Hesucristo​—Contesta pa Nos Preguntanan

“Ken e multitud ta bisa cu mi ta?”​—LUCAS 9:18.

HESUS a haci su discipelnan e pregunta aki pasobra e tabata sa cu hende tabatin diferente opinion tocante dje. Sinembargo, hende no tabatin nodo di duda ken Hesucristo ta. Dicon? Pasobra Hesus nunca a sconde su identidad ni a haci nada den secreto. El a anda abiertamente cu tur sorto di hende, den nan pueblo- y nan stadnan. El a predica publicamente pasobra e tabata kier pa hende sa ken e ta.​—Lucas 8:1.

Pues, si nos analisa Hesus su palabra- y su echonan cu ta registra den e cuater Evangelionan di Bijbel​—Mateo, Marco, Lucas y Juan​—nos por haya sa ken e tabata realmente. Ta den e Evangelionan nos ta haya contesta pa e preguntanan cu nos por tin encuanto Hesus.​—Juan 17:17.

PREGUNTA: Hesus a yega di existi di berdad?

CONTESTA: Si. Historiadonan, manera Josefo y Tacito di prome siglo, ta menciona Hesus como un persona cu a yega di existi. Mas importante ainda, e Evangelionan ta duna prueba convencente cu Hesus a existi di berdad y cu e no ta un figura ficticio. Nan ta duna detayenan specifico y ta menciona luganan y fechanan exacto. Lucas por ehempel, un escritor di Evangelio, ta menciona shete persona cu tabata goberna den tempo di Hesus, y historiadonan ta confirma esaki mencionando nan nomber. Lucas a duna e detayenan aki pa hende por sa den ki aña Hesus a cuminsa su sirbishi.​—Lucas 3:1, 2, 23.

Tin hopi prueba cu Hesus di berdad a yega di existi. E buki Evidence for the Historical Jesus ta bisa cu “mayoria di escolastico ta admiti cu e homber conoci como Hesus di Nazaret di berdad a biba den prome siglo.”

PREGUNTA: Ta Hesus mes ta Dios?

CONTESTA: No. Nunca Hesus a considera su mes igual cu Dios. Al contrario, Hesus tabata sumiso na Jehova, * y bes tras bes el a demostra esey. Por  ehempel, Hesus a referi na Jehova como “mi Dios” y “e unico Dios berdadero.” (Mateo 27:46; Juan 17:3) Ta un persona sumiso so lo uza e expresionnan ey. Por ehempel, un trahado cu ta uza e expresion “mi hefe” of “esun cu ta na encargo” ta indica cu su doño di trabou tin un puesto mas halto cu ne.

Ademas, Hesus a mustra cu e tabata distinto for di Dios. Na un ocasion, el a bisa hende cu a cuestiona su autoridad: “Den boso Ley mes ta para skirbi: ‘Si tin dos testigo, e asunto ta berdad.’ Ami ta duna testimonio tocante mi mes, y e Tata cu a manda mi tambe ta duna testimonio tocante mi.” (Juan 8:17, 18) Pues, Hesus mester ta distinto for di Jehova, sino con nan por ta dos testigo?

PREGUNTA: Hesus tabata djis un bon hende?

CONTESTA: No. E tabata mucho mas cu esey. Hesus tabata consciente di varios papel importante cu e mester a desempeña den realisacion di Dios su proposito. Ata aki algun ehempel:

● “Yiu unigenito di Dios.” (Juan 3:18) Hesus tabata sa di unda el a bini. En realidad, e tabata existi hopi tempo prome cu el a bini na tera. El a bisa: ‘Mi a baha for di cielo.’ (Juan 6:38) Hesus tabata e prome creacion di Dios, y el a yuda Dios traha tur otro cos. Hesus ta e unico persona cu Dios a crea sin yudansa di ningun otro persona. Pesey e ta ser yama “e Yiu unigenito di Dios.”​—Juan 1:3, 14; Colosensenan 1:15, 16.

● “Yiu di hende.” (Mateo 8:20) Hopi biaha Hesus a referi na su mes como “e Yiu di hende”, y e expresion aki ta aparece un 80 biaha den e Evangelionan. E expresion “Yiu di hende” ta mustra bon cla cu Hesus tabata un ser humano y no Dios den carni. Pero con e Yiu unigenito di Dios por a nace como hende? Wel, pa medio di spirito santo, Jehova a transferi e bida di su Yiu for di cielo pa e matriz di e birgen Maria, kende tabata un Hudiu. Pesey, Hesus a nace perfecto y sin pica.​—Mateo 1:18; Lucas 1:35; Juan 8:46.

● “Maestro.” (Juan 13:13) Hesus a bisa cu Dios a encarg’e cu e trabou di ‘siña hende y di predica e bon noticia’ tocante e Reino di Dios. (Mateo 4:23; Lucas 4:43) Anto na un manera masha cla y simpel, el a splica kico e Reino di Dios ta y con e Reino ey lo cumpli cu e boluntad di Dios.​—Mateo 6:9, 10.

● “E Palabra.” (Juan 1:1) Hesus tabata e Vocero di Dios​—e medio cu Dios a uza pa duna informacion y instruccion na otro hende. Jehova a uza Hesus pa hiba Su mensahe pa hende riba tera.​—Juan 7:16, 17.

PREGUNTA: Hesus tabata e Mesias priminti?

CONTESTA: Si. Bijbel a profetisa e binida di e Mesias, of Cristo, cu ta nifica “Esun Ungi.” E Mesias priminti lo a hunga un papel importante den cumplimento di Jehova su proposito. Na un ocasion, un muher Samaritano a bisa Hesus: “Mi sa cu e Mesias ta bini, esun cu yama Cristo.” Anto Hesus a bis’e: “T’e ta papia cu bo aki.”​—Juan 4:25, 26.

Awor, tin prueba cu Hesus en berdad tabata e Mesias? Si, tin tres factor cu hunto ta forma un patronchi unico comparabel cu un fingerprint cu ta identifica un persona so. Hesus su bida ta cuadra cu e patronchi aki? Laga nos ban wak.

 ● Su liña di descendencia. Bijbel a profetisa cu e Mesias lo ta un descendiente di Abraham via e liña di descendencia di David. (Genesis 22:18; Salmo 132:11, 12) Hesus tabata descendiente di tanto Abraham como David.​—Mateo 1:1-16; Lucas 3:23-38.

● Cumplimento di profecia. E Scritura Hebreo ta contene decenas di profecia tocante e Mesias su bida riba tera, incluso detaye tocante su nacemento y morto. Tur e profecianan aki a cumpli den Hesus. Por ehempel, Hesus a nace na Betlehem; (Mikeas 5:2; Lucas 2:4-11) el a ser yama for di Egipto (Oseas 11:1; Mateo 2:15) y a ser ehecuta sin cu nan a kibra ningun di su wesonan (Salmo 34:20; Juan 19:33, 36). Pues, ta imposibel cu Hesus por a maniobra asuntonan di tal forma cu tur profecia tocante e Mesias a cumpli den su persona. *

● Dios mes a testigua tocante dje. Ora Hesus a nace, Dios a manda angel pa informa e wardadonan di carne cu e Mesias a nace. (Lucas 2:10-14) Y na diferente ocasion durante Hesus su sirbishi, Dios mes a papia for di cielo y a expresa cu Hesus tabatin su aprobacion. (Mateo 3:16, 17; 17:1-5) Ademas, Jehova a duna Hesus poder pa haci milager, y esaki a duna mas prueba cu Hesus tabata e Mesias.​—Echonan 10:38.

PREGUNTA: Dicon Hesus tabatin cu sufri y muri?

CONTESTA: Hesus no tabatin pica, pues e no a merece di sufri. E no a merece tampoco di ser claba na un staca como un criminal ni muri na un manera bergonsoso. Y aunke Hesus tabata sa cu lo el a ser maltrata, e no a resisti esaki.​—Mateo 20:17-19; 1 Pedro 2:21-23.

Bijbel a profetisa cu e Mesias lo mester a sufri y muri pa humanidad por haya pordon di pica. (Isaias 53:5; Daniel 9:24, 26) Hesus mes a bisa cu el a bini “pa duna su alma como rescate a cambio di hopi hende.” (Mateo 20:28) Ken cu pone fe den Hesus y acepta e balor di su sacrificio di rescate tin e speransa di ser libra di pica y morto y di biba pa semper den Paradijs riba tera. *​—Juan 3:16; 1 Juan 4:9, 10.

PREGUNTA: Di berdad Hesus a lanta for di morto?

CONTESTA: Si. Hesus tabatin pleno confianza cu lo el a lanta for di morto. (Mateo 16:21) Pero ripara cu ni Hesus ni e escritornan di Bijbel no a bisa cu lo el a lanta for di morto di su mes. Hende lo no kere un cos asina. Bijbel ta bisa: “Dios a resucit’e, librand’e for di e gara di morto.” (Echonan 2:24) Awor, si nos ta kere cu tin un Dios y un Creador di tur cos, nos no tin motibo pa kere tambe cu e por a lanta su Yiu for di morto?​—Hebreonan 3:4.

Awor, tin prueba convencente cu Hesus a ser resucita? Laga nos ban wak.

● Testimonio ocular. Alrededor di 22 aña despues cu Hesus a muri, apostel Pablo a skirbi cu tabatin mas cu 500 persona cu a mira Hesus despues di su resureccion y cu mayoria di nan ainda tabata na bida ora cu Pablo a skirbi su carta. (1 Corintionan 15:6) Si ta un of dos hende so a mira Hesus despues di su resureccion, lo tabata facil pa nenga esaki, pero ken por desmenti testimonio di 500 hende?

● Testigonan confiabel. E prome discipelnan di Hesus​—kendenan tabatin e privilegio unico di ta testigo ocular​—cu curashi a predica cu Dios a resucita Hesus. (Echonan 2:29-32; 3:13-15) Pa nan, kere den e resureccion di Hesus tabata algo di sumo importancia pa e fe cristian. (1 Corintionan 15:12-19) E discipelnan ey a prefera di muri i no renuncia nan fe den Hesus. (Echonan 7:51-60; 12:1, 2) Abo conoce hende cu boluntariamente lo entrega nan bida pa algo cu nan sa ta un mentira?

Nos a caba di mira con Bijbel ta contesta seis pregunta clave tocante Hesus. E contestanan ey ta revela claramente ken Hesus ta realmente. Pero e contestanan ey ta importante? Cu otro palabra, ta importa loke nos ta kere tocante Hesus?

[Nota]