Biblia cacabi cani rinabadiidxaʼ binni de Jesucristu

«Tu na binni naa.» (LUCAS 9:18)

JESÚS rapa gana ganna xi riníʼ ique ca discípulo stiʼ de laa, purtiʼ stale binni qué ganna chaahuiʼ tupeʼ laabe. Peru qué gapadícabe razón para guiníʼcabe zacá, purtiʼ Jesús qué nixeleʼ de binni ne qué ñuni gastiʼ nagaʼchiʼ. Laabe nabé bidxaagabe binni ra tiica nuube. Bicheechebe diidxaʼ ne bisiidibe nezalú stale binni, purtiʼ racaláʼdxibe ganna chaahuicaʼ tu laabe (Lucas 8:1).

Zanda gunibiaʼnu Jesús pur cani guníʼ ne cani biʼniʼ, ne zacatiʼ nga zanda gunibiaʼnu laabe. Nga runi, galán guidúʼndanu guidapaʼ Evangeliu ni guníʼ Dios xi guicá lucaʼ: Mateo, Marcos, Lucas ne Juan. Lu ca libru ca si nga zanda gunibiáʼ chaahuinu Jesús, purtiʼ racá cayeeteʼ modo bibánibe (Juan 17:17). *

 GUENDARINABADIIDXAʼ: Ñee rusihuinni historia dxandíʼ bibani Jesús la?

NI CACABI GUENDARINABADIIDXAʼ CA: Rusihuínnini dxandíʼ bibánibe. Stale binni ni ruundaʼ de historia ni bibani lu primé siglu, casi Josefo ne Tácito, nacaʼ dxandíʼ bibánibe. Ne sti cosa jma risaca nga ca Evangeliu ca ruzeetecaʼ fecha, lugar, ne xcaadxi cosa ni rusihuinni dxichi dxandíʼ bibánibe ne cadi bizaʼsícabe ti historia ni caníʼ de laabe. Tobi de laacani nga ni bizeeteʼ Lucas: para guniʼbe xi iza bizulú bicheeche Jesús diidxaʼ la? bizeetebe de gadxe binni ni cayuni mandar dxiqué. Ne historia rusihuinni dxandíʼ bibani ca hombre riʼ (Lucas 3:1, 2, 23).

Gastiʼ zanda quiñeyú ca razón ni rusihuinni dxandíʼ guyuu Jesús. Libru ni láʼ Evidence for the Historical Jesus (Historia rusihuinni dxandíʼ guyuu Jesús) na sicaríʼ: «Stale de ca binni ni riene de tema riʼ nacaʼ dxandíʼ bibani ti hombre ni binibiáʼcabe casi Jesús de Nazaret lu primé siglu que».

GUENDARINABADIIDXAʼ: Ñee laaca Jesús nga Dios la?

NI CACABI GUENDARINABADIIDXAʼ CA: Coʼ, gadxepeʼ laacabe. Qué ñuu dxi ñuuyaʼ Jesús laa casi Dios. Stale biaje bisihuínnibe naquiiñeʼ guzuubabe stiidxaʼ Jiobá. * Ngue runi gúdxibe laa «Dios stinneʼ», ne laaca guniʼbe laa nga «tobi lucha Dios ni dxandíʼ» (Mateo 27:46; Juan 17:3). Jesús riniʼné Jiobá casi ti binni jma risaca que laa. Casi ti binni ni runi xhiiñaʼ tuuxa la? rábibe laa «patrón stinneʼ», purtiʼ jma dxiʼbaʼ que laabe o laa nga naquiiñeʼ gábibe xi cayúnibe.

Laaca bisihuinni Jesús gadxé nga laa ne gadxé nga Dios. Ti biaje guyuu ca xhenemígube nihuinni cadi dxandíʼ ni caniʼbe, para gúdxibe laacaʼ: «Cá lu ley stitu, ni iníʼ chupa binni la? ngue nga ni dxandíʼ. Rusihuinne tu nacaʼ, ne laca rusihuinni Bixhoze ni biseenda naa tu nacaʼ» (Juan 8:17, 18). Cumu guniʼbe laabe nga ti testigu ne Jiobá nga stobi la? rihuinni dxíchica gadxepeʼ laacabe. *

GUENDARINABADIIDXAʼ: Ñee ti binni nachaʼhuiʼ si nga guca Jesús la?

NI CACABI GUENDARINABADIIDXAʼ CA: Coʼ, cadi nga si gúcabe, sínuque gadxé gadxé nga ni beedagácabe para bíʼnibe ni naguixhe ique Dios guni. Guidúʼyanu chupa chonna de laacani.

● «Tobi lucha Xiiñi» Dios. (Juan 3:18.) Nanna dxichi Jesús ximodo bizulú xquendanabani. Maca bizáʼ Dios laabe ante gálebe lu Guidxilayú. Ne laapebe guniʼbe: «Biete de ibáʼ» (Juan 6:38). Laabe nga bizáʼ Dios primé, ne despué gucanebe Bixhózebe guca xcaadxi cosa. Cumu laabe nga tobi lucha binni bizáʼ Dios stubi la? nga runi biáʼsipeʼ nga rábicabe laabe «Tobi lucha Xiiñi Dios» (Juan 1:3, 14; Colosenses 1:15, 16).

● «Hombre Biseenda Dios.» (Mateo 8:20.) Jesús biquiiñeʼ ca diidxaʼ riʼ stale biaje para guníʼ de laca laa, ne zeedacani biaʼ ochenta biaje lu ca Evangeliu. Racá rihuinni gúcabe ti binni casi laanu ne cadi ti Dios ni beedagaca binni.  Yanna, ximodo nga beeda gale tobi lucha Xiiñiʼ Dios casi binni guidxilayú yaʼ. Jiobá biquiiñeʼ espíritu santu stiʼ para guluu xquendanabani Xiiñiʼ ndaaniʼ María, ti binnidxaapaʼ judía. Zaqué nga gunda gule Jesús sin donda ne sin guendaruchee (Mateo 1:18; Lucas 1:35; Juan 8:46).

● «Maistru.» (Juan 13:13.) Jesús bisihuinni dxichi dxiiñaʼ bidii Dios laa nga gusiidiʼ binni ne gucheeche ca diidxaʼ nacubi ne galán stiʼ Reinu stiʼ Dios (Mateo 4:23; Lucas 4:43). Ne chupa chonna si diidxaʼ bisiene Jesús xii nga Reinu ca ne jneza modo bíʼnibe ni, laaca bisiénebe ximodo zacaneni para gaca ni maʼ gudixhe ique Dios (Mateo 6:9, 10).

● «Diidxaʼ.» (Juan 1:1.) Biquiiñeʼ Dios Jesús para gabi binni xi racalaʼdxiʼ. Ne para gábibe binni xi na Dios ne xi naquiiñeʼ gúnicaʼ, ne laaca bicheechebe stiidxaʼ Dios lu Guidxilayú (Juan 7:16, 17).

GUENDARINABADIIDXAʼ: Ñee Jesús nga Mesías ni guníʼcabe gueeda que la?

NI CACABI GUENDARINABADIIDXAʼ CA: Laabe ni. Biblia maca bizeeteʼ zeeda ti binni ni chiguni ti dxiiñaʼ nabé risaca para ganda gaca ni maʼ gudixhe ique Dios guni. Laabe nga Mesías, o Cristu, guiropaʼ diidxaʼ ca riníʼcani «ni bibí». Ti biaje gudxi ti gunaa de Samaria Jesús: «Nanna ziuu dxi gueeda Mesías ni rabi cabe Cristu». Laabe bicábibe laa: «Laape be nga caníʼ né be lii» (Juan 4:25, 26).

Peru ñee nuu xi gusihuinni dxandipeʼ laabe nga Mesías la? Nuu chonna cosa nabé risaca ni rusihuinni laabe ni, ne zeeda gácacani casi huella stiʼ ti binni, purtiʼ qué zanda diʼ gapa chupa binni ti huella si. Guidúʼyanu pa Jesús nga Mesías que.

● Tudé zabe. Lu Biblia maca bieeteʼ zeeda Mesías que de Abrahán ne zálebe lade cani za de David (Génesis 22:18; Salmo 132:11, 12). Ne Jesús za de Abrahán ne de David (Mateo 1:1-16; Lucas 3:23-38).

● Ca diidxaʼ riguixhená ni chigúnibe ni na. Stiidxaʼ Dios, ni gucuá lu diidxaʼ hebreu, maca bizeeteʼ stale cosa ni zusihuinni ximodo zabani Mesías lu Guidxilayú riʼ. Ne Jesús biʼniʼ guiráʼ ni maca bieeteʼ que. ¡Dede né cani bieeteʼ zazaaca dxi gálebe ne dxi gátibe! Tobi de laacani nga zálebe ndaaniʼ guidxi Belén (Miqueas 5:2; Lucas 2:4-11), zabee Dios laabe de Egipto (Oseas 11:1; Mateo 2:15) ne qué zagúzacabe nin ti dxitaládibe ora guuticabe laabe (Salmo 34:20; Juan 19:33, 36). Nánnanu qué ñuni Jesús xiixa para ñaca cani bizeeteʼ Stiidxaʼ Dios gaca lu xquendanabani. *

● Ni guniʼpeʼ Dios. Dxi gule Jesús biseendaʼ Dios caadxi ángel chitídxicaʼ caadxi binni cayapa dendxuʼ maʼ gule Mesías (Lucas 2:10-14). Ne dxi maʼ rucheeche Jesús diidxaʼ, guníʼ Dios stale biaje dede guibáʼ para gusihuinni laabe nga Xiiñiʼ ne nuu nayecheʼ pur ni cayúnibe (Mateo 3:16, 17; 17:1-5). Laaca bihuinni Jesús nga Mesías  ni maca bieeteʼ gueeda ra bidii Dios laabe poder para gúnibe milagru (Hechos 10:38).

GUENDARINABADIIDXAʼ: Xiñee gupa xidé gudiʼdiʼ Jesús lu stale yuubaʼ ne guti.

NI CACABI GUENDARINABADIIDXAʼ CA: Pa gule Jesús sin donda la? cadi naquiiñeʼ diʼ nidiʼdiʼ lu stale yuubaʼ. Laaca cadi naquiiñeʼ nucaacabe laabe lu ti yaga casi rúnicabe ti binni malu. Maca nánnabe xi chiguizaacabe, ne neca zacá gunabe guninácabe laabe ne gúticabe laabe casi rati ti binni malu (Mateo 20:17-19; 1 Pedro 2:21-23).

Ca diidxaʼ riguixhená que maca bizeetecani napa xidé guninácabe Mesías que ne gúticabe laabe para ganda guxhabe stónda binni guidxilayú (Isaías 53:5; Daniel 9:24, 26). Jesús peʼ bisiene xiñee beeda ndaaniʼ Guidxilayú riʼ, laa guníʼ: «Para udiee xpida para ilá stale binni» (Mateo 20:28). Nga runi, cani gusihuinni napa fe lu rini ni bixhii Jesús zanda guireecaʼ de lu náʼ guendaruchee ne guendaguti ne guibánicaʼ ndaaniʼ ti paraísu lu Guidxilayú riʼ sin qué chuʼ dxi gáticaʼ (Juan 3:16; 1 Juan 4:9, 10). *

GUENDARINABADIIDXAʼ: Xi razón nápanu para guni crenu biasa Jesús de lade gueʼtuʼ.

NI CACABI GUENDARINABADIIDXAʼ CA: Gunna dxichi Jesús ziasa de lade gueʼtuʼ (Mateo 16:21). Peru nin laabe nin cani bicaa ca libru zeeda lu Biblia qué nuzeetecaʼ pa laca laabe guindísabe laabe de lade gueʼtuʼ. Qué zanda diʼ gúnibe nga laasibe. Ni bieeteʼ nga «bisibani Dios laabe, ulee laabe lu ná enda guti» (Hechos 2:24). Nga runi, pa runi crenu nuu Dios ne runi crenu bizaʼbe guiráʼ ni nuu la? nápanu razón para guni crenu gunda gundísabe Xiiñibe de lade gueʼtuʼ (Hebreos 3:4).

Peru ñee nuu xi gusihuinni dxandíʼ bíʼnibe ni la? Guidúʼyanu xi laacani.

● Ca binni peʼ ni biʼyaʼ xi bizaaca. Apóstol Pablu bicaa xi bizaaca veintidós iza despué de guti Jesús, laa guníʼ biiyaʼ jma de 500 binni Jesús dxi maʼ biasa de lade gueʼtuʼ ne stáleruʼ de ca binni que nabánirucaʼ dxi bicaabe ca diidxaʼ que (1 Corintios 15:6). Zándaca nuu tu laa niníʼ cadi dxandíʼ ni pa ñaca tobi si o chupa si binni ñuuyaʼ laabe, peru 500 binni biʼyaʼ laabe.

● Ca testigu ni zanda guni crenu laacaʼ. Ca primé xpinni Cristu que si nga gúnnacaʼ xipeʼ bizaaca, ngue runi qué nidxíbicaʼ ora guniʼcaʼ dxandíʼ maʼ bisaa Jesús de lade gueʼtuʼ (Hechos 2:29-32; 3:13-15). Ne para laacabe tobi de ca cosa ni jma naquiiñeʼ guni cré ti xpinni Cristu nga biasa Jesús de lade gueʼtuʼ (1 Corintios 15:12-19). Neca guyuu xquendanabánicabe ra naxoo, peru qué ñuu ora niníʼcabe qué runi crécabe Jesús (Hechos 7:51-60; 12:1, 2). Cadi dxandíʼ qué ninaluʼ ñátiluʼ pur xiixa ni nannuʼ cadi dxandíʼ la? Laacabe laaca qué ninácabe ñúnicabe pa ñaca cadi dxandíʼ ni.

Pur modo cacabi Biblia ca guendarinabadiidxaʼ ca, maʼ zanda gánnanu tupeʼ nga guca Jesús. Yanna, ñee naquiiñeʼ gánnanu tupeʼ nga laabe o xi naquiiñeʼ guni crenu de laabe la?

[Nota]