកយេស៊ូមិនដែលចាត់ទុកថាខ្លួនស្មើនឹងព្រះទេ។ ផ្ទុយទៅវិញ លោកយេស៊ូបានបង្ហាញម្ដងហើយម្ដងទៀតថាលោកមានឋានៈទាបជាងព្រះយេហូវ៉ា។ * ជាឧទាហរណ៍ លោកយេស៊ូបានហៅព្រះយេហូវ៉ាថា៖ ‹ព្រះរបស់ខ្ញុំអើយ!› និង«ព្រះពិតតែមួយ»។ (ម៉ាថាយ ២៧:៤៦; យ៉ូហាន ១៧:៣) មានតែអ្នកដែលមានឋានៈទាបជាងបុគ្គលម្នាក់ទៀតទេ ទើបអាចប្រើពាក្យនេះបាន។ បុគ្គលម្នាក់ហៅចៅហ្វាយរបស់គាត់ថា«ចៅហ្វាយរបស់ខ្ញុំ» គឺបញ្ជាក់ច្បាស់ថាគាត់ដាក់ខ្លួនក្នុងឋានៈទាបជាងចៅហ្វាយ។
លោកយេស៊ូក៏បានបញ្ជាក់ថាលោកជាបុគ្គលម្នាក់ផ្សេងពីព្រះ។ នៅពេលមួយ លោកយេស៊ូបានមានប្រសាសន៍ទៅកាន់អ្នកដែលប្រឆាំងនឹងអំណាចរបស់លោកថា៖ «ច្បាប់របស់អ្នករាល់គ្នាចែងថា៖ ‹ការបញ្ជាក់របស់សាក្សីពីរនាក់គឺជាការពិត›។ មួយគឺខ្ញុំ ដែលបញ្ជាក់អំពីខ្លួនខ្ញុំ ហើយមួយទៀតគឺបិតានៅស្ថានសួគ៌ ដែលបានចាត់ខ្ញុំឲ្យមក លោកក៏បញ្ជាក់អំពីខ្ញុំដែរ»។ (យ៉ូហាន ៨:១៧, ១៨) លោកយេស៊ូត្រូវតែជាបុគ្គលមួយផ្សេងពីព្រះយេហូវ៉ា។ បើមិនដូច្នេះទេ តើលោកយេស៊ូអាចបញ្ជាក់ថាមានសាក្សីពីរនាក់យ៉ាងដូចម្ដេចបាន?
សំណួរ: តើលោកយេស៊ូគ្រាន់តែជាមនុស្សល្អម្នាក់ឬ?
ចម្លើយ: មិនមែនទេ។ លោកបានធ្វើអ្វីដែលលើសពីការល្អទៅទៀត។ លោកយេស៊ូបានដឹងថាលោកបានបំពេញតួនាទីដ៏សំខាន់មួយចំនួនក្នុងការធ្វើតាមបំណងប្រាថ្នារបស់ព្រះ។ តួនាទីទាំងនោះមានដូចជា:
● «បុត្រតែមួយរបស់ព្រះ»។ (យ៉ូហាន ៣:១៨) លោកយេស៊ូបានដឹងអំពីដើមកំណើតរបស់លោក។ តាមពិត លោកមានជីវិតជាយូរយារមុនលោកកើតនៅផែនដី។ លោកបានពន្យល់ថា៖ «ខ្ញុំបានចុះមកពីស្ថានសួគ៌»។ (យ៉ូហាន ៦:៣៨) ព្រះបានបង្កើតលោកយេស៊ូមុនគេបង្អស់ ហើយលោកបានជួយព្រះដើម្បីបង្កើតអ្វីៗទាំងអស់។ ដោយសារលោកយេស៊ូជាបុគ្គលតែម្នាក់ដែលព្រះបានបង្កើតដោយផ្ទាល់ នោះគេអាចហៅលោកយ៉ាងត្រឹមត្រូវថា៖ «បុត្រតែមួយរបស់ព្រះ»។—យ៉ូហាន ១:៣, ១៤; កូឡុស ១:១៥, ១៦
● «កូនមនុស្ស»។ (ម៉ាថាយ ៨:២០) ជាច្រើនដង លោកយេស៊ូបានហៅខ្លួនលោកថា៖ «កូនមនុស្ស» ហើយពាក្យនេះមាននៅក្នុងសៀវភៅដំណឹងល្អទាំងបួនប្រហែល៨០ដង។ ពាក្យនេះបានបញ្ជាក់ថាលោកជាមនុស្សសុទ្ធសាធ ហើយមិនមែនជាព្រះដែលបានកាឡាខ្លួនធ្វើជាមនុស្សទេ។ តើបុត្រតែមួយរបស់ព្រះបានកើតជាមនុស្សតាមរបៀបណា? ដោយសារសកម្មពលបរិសុទ្ធ ព្រះយេហូវ៉ាបានបញ្ជូនជីវិតបុត្ររបស់លោកឲ្យបង្កកំណើតនៅក្នុងផ្ទៃនៃស្ត្រីជនជាតិយូដាម្នាក់ដែលជាក្រមុំបរិសុទ្ធ។ ជាលទ្ធផល លោកយេស៊ូបានកើតមកជាមនុស្សល្អឥតខ្ចោះ និងគ្មានភាពខុសឆ្គងទេ។—ម៉ាថាយ ១:១៨; លូកា ១:៣៥; យ៉ូហាន ៨:៤៦
● «លោកគ្រូ»។ (យ៉ូហាន ១៣:១៣) លោកយេស៊ូបានបង្ហាញយ៉ាងច្បាស់ថាកិច្ចការដែលព្រះបានប្រគល់ឲ្យលោកគឺ «បង្រៀន . . . និងផ្សព្វផ្សាយដំណឹងល្អអំពីរាជាណាចក្រ»។ (ម៉ាថាយ ៤:២៣; លូកា ៤:៤៣) លោកបានពន្យល់យ៉ាងច្បាស់និងស្រួលយល់ថា តើរាជាណាចក្ររបស់ព្រះជាអ្វី? ហើយតើរាជាណាចក្រនោះនឹងធ្វើអ្វីខ្លះដើម្បីសម្រេចបំណងប្រាថ្នារបស់ព្រះយេហូវ៉ា?—ម៉ាថាយ ៦:៩,១០
● «បណ្ដាំ»។ (យ៉ូហាន ១:១) ពេលព្រះប្រាប់ព័ត៌មានអ្វីមួយឬផ្ដល់ការណែនាំដល់អ្នកឯទៀត លោកយេស៊ូជាអ្នកនាំពាក្យរបស់លោក។ ព្រះយេហូវ៉ាបានប្រើលោកយេស៊ូដើម្បីនាំពាក្យរបស់លោកមកប្រាប់មនុស្សនៅផែនដី។—យ៉ូហាន ៧:១៦, ១៧
សំណួរ: តើលោកយេស៊ូជាមេស្ស៊ីដែលព្រះបានសន្យាចាត់ឲ្យមកមែនឬ?
ចម្លើយ: មែន។ គម្ពីរបានទាយអំពីមេស្ស៊ីដែលនឹងត្រូវមក ឬគ្រិស្តដែលមានន័យថា«អ្នកដែលព្រះបានរើសតាំង»។ អ្នកដែលបានត្រូវសន្យានេះនឹងមានតួនាទីដ៏សំខាន់មួយក្នុងការសម្រេចបំណងប្រាថ្នារបស់ព្រះ។ នៅពេលមួយ ស្ត្រីសាសន៍សាម៉ារីម្នាក់បានប្រាប់លោកយេស៊ូថា៖ «ខ្ញុំដឹងថាមេស្ស៊ីដែលគេហៅថាគ្រិស្តនឹងមកដល់»។ លោកយេស៊ូបានប្រាប់នាងចំៗថា៖ «ខ្ញុំដែលកំពុងនិយាយជាមួយនឹងនាង គឺជាលោកនោះហើយ»។—យ៉ូហាន ៤:២៥, ២៦
តើមានភ័ស្តុតាងអ្វីដែលបង្ហាញថាលោកយេស៊ូជាមេស្ស៊ីនោះ? មានទីសំអាងបីដែលរួមគ្នាផ្ដល់ជាភ័ស្តុតាងយ៉ាងជាក់ស្តែងអំពីលោកយេស៊ូ ប្រៀបដូចជាស្នាមក្រយៅដៃរបស់មនុស្សដែលបញ្ជាក់អំពីអត្តសញ្ញាណរបស់បុគ្គលតែម្នាក់ប៉ុណ្ណោះ។ តើភ័ស្តុតាងទាំងបីនោះបញ្ជាក់ថាលោកយេស៊ូជាមេស្ស៊ីឬទេ? សូមពិចារណាដូចតទៅ:
● សែស្រឡាយរបស់លោក។ គម្ពីរបានទាយថាមេស្ស៊ីនឹងត្រូវជាកូនចៅរបស់អាប្រាហាំ តាមរយៈសែស្រឡាយរបស់ក្រុមគ្រួសារដាវីឌ។ (លោកុប្បត្តិ ២២:១៨; ទំនុកតម្កើង ១៣២:១១, ១២) លោកយេស៊ូជាកូនចៅរបស់ពួកគាត់ទាំងពីរនាក់មែន។—ម៉ាថាយ ១:១-១៦; លូកា ៣:២៣-៣៨
● ទំនាយដែលបានសម្រេច។ បទគម្ពីរភាសាហេប្រឺមានទំនាយជាច្រើនអំពីជីវិតរបស់មេស្ស៊ីពេលលោកនៅផែនដី ដែលរួមបញ្ចូលព័ត៌មានយ៉ាងល្អិតល្អន់អំពីកំណើតនិងមរណៈភាពរបស់លោក។ លោកយេស៊ូបានសម្រេចទំនាយទាំងអស់នោះ។ ក្នុងចំណោមទំនាយទាំងនោះ មានដូចជា: លោកបានកើតនៅក្រុងបេថ្លេហិម (មីកា ៥:១; លូកា ២:៤-១១) លោកបានត្រូវហៅឲ្យចេញពីស្រុកអេស៊ីប (ហូសេ ១១:១; ម៉ាថាយ ២:១៥) ហើយលោកត្រូវគេសម្លាប់ដោយមិនបំបាក់ឆ្អឹងណាមួយឡើយ។ (ទំនុកតម្កើង ៣៤:២០; យ៉ូហាន ១៩:៣៣, ៣៦) លោកយេស៊ូពិតជាមិនអាចធ្វើឲ្យព្រឹត្ដិការណ៍ទាំងនោះកើតឡើងក្នុងជីវិតរបស់លោកដើម្បីសម្រេចទំនាយទាំងអស់ស្តីអំពីមេស្ស៊ីឡើយ។ *
● ការបញ្ជាក់ពីព្រះផ្ទាល់។ នៅពេលលោកយេស៊ូកើតមក ព្រះបានចាត់ពួកទេវតាឲ្យប្រាប់ដល់ពួកគង្វាលថា មេស្ស៊ីបានកើតមកហើយ។ (លូកា ២:១០-១៤) អស់ប៉ុន្មានដង ក្នុងអំឡុងពេលលោកយេស៊ូបំពេញកិច្ចបម្រើ ព្រះបានមានប្រសាសន៍ពីស្ថានសួគ៌ដែលបញ្ជាក់ថាលោកពេញចិត្តនឹងលោកយេស៊ូ។ (ម៉ាថាយ ៣:១៦, ១៧; ១៧:១-៥) ព្រះយេហូវ៉ាបានឲ្យលោកយេស៊ូមានឫទ្ធានុភាពធ្វើការអស្ចារ្យ ដើម្បីបង្ហាញភ័ស្តុតាងកាន់តែច្រើនថែមទៀតថាលោកយេស៊ូជាមេស្ស៊ី។—សកម្មភាព ១០:៣៨
សំណួរ: ហេតុអ្វីលោកយេស៊ូត្រូវរងទុក្ខនិងស្លាប់?
ចម្លើយ: ដោយសារលោកយេស៊ូជាបុរសដែលគ្មានភាពខុសឆ្គង នោះលោកមិនសមនឹងរងទុក្ខទេ។ លោកក៏មិនសមនឹងឲ្យគេដំដែកគោលព្យួរនៅលើបង្គោលទារុណកម្មដែលជាវិធីសម្លាប់ឧក្រិដ្ឋជន រួចទុកឲ្យស្លាប់ដោយគ្មានកិត្ដិយសបែបនោះដែរ។ ទោះជាយ៉ាងនោះក៏ដោយ លោកយេស៊ូបានដឹងទុកជាមុនអំពីរឿងទាំងនេះ ហើយលោកសុខចិត្តទទួល។—ម៉ាថាយ ២០:១៧-១៩; ពេត្រុសទី១ ២:២១-២៣
ទំនាយអំពីមេស្ស៊ីបានទាយថា មេស្ស៊ីត្រូវរងទុក្ខនិងស្លាប់ដើម្បីជម្រះភាពខុសឆ្គងរបស់មនុស្សឯទៀត។ (អេសាយ ៥៣:៥; ដានីយ៉ែល ៩:២៤, ២៦) លោកយេស៊ូបានមានប្រសាសន៍ថា លោកបានមកដើម្បី«ឲ្យជីវិតខ្លួនជាថ្លៃលោះមនុស្សជាច្រើន»។ (ម៉ាថាយ ២០:២៨) ពួកអ្នកដែលបង្ហាញជំនឿលើជីវិតរបស់លោកយេស៊ូដែលទុកជាថ្លៃលោះមានឱកាសដើម្បីរួចផុតពីភាពខុសឆ្គង និងសេចក្ដីស្លាប់ ហើយមានជីវិតដែលគ្មានទីបញ្ចប់នៅផែនដីជាសួនឧទ្យាន។ *—យ៉ូហាន ៣:១៦; យ៉ូហានទី១ ៤:៩, ១០
សំណួរ: តើយើងអាចជឿបានទេថាលោកយេស៊ូបានត្រូវប្រោសឲ្យរស់ឡើងវិញ?
ចម្លើយ: ជឿបាន។ លោកយេស៊ូបានដឹងយ៉ាងច្បាស់ថា លោកនឹងត្រូវប្រោសឲ្យរស់ឡើងវិញ។ (ម៉ាថាយ ១៦:២១) ក៏ប៉ុន្តែ ជាការសំខាន់ឲ្យយើងកត់សម្គាល់ថា លោកយេស៊ូ និងបទគម្ពីរមិនបានអះអាងថាលោកនឹងត្រូវរស់ឡើងវិញដោយកម្លាំងធម្មជាតិទេ។ គំនិតបែបនេះគឺហួសពីការជឿរបស់យើងឆ្ងាយណាស់។ ផ្ទុយទៅវិញ គម្ពីរបានចែងថា៖ «ព្រះបានប្រោសលោកឲ្យរស់ឡើងវិញ ដោយស្រាយចំណងនៃសេចក្ដីស្លាប់»។ (សកម្មភាព ២:២៤) បើយើងទទួលស្គាល់ថាមានព្រះ ហើយថាលោកជាអ្នកបង្កើតអ្វីៗទាំងអស់ នោះយើងមានមូលហេតុគ្រប់គ្រាន់ដើម្បីជឿថា លោកអាចប្រោសបុត្ររបស់លោកឲ្យរស់ឡើងវិញបាន។—ហេប្រឺ ៣:៤
តើមានភ័ស្តុតាងដែលគួរឲ្យជឿថាលោកយេស៊ូបានត្រូវប្រោសឲ្យរស់ឡើងវិញឬទេ? សូមពិចារណាចំណុចដូចតទៅ:
● សក្ខីភាពរបស់មនុស្សដែលឃើញផ្ទាល់ភ្នែក។ ប្រហែល២២ឆ្នាំក្រោយលោកយេស៊ូស្លាប់ សាវ័កប៉ូលបានសរសេរថា ធ្លាប់មានសាក្សីជាង៥០០នាក់ដែលបានឃើញលោកយេស៊ូរស់ឡើងវិញ ហើយថាពួកគេភាគច្រើននៅរស់នៅឡើយពេលដែលប៉ូលសរសេរគម្ពីរ។ (កូរិនថូសទី១ ១៥:៦) បើមានសាក្សីតែម្នាក់ឬពីរនាក់ គេអាចមិនយកជាការបាន ប៉ុន្តែតើអ្នកណាអាចបដិសេធចំពោះសក្ខីភាពរបស់មនុស្ស៥០០នាក់បាន?
● សាក្សីដែលគួរឲ្យជឿ។ នៅសម័យដើម ពួកសាវ័ករបស់លោកយេស៊ូដឹងច្បាស់ជាងគេអំពីអ្វីដែលពិតជាបានកើតឡើង ហើយពួកគេបានប្រកាសដោយចិត្តក្លាហានថា លោកយេស៊ូបានត្រូវប្រោសឲ្យរស់ឡើងវិញ។ (សកម្មភាព ២:២៩-៣២; ៣:១៣-១៥) តាមការពិត ពួកគេមានទស្សនៈថា គ្រិស្តសាសនិកទាំងឡាយត្រូវតែជឿថាលោកយេស៊ូបានត្រូវប្រោសឲ្យរស់ឡើងវិញ។ (កូរិនថូសទី១ ១៥:១២-១៩) សាវ័កទាំងនោះបានសុខចិត្តស្លាប់ជាជាងបោះបង់ចោលជំនឿរបស់ពួកគេចំពោះលោកយេស៊ូ។ (សកម្មភាព ៧:៥១-៦០; ១២:១, ២) តើអ្នកស្គាល់នរណាម្នាក់ដែលសុខចិត្តស្លាប់ដើម្បីគាំទ្រអ្វីដែលពួកគេដឹងថាមិនមែនជាការពិតឬទេ?
យើងបានពិចារណាអំពីចម្លើយពីគម្ពីរចំពោះសំណួរដ៏សំខាន់៦ស្តីអំពីលោកយេស៊ូ។ ចម្លើយទាំងនោះបានប្រាប់យើងយ៉ាងច្បាស់អំពីលោកយេស៊ូ។ ប៉ុន្តែតើការដឹងឬមិនដឹងចម្លើយទាំងនោះពិតជាសំខាន់ឬទេ? បើនិយាយក្នុងន័យម្យ៉ាងទៀត តើអ្វីដែលលោកអ្នកជឿអំពីលោកយេស៊ូជាការសំខាន់ឬ?
[កំណត់សម្គាល់]
^ វគ្គ 9 ក្នុងគម្ពីរ យេហូវ៉ាជានាមរបស់ព្រះ។
^ វគ្គ 21 ដើម្បីដឹងអំពីទំនាយខ្លះៗដែលលោកយេស៊ូបានសម្រេច សូមមើលទំព័រ២៣១នៃសៀវភៅតើព្រះគម្ពីរពិតជាបង្រៀនយ៉ាងណា?
^ វគ្គ 25 ដើម្បីទទួលព័ត៌មានបន្ថែមអំពីថ្លៃលោះរបស់លោកយេស៊ូ សូមមើលជំពូកទី៥នៃសៀវភៅតើព្រះគម្ពីរពិតជាបង្រៀនយ៉ាងណា?
