“Ken e multitut ta bisa ku mi ta?”—LUKAS 9:18.

HESUS a hasi su disipelnan e pregunta akí pasobra e tabata sa ku hende tabatin diferente opinion tokante dje. Sinembargo, hende no tabatin nodi di duda ken Hesukristu ta. Dikon? Pasobra Hesus nunka a skonde su identidat ni a hasi nada den sekreto. El a anda abiertamente ku tur sorto di hende, den nan pueblo- i nan statnan. El a prediká públikamente pasobra e tabata ke pa hende sa ken e ta.—Lukas 8:1.

Pues, si nos analisá Hesus su palabra- i su echonan ku ta registrá den e kuater Evangelionan di Beibel—Mateo, Marko, Lukas i Huan—nos por haña sa ken e tabata realmente. Ta den e Evangelionan nos ta haña kontesta pa e preguntanan ku nos por tin enkuanto Hesus.—Huan 17:17.

PREGUNTA: Hesus a yega di eksistí bèrdat?

KONTESTA: Sí. Historiadónan, manera Hosefo i Tásito di promé siglo, ta menshoná Hesus komo un persona ku a yega di eksistí. Mas importante ainda, e Evangelionan ta duna prueba konvinsente ku Hesus a eksistí di bèrdat i ku e no ta un figura fiktisio. Nan ta duna detayenan spesífiko i ta menshoná lugánan i fechanan eksakto. Lukas por ehèmpel, un eskritor di Evangelio, ta menshoná shete persona ku tabata goberná den tempu di Hesus, i historiadónan ta konfirmá esaki menshonando nan nòmber. Lukas a duna e detayenan akí pa hende por sa den ki aña Hesus a kuminsá su sirbishi.—Lukas 3:1, 2, 23.

Tin hopi prueba ku Hesus di bèrdat a yega di eksistí. E buki Evidence for the Historical Jesus ta bisa ku “mayoria di eskolástiko ta atmití ku e hòmber konosí komo Hesus di Názarèt di bèrdat a biba den promé siglo.”

PREGUNTA: Ta Hesus mes ta Dios?

KONTESTA: Nò. Nunka Hesus a konsiderá su mes igual ku Dios. Al kontrario, Hesus tabata sumiso na Yehova, * i bes tras bes el a demostrá esei. Por  ehèmpel, Hesus a referí na Yehova komo “mi Dios” i “e úniko Dios berdadero.” (Mateo 27:46; Huan 17:3) Ta un persona sumiso so lo usa e ekspreshonnan ei. Por ehèmpel, un trahadó ku ta usa e ekspreshon “mi hefe” òf “esun ku ta na enkargo” ta indiká ku su doño di trabou tin un puesto mas haltu kuné.

Ademas, Hesus a mustra ku e tabata distinto for di Dios. Na un okashon, el a bisa hende ku a kuestioná su outoridat: “Den boso Lei mes ta pará skirbí: ‘Si tin dos testigu, e asuntu ta bèrdat.’ Ami ta duna testimonio tokante mi mes, i e Tata ku a manda mi tambe ta duna testimonio tokante mi.” (Huan 8:17, 18) Pues, Hesus mester ta distinto for di Yehova, sino kon nan por ta dos testigu?

PREGUNTA: Hesus tabata djis un bon hende?

KONTESTA: Nò. E tabata muchu mas ku esei. Hesus tabata konsiente di vários papel importante ku e mester a desempeñá den realisashon di Dios su propósito. At’akí algun ehèmpel:

● “Yu unigénito di Dios.” (Huan 3:18) Hesus tabata sa di unda el a bini. Bon mirá, e tabata eksistí hopi tempu promé ku el a bini na tera. El a bisa: ‘Mi a baha for di shelu.’ (Huan 6:38) Hesus tabata e promé kreashon di Dios, i el a yuda traha tur otro kos. Hesus ta e úniko persona ku Dios a krea sin yudansa di ningun otro persona. P’esei e ta ser yamá “e Yu unigénito di Dios.”—Huan 1:3, 14; Kolosensenan 1:15, 16.

● “Yu di hende.” (Mateo 8:20) Hopi biaha Hesus a referí na su mes komo “e Yu di hende,” i e ekspreshon akí ta aparesé un 80 biaha den e Evangelionan. E ekspreshon “Yu di hende” ta mustra bon kla ku Hesus tabata un ser humano i no Dios den karni. Pero kon e Yu unigénito di Dios por a nase komo hende? Wèl, pa medio di spiritu santu, Yehova a transferí e bida di su Yu for di shelu pa e matris di e bírgen Maria, kende tabata un hudiu. P’esei, Hesus a nase perfekto i sin piká.—Mateo 1:18; Lukas 1:35; Huan 8:46.

● “Maestro.” (Huan 13:13) Hesus a bisa ku Dios a enkarg’é ku e trabou di ‘siña hende i di prediká e bon notisia’ tokante e Reino di Dios. (Mateo 4:23; Lukas 4:43) Anto na un manera masha kla i simpel, el a splika kiko e Reino di Dios ta i kon e Reino ei lo realisá e boluntat di Dios.—Mateo 6:9, 10.

● “E Palabra.” (Huan 1:1) Hesus tabata e Bosero di Dios—e medio ku Dios a usa pa duna informashon i instrukshon na otro hende. Yehova a usa Hesus pa hiba Su mensahe pa hende riba tera.—Huan 7:16, 17.

PREGUNTA: Hesus tabata e Mesías primintí?

KONTESTA: Sí. Beibel a profetisá e binida di e Mesías, òf Kristu, ku ta nifiká “Esun Ungí.” E Mesías primintí lo a hunga un papel importante den kumplimentu di Yehova su propósito. Na un okashon, un muhé samaritano a bisa Hesus: “Mi sa ku e Mesías ta bini, esun ku yama Kristu.” Anto Hesus a bis’é: “T’e ta papia ku bo aki.”—Huan 4:25, 26.

Awor, tin prueba ku Hesus en bèrdat tabata e Mesías? Sí, tin tres liña di evidensia ku huntu ta forma un patronchi úniko komparabel ku un fingerprint ku ta identifiká ún persona so. Hesus su bida ta kuadra ku e patronchi akí? Laga nos ban wak.

 ● Su liña di desendensia. Beibel a profetisá ku e Mesías lo ta un desendiente di Abraham ku mester a bini for di e liña di desendensia di David. (Génesis 22:18; Salmo 132:11, 12) Hesus tabata desendiente di tantu Abraham komo David.—Mateo 1:1-16; Lukas 3:23-38.

● Kumplimentu di profesia. E Skritura Hebreo ta kontené desénas di profesia tokante e Mesías su bida riba tera, inkluso detaye tokante su nasementu i morto. Tur e profesianan akí a kumpli den Hesus. Por ehèmpel, Hesus a nase na Bètlehèm; (Mikéas 5:2; Lukas 2:4-11) el a ser yamá for di Egipto (Oséas 11:1; Mateo 2:15) i a ser ehekutá sin ku nan a kibra ningun di su wesunan (Salmo 34:20; Huan 19:33, 36). Pues, ta imposibel ku Hesus por a maniobrá asuntunan di tal forma ku tur profesia tokante e Mesías a kumpli den su persona. *

● Dios mes a testiguá tokante dje. Ora Hesus a nase, Dios a manda angel pa informá e wardadónan di karné ku e Mesías a nase. (Lukas 2:10-14) I na diferente okashon durante Hesus su sirbishi, Dios mes a papia for di shelu i a ekspresá ku Hesus tabatin su aprobashon. (Mateo 3:16, 17; 17:1-5) Ademas, Yehova a duna Hesus poder pa hasi milager, i esaki a duna mas prueba ku Hesus tabata e Mesías.—Echonan 10:38.

PREGUNTA: Dikon Hesus tabatin ku sufri i muri?

KONTESTA: Hesus no tabatin piká, pues e no a meresé di sufri. E no a meresé tampoko di ser klabá na un staka komo un kriminal ni muri na un manera bergonsoso. I aunke Hesus tabata sa ku lo el a ser maltratá, e no a resistí esaki.—Mateo 20:17-19; 1 Pedro 2:21-23.

Beibel a profetisá ku e Mesías lo mester a sufri i muri pa humanidat por haña pordon di piká. (Isaías 53:5; Daniel 9:24, 26) Hesus mes a bisa ku el a bini “pa duna su alma komo reskate a kambio di hopi hende.” (Mateo 20:28) Ken ku pone fe den Hesus i aseptá e balor di su sakrifisio di reskate tin e speransa di ser librá di piká i morto i di biba pa semper den Paradeis riba tera. *—Huan 3:16; 1 Huan 4:9, 10.

PREGUNTA: Di bèrdat Hesus a lanta for di morto?

KONTESTA: Sí. Hesus tabatin pleno konfiansa ku lo el a lanta for di morto. (Mateo 16:21) Pero ripará ku ni Hesus ni e eskritornan di Beibel no a bisa ku lo el a lanta for di morto di su mes. Hende lo no kere un kos asina. Beibel ta bisa: “Dios a resusit’é, librand’e for di e gara di morto.” (Echonan 2:24) Awor, si nos ta kere ku tin un Dios i un Kreador di tur kos, nos no tin motibu pa kere tambe ku e por a lanta su Yu for di morto?—Hebreonan 3:4.

Awor, tin prueba konvinsente ku Hesus a ser resusitá? Laga nos ban wak.

● Testimonio okular. Alrededor di 22 aña despues ku Hesus a muri, apòstel Pablo a skirbi ku tabatin mas ku 500 persona ku a mira Hesus despues di su resurekshon i ku mayoria di nan ainda tabata na bida ora ku Pablo a skirbi su karta. (1 Korintionan 15:6) Si ta ún òf dos hende so a mira Hesus despues di su resurekshon, lo tabata fásil pa nenga esaki, pero ken por desmentí testimonio di 500 hende?

● Testigunan konfiabel. E promé disipelnan di Hesus—kendenan tabatin e privilegio úniko di ta testigu okular—ku kurashi a prediká ku Dios a resusitá Hesus. (Echonan 2:29-32; 3:13-15) Pa nan, kere den e resurekshon di Hesus tabata algu di sumo importansia pa e fe kristian. (1 Korintionan 15:12-19) E disipelnan ei a preferá di muri ku renunsiá nan fe den Hesus. (Echonan 7:51-60; 12:1, 2) Abo konosé hende ku boluntariamente lo entregá nan bida pa algu ku nan sa ta un mentira?

Nos a kaba di mira kon Beibel ta kontestá seis pregunta klave tokante Hesus. E kontestanan ei ta revelá klaramente ken Hesus ta realmente. Pero e kontestanan ei ta importante? Ku otro palabra, ta importá loke nos ta kere tokante Hesus?

[Nota]