Jisas Krais​—Bekim Bilong Ol Askim

“Ol manmeri i wok long tok mi husat tru?”—LUK 9:18.

JISAS i givim dispela askim long ol disaipel bilong em, long wanem, em i save olsem ol man i gat narapela narapela tingting long em i husat. Tasol i no gat as long ol man i gat kain kain tingting olsem. Jisas i no hait long ol manmeri na mekim wok long pasin hait, nogat. Em i amamas long stap namel long ol man long ol viles na long ol taun. Em i save autim tok na skulim ol man long ol pablik ples, long wanem, em i laik bai ol man i gat stretpela save long em.—Luk 8:1.

Yumi inap kisim stretpela save long Jisas long rot bilong ol tok na pasin bilong em, em stori bilong em i stap long fopela Gutnius Bilong Baibel—Matyu, Mak, Luk, na Jon. Ol dispela rait em holi spirit i kirapim ol man long raitim, ol i stap olsem bekim bilong ol askim yumi gat long Jisas. a—Jon 17:17.

 ASKIM: Yu ting Jisas em wanpela man i bin stap tru long bipo?

BEKIM: Yes. Ol saveman olsem Josifas na Tasitus em ol i bin stap long taim bilong ol aposel, ol i tok Jisas em wanpela man i bin stap tru long bipo. Bikpela samting moa, ol Gutnius i kamapim klia tru olsem Jisas em wanpela man husat i bin i stap tru, na i no wanpela man long ol stori nating. Na stori bilong ol Gutnius i kolim stret taim na ples em i bin stap na mekim wok long en. Olsem: Bilong makim yia Jisas i bin kirapim wok bilong em, Luk, em man bilong raitim Gutnius, i kolim nem bilong 7-pela bikman husat i bin mekim wok bos long taim bilong Jisas—na ol nem em i kolim i stret wantaim ol rait bilong ol saveman.—Luk 3:1, 2, 23.

Planti samting i kamapim klia olsem Jisas em i wanpela man tru i bin stap bipo. Buk Evidence for the Historical Jesus, i tok: “Planti saveman i wanbel long tok olsem wanpela man, nem bilong em Jisas bilong Nasaret, em i bin i stap tru paslain long yia 100 C.E.”

ASKIM: Yu ting Jisas em i God?

BEKIM: Nogat. Jisas i no bin ting olsem em i wankain long God. Planti taim Jisas i soim olsem em i stap aninit long Jehova. b Jisas i kolim Jehova olsem “God bilong mi” na “yu wanpela tasol yu God tru.” (Matyu 27:46; Jon 17:3) Man i stap aninit long narapela, em tasol i save mekim kain tok olsem. Taim wanpela wokman i kolim papa bilong kampani olsem “bos bilong mi” o “man bilong lukautim wok,” em i kamapim klia olsem em i holim wok i aninit long dispela man.

Jisas i soim tu olsem em i narapela na God i narapela. Wanpela taim ol birua i sutim tok long Jisas na em i tokim ol: “Rait i stap long Lo bilong yupela yet i tok olsem, ‘Tokaut bilong tupela man em i tru.’ Mi tokaut long mi yet, na narapela husat i mekim tokaut long mi em Papa, em man i salim mi i kam.” (Jon 8:17, 18) Jisas em i narapela na Jehova em i narapela, olsem na i stret long em i ken tok olsem i gat tokaut bilong tupela man. c

ASKIM: Yu ting Jisas em i wanpela gutpela man na em tasol?

BEKIM: Nogat, i no dispela tasol. Jisas i save olsem em i gat sampela bikpela wok bilong inapim laik bilong God. Em hia sampela bilong ol:

● “Pikinini tru bilong God.” (Jon 3:18) Jisas i save long em i kamap olsem wanem. Em i bin i stap laip inap planti milion yia pinis paslain long mama i karim em long graun. Em i tok: “Mi lusim heven na kam daun.” (Jon 6:38) Jisas em i namba 1 samting God i bin wokim, na em i helpim God long wokim olgeta narapela samting. Em tasol em samting God wanpela tasol i bin wokim, olsem na i stret Baibel i kolim Jisas olsem “Pikinini tru bilong God.”—Jon 1:3, 14; Kolosi 1:15, 16.

● “Pikinini bilong man.” (Matyu 8:20) Planti taim Jisas i kolim em yet olsem “Pikinini bilong man,” na dispela hap tok i kamap winim 80 taim long 4-pela Gutnius bilong Baibel. Dispela hap tok i makim olsem em i man tru, na i no hap man na hap God, nogat. Olsem wanem Pikinini tru bilong God i bon olsem wanpela man? Long rot bilong holi spirit, Jehova i putim laip bilong Pikinini bilong em long bel bilong Maria, em  wanpela meri Juda i no bin slip wantaim man, na Maria i kisim bel. Long dispela as, Jisas i bon olsem man i no gat sin na i gutpela olgeta.—Matyu 1:18; Luk 1:35; Jon 8:46.

● “Tisa.” (Jon 13:13) Jisas i kamapim klia olsem God i givim wok long em long “skulim ol manmeri . . . na autim gutnius” long Kingdom Bilong God. (Matyu 4:23; Luk 4:43) Jisas i kolim klia ol tok na yusim ol tok em olgeta man inap kliagut long en bilong stori long Kingdom Bilong God em wanem samting na ol wok em Kingdom bai mekim bilong inapim laik bilong Jehova.—Matyu 6:9, 10.

● “Tok.” (Jon 1:1) Jisas i stap olsem Mausman Bilong God—em rot bilong God long salim tok i go long ol narapela. Jehova i yusim Jisas bilong givim tok bilong em long ol manmeri bilong graun.—Jon 7:16, 17.

ASKIM: Yu ting Jisas i Mesaia em God i bin promis long salim i kam?

BEKIM: Yes. Baibel i bin tok profet long Mesaia o Krais bai kam, mining bilong dispela tupela tok em “Man God i Makim.” Dispela Man em God i tok promis long salim i kam, em bai mekim bikpela wok bilong kamapim ol samting em Jehova i tingting pinis long mekim. Wanpela taim, wanpela meri Samaria i tokim Jisas olsem: “Mi save olsem Mesaia bai kam, em ol i kolim Krais.” Orait, Jisas i tokaut klia long em olsem: “Mi dispela man, nau mi toktok wantaim yu.”—Jon 4:25, 26.

Olsem wanem? I gat sampela samting i kamapim klia olsem tru tru Jisas em i Mesaia? I gat 3-pela bikpela samting i kamapim klia olsem Jisas em i Mesaia. Ol dispela samting i olsem pingaprin na i makim stret wanpela man tasol. Yu ting Jisas i inapim dispela samting? Skelim:

● Lain tumbuna bilong em. Baibel i bin tok profet olsem Mesaia bai kamap long lain bilong Abraham na long famili bilong Devit. (Stat 22:18; Song 132:11, 12) Jisas em i tumbuna bilong dispela tupela lain.—Matyu 1:1-16; Luk 3:23-38.

● Inapim ol tok profet. Ol Skripsa Hibru i gat planti tok profet i stori long laip bilong Mesaia long graun, na i stori tu long mama bai karim em na dai bilong em. Jisas i bin truim olgeta tok profet. Em hia sampela bilong ol dispela tok profet: Em i bon long Betlehem (Maika 5:2; Luk 2:4-11), God i singautim em long lusim Isip (Hosea 11:1; Matyu 2:15), na taim ol i kilim em i dai ol i no brukim wanpela bun bilong em (Song 34:20; Jon 19:33, 36). I no gat wanpela rot we Jisas inap stiaim ol samting i kamap long laip bilong em bilong truim olgeta tok profet i stori long Mesaia. d

● God yet i tokaut. Taim mama i karim Jisas, God i salim ol ensel i go toksave long ol wasman bilong sipsip olsem wanpela meri i karim pinis pikinini husat bai kamap Mesaia. (Luk 2:10-14) Long taim Jisas i mekim wok autim tok, God i stap long heven na sampela taim em i tokaut olsem em i orait long Jisas. (Matyu 3:16, 17; 17:1-5) Jehova i givim strong long Jisas long wokim ol mirakel, na long dispela rot tu God i kamapim klia olsem Jisas em i Mesaia.—Aposel 10:38.

 ASKIM: Bilong wanem Jisas i mas kisim pen na i dai?

BEKIM: Jisas em man i no gat sin, olsem na i no stret long em i karim pen na hevi. Na tu, i no stret long ol i nilim em long diwai olsem wanpela man nogut na larim em i kisim pen na i dai. Maski i olsem, Jisas yet i save olsem ol man bai mekim ol dispela pasin nogut long em, na em i daunim em yet na i larim ol dispela samting i kamap long em.—Matyu 20:17-19; 1 Pita 2:21-23.

Baibel i bin tok profet olsem Mesaia i mas karim pen na i dai bilong karamapim sin bilong ol narapela. (Aisaia 53:5; Daniel 9:24, 26) Jisas yet i tok em i kam bilong “givim laip bilong em olsem pe bilong baim bek planti manmeri.” (Matyu 20:28) Ol manmeri em ol i bilip long ofa bilong Jisas, God bai kisim bek ol long sin na dai na ol bai stap laip oltaim long Paradais long graun. e—Jon 3:16; 1 Jon 4:9, 10.

ASKIM: Yu ting yumi inap bilip tru olsem Jisas i bin dai na kirap bek?

BEKIM: Yes. Jisas i save tru olsem em bai kirap bek. (Matyu 16:21) Em i bikpela samting long luksave olsem Jisas yet na ol man bilong raitim Baibel tu, ol i no bin tok olsem wanpela man i kirapim bek Jisas, nogat. Kain tingting olsem bai hatwok long bilip long en. Baibel i tok: “God i kirapim em bek na i no larim dai i holim em i stap.” (Aposel 2:24) Sapos yumi bilip olsem i gat wanpela God na em i Man Bilong Wokim olgeta samting, orait yumi ken bilip tru olsem em i bin kirapim bek Pikinini bilong em long indai.—Hibru 3:4.

Yu ting i gat sampela samting i makim olsem tru tru Jisas i bin kirap bek? Skelim ol dispela samting.

● Tok bilong ol aiwitnes. Inap olsem 22 yia bihain long Jisas i dai, aposel Pol i tok i gat olsem 500 aiwitnes i lukim Jisas taim em i kirap bek pinis na planti bilong ol i bin stap laip yet taim Pol i raitim dispela tok. (1 Korin 15:6) Em nau, 500 man i stap olsem aiwitnes, i no 1-pela o 2-pela man tasol, olsem na i no gat rot bilong daunim tokaut bilong ol long kirap bek bilong Jisas.

● Tok bilong ol man yumi inap trastim. Ol disaipel bilong Jisas em ol i bin raun wantaim Jisas na lukim ol samting Jisas i mekim, ol i tokaut strong olsem Jisas i bin kirap bek pinis. (Aposel 2:29-32; 3:13-15) Ol i tingim olsem kirap bek bilong Jisas em i bikpela samting long bilip Kristen. (1 Korin 15:12-19) Ol dispela disaipel i redi long dai bilong holimpas bilip bilong ol long Jisas. (Aposel 7:51-60; 12:1, 2) Yu ting ol bai redi long dai sapos dispela samting i no tru?

Nau yumi skelim pinis ol bekim bilong Baibel long 6-pela bikpela askim em ol man i gat long Jisas. Ol dispela bekim i tokim yumi stret long Jisas em i husat. Tasol yu ting ol dispela bekim i bikpela samting? Olsem, yu ting wanem bilip yu gat long Jisas em i bikpela samting?

[Ol Futnot]