Jesus Kristus​—A Nger er Aike el Kerid

“A re chad te kmo ngak ak techang?”​—LUKAS 9:18.

A JESUS a uleker er a redisaiplo er ngii er tia el ker, e le ngmle medengei el kmo ngkakerous a uldesuir a rechad el kirel. Engdi ngdimlak a ungil el uchul tia el rraurreng, e le Jesus a mle bleketakl a omerellel e dimlak lomart a tekoi el loruul. Ngmle blechoel el teloi er a rechad er aike el basio el leblo er ngii. Ngdirrek el ullisechakl er a delongelir a rebetok el chad e le ngmle soal a rechad a bo lodengelii a klemerang el kirel.​—Lukas 8:1.

A klemerang el kirel a Jesus a sebeched el mo medengei el okiu a tekingel me a omerellel el ngar er a chelsel a eua el babier er a Biblia el Matteus, Markus, Lukas me a Johanes. Ngsebeched el metik a nger er a kerid er a chelsel aika el babier.​—Johanes 17:17.

KER: A Jesus ngmera el mle chad er a irechar?

NGER: Chochoi. A rechad el milluches a reksi el kilie er a uriul er a kodellel a Jesus, el uldimukl er a Josephus me a Tacitus, a milsaod er a Jesus el kmo ngmera el mle chad er a irechar. Me a lmuut el tang, aike el Evangkelio a dirrek el ochotii el kmo ngii a mera el mle chad el dimlak di le cheldecheduch el chelid. Aika el babier a ouchais a taem me a basio el ledilubech aika el tekoi. El ua tiang, a Lukas a ulemasech a ngklir a reteuid el merreder el tir a mle chad er sel taem er a lomuchel er a omesiungel a Jesus.​—Lukas 3:1, 2, 23.

Ngar er ngii a kmal mesisiich el olechotel er a reksi el kmo a Jesus a mera el mle chad. A babier el Evidence for the Historical Jesus a kmo: “A ruumesingd el ngarbab a skulir el chad a kongei el kmo a Jesus er a Nazareth a mera el mle chad er a irechar.”

KER: A Jesus ng Dios?

NGER: Ngdiak. A Jesus a dimlak lomdasu el kmo ngdi osisiu ngii me a Dios. Ngbai mle blechoel el ouchais el kmo ngii a chederedall er a Jehovah. * El ua tiang, ngulemekedong er a Jehovah el kmo  “Dios er ngak” e “dital meral Dios.” (Matteus 27:46; Johanes 17:3) Ngdi chad el chederedall a ousbech a chouaika el tekoi, el ua chad er a ureor el omekedong er a merreder er ngii el kmo “merredelek.”

A Jesus a dirrek el ulechotii el kmo ngii a kuk ngodech el chad er a Dios. Ngmle ta el lolekoi er a rulemtok er ngii el kmo: “[Ng] llechukl ra llach er kemiu el kmo, chocholt rar terul chad a klemerang; ngak a di ngak lolecholt er ngak, me ngikel ulderchak el Chedam me ngdirrek lolecholt er ngak.” (Johanes 8:17, 18) Me a Jesus a kuk ngodech el chad er a Jehovah.

KER: A Jesus ngdi mle ungil chad e merekong?

NGER: Ngdiak. Ngdimlak el di lungil chad e lemerekong, ngmle betok a ngerachel el mle kirel el meruul me lemotaut a soal a Dios. Aikakid a bebil er ngii:

● “Dital Ngelekel a Dios.” (Johanes 3:18) A Jesus a medengei el kmo ngmla er ker er a uchei er a lemei er a chutem e le ngdilu el kmo: “Ngak a mlar a eanged el mei.” (Johanes 6:38) A Jesus a mle kot el blebelel a Dios e a uriul e ngulengeseu el omeob a rokui el bleob. Me a Dios a di mle ngii el mebii a Jesus a uchul me a Jesus a okedongall el kmo “dital Ngelekel a Dios.”​—Johanes 1:3, 14; Kolose 1:15, 16.

● “Ngelekel a chad.” (Matteus 8:20) A Jesus a mle betok el taem el losaod el kmo ngii a “Ngelekel a chad,” e tia el tekoi a medung el bekord el 80 el taem er a chelsel aike el Evangkelio. Me tiang a ochotii el kmo ngii a mera el mle chad el dimlak el chelid e chad. Ngmilekerang a di ta el Ngelekel a Dios e me mechell el chad? Nguleak a oureor el klisichel, e a Jehovah a uliuelii a klengar er a Ngelekel el mo er a cherellel a klikiid el ekebil el Maria me ngmlo dioll. Me a Jesus a mlechell el cherrungel el diak a kngtil.​—Matteus 1:18; Lukas 1:35; Johanes 8:46.

● “Sensei.” (Johanes 13:13) A Jesus a mileketeklii el kmo a Dios a milsang a ngerechelel el kirel “olisechakl . . . e omerk ra evangkelio ra rengedel a Dios.” (Matteus 4:23; Lukas 4:43) Ngmilsaod er a Rengedel a Dios me a rolel e ngmo motaut a soal a Jehovah el okiu a beot e bleketakl el omesodel.​—Matteus 6:9, 10.

● “A Tekoi.” (Johanes 1:1) A Jesus a mle melekingel a Dios me nguluuchais a tekingel me a ulekrael er a Dios el mo er a rebebil. A Jehovah a uluusbech er a Jesus el mo ouchais a klemechel el mo er a rokui el chad.​—Johanes 7:16, 17.

KER: A Jesus, ngike el telbiil el Messias?

NGER: Chochoi. A Biblia a ulemlaoch el kirel a demiel a Messias me a lechub e ng Kristus, el belkul a kmo “Ngike el Mlucheluch.” Me Ngii a mo er ngii a klou el ngerechelel el kirel a otutel a moktek er a Jehovah. A ta el redil er a Samaria a dilu er a Jesus el kmo: “Ak medengei el kmo, a Messias a mei (el ngikel loleker er ngii el kmo Kristus).” Me a Jesus a dilu er ngii el kmo: “Ngak, el mengedecheduch er kau, a ngii.”​—Johanes 4:25, 26.

Me ngera ochotii el kmo a Jesus a Ngike el Messias? Ngar er ngii a edei el bleketakl el olechotel el ngosukid el mo dongchii a Messias el di ua llecheklel a chimal a chad el diak el sebechel el mengodech. Me a ker a kmo a Jesus ngmera el Messias? Ka me bo dosaod.

 ● A klengelakel er ngii. A Biblia a ulemlaoch el kmo a Messias a me duum el okiu a Abraham el ngar er a klengelakel er a David. (Psalm 132:11, 12; Rellir 3:25) Me a Jesus a mlei el ulekiu aika el eru el klengelakel.​—Matteus 1:1-​16; Lukas 3:23-​38.

● A ulaoch el mlutaut. A Biblia a mesaod a betok el ulaoch el kirel a klengar er a Messias er a lengar tia el chutem, el uldimukl er a omesodel a cherellel me a kodellel. Me a Jesus a uleltaut a rokui el ulaoch. El ua tiang: Ngmilechell er a Bethlehem (Mika 5:2; Lukas 2:4-​11), e mlokedong el tuobed er a Ekipten (Hosea 11:1; Matteus 2:15), e mlad el dimlak a ta el chiuesel el mecham (Psalm 34:20; Johanes 19:33, 36). Me ngdimlak a rolel er a Jesus e di lengii el omekrael er a klengar er ngii el mo oltaut aika el ulaoch er a Biblia el kirel a Messias. *

● A tekingel a Dios. Sera lemechell a Jesus e a Dios a uleldurech er a rechanghel el mo mesubed er a remengkerengel a sib el kmo a Messias a mla mechell. (Lukas 2:10-​14) A bebil er a taem er a loruul a omesiungel a Jesus, e a Dios a mla er a eanged e melekoi el olecholt er a deuil a rengul el kirel a Jesus. (Matteus 3:16, 17; 17:1-5) Ngdirrek el milsa klisichel a Jesus el meruul a mengasireng el tekoi el olechotel a kmo ngii a mera el Messias.​—Rellir 10:38.

KER: Ngera uchul me a Jesus a mlo chuarm e mad?

NGER: A Jesus a mle cherrungel el chad me ngdimlak el kirel el mo chuarm. Ngdirrek el dimlak el kirel el mo medeel er a kerrekar e lemad el ua lemekngit el chad. Me nguaisei, engdi Jesus a mle medengei aika el tekoi e kilengei el mo meruul.​—Matteus 20:17-​19; 1 Petrus 2:21-​23.

A ulaoch a mileketeklii el kmo a Messias a mo chuarm e mad el melubet a kngterir a rechad. (Isaia 53:5; Daniel 9:24, 26) Ngii el Jesus a dilu el kmo ngmlei el “mengkengkii a klengar er ngii el ngbetir ar betok.” (Matteus 20:28) Me tirke el oumerang er a olubet el tengetengel a Jesus a oba techall el mo mengubet er a klengit me a kodall, e mo kiei er a Paradis er tia el chutem el mo cherechar. *​—Johanes 3:16; 1 Johanes 4:9, 10.

KER: Ngsebeched el oumerang el kmo a Jesus a mera el milekiis er a kodall?

NGER: Chochoi. A Jesus a mle medengei el kmo ngmo mekiis er a kodall. (Matteus 16:21) Ngklou a ultutelel a bo dodengei el kmo ngdimlak a ta el lolekoi a Jesus me a remeluches er a Biblia el kmo ngdi ngii el mo mekiis er a kodall, e le tiang a diak el sebechel el tekoi. A Biblia a bai melekoi el kmo: A “Dios a kildoked a ringel ra kodall e ulekisii ra kodall.” (Rellir 2:24) A lsekum e kede kongei el kmo ngar er ngii a Dios e ngii a Ulemeob a rokui el tekoi, e ngkired el oumerang el kmo ngsebechel el okisii a Ngelekel er a kodall.​—Hebru 3:4.

Ngar er ngii a bleketakl el ocholt el kirel a okisel a Jesus? Me bo dosaod.

● A tekingir a rechad el lulemes er ngii. A bekord el 22 el rak er a uriul er a lemad a Jesus e a apostol el Paulus a milluches el kmo, te mla er ngii a betok er a 500 el chad el milsang a Jesus er a uriul er a lebekiis er a kodall, e a oumesingd er tir a dirk kilie er sel taem er a loluches aika el tekoi a Paulus. (1 Korinth 15:6) Me ngsebeched el omtok a tekingel a tang me a lechub e te teru el chad, engdi ngtechang a sebechel el omtok a tekingir a 500 el chad el milsang?

● A mesisiich el ocholt. A redisaiplo er a Jesus el tir a ulemes aika el tekoi el dilubech a mle bekeu el ouchais el kmo a Jesus a mera el milekiis er a kodall. (Rellir 2:29-​32; 3:13-​15) Te ulemes er a klaumerang el kirel a okiis el kmo ngklou a ultutelel el kirir a Rekristiano. (1 Korinth 15:12-​19) Te kilengei el mo mad er a bai longemikr er a klaumerang er tir el kirel a Jesus. (Rellir 7:51-​60; 12:1, 2) Kau, ke medengelii a chad el kongei el mo mad el kirel a blulak el tekoi?

Kede mla smaod a elolem el nger er a ker el ngar er a Biblia el kirel a Jesus. Me ngii el nger a kmal meketeklii el kmo ngtechang a Jesus. Engdi ngngar er ngii a ultutelel aika el nger? Me aike el tekoi el molilt el mo oumerang, ngngar er ngii a lerellii el kirem?

[Aike el Footnote]