¿Khitïns Jesusajj uk yatiñajj wakisiti?

‘Uñtʼapjjarakïtawa kunatejj cheqäki ukjja, ukat ukaw qhespiyapjjarakïtam.’ (JUAN 8:32)

JESUSATJJA walja kʼari yatichäwinakaw utji ukampis Bibliaw kunatï cheqäki uk qhanañchistaspa. Ukhamajj ¿uk yatjjatañajj wakisiti? Jïsa wakisiwa. Jehová Diosatakisa ukat Jesusatakisa wali wakiskiriwa. Ukat jiwasatakis wali wakiskirïñaparakiwa.

● ¿Kunatsa Jehová Diosatakejj wakiskirejja? Kunattejj Jehová “Diosajj munasiñawa” (1 Juan 4:8). Jupajj wiñay kusisit jakasiñaswa muni. Juan 3:16, qellqatan akham siwa: “Diosajj akapachar wal munatap laykuw mä sapa Yoqapar khitani, taqe khithinakatejj jupar iyawsapki ukanakajj [...] wiñay jakañanïñapataki” sasa. Diosajja, jiwasar qhespiyañatakiw Yoqap aka Oraqer khitani. Ukhamatwa suma paraisor tukuyat Oraqen jakasiñasatak suytʼäwinitanjja, kunjamtï qalltan amtkän ukhama (Génesis 1:28). Khitinakatï Jesusat kunatï cheqäki uk yatjjatapjjani ukat ukarjam sarnaqapjjarakini ukanakarojj wiñajj jakañ churañwa muni (Romanos 6:23).

● ¿Kunatsa Jesusatakejj wakiskirejja? Kunattejj Jesusajj ukhamarakiw jaqenakar wal munasi, ukatwa jakäwipsa taqe jaqenak layku aptʼasiwayi (Juan 15:13). Ukhamatakwa qhespiyasna uk jupajj sum yatïna (Juan 14:6). Ukat jupajj taqe jaqes loqtasitapat askinak jikjjatapjjaspa uk wal munpachäna. Ukatwa taqe arkirinakaparojj Diosan munañapat ukat amtäwipat taqe jaqenakar yatiyapjjam sas sispachäna (Mateo 24:14; 28:19, 20).

● ¿Kunatsa jiwasanakatakejj wali wakiskirejj uka toqet yatjjatañajja? Amuytʼañäni ¿Jakäwisanjja, familiasasa ukat kʼumara sarnaqañas wali wakiskirejjaya? Jïsa ukhamawa. Jumas ukhamarakiw familiamampi kusisita jakasiñ munpachatajja. Jesús toqnamaw Jehová Diosajj kʼumar jakasiña ukat wiñay jakañ churistani, ukanjja janiw usuntañas tʼaqhesiñas utjjaniti (Salmo 37:11, 29; Apocalipsis 21:3, 4). ¿Uka suma Oraqen wiñayatak jakasiñ munasmati? Uk jikjjatañatakejja, ¿Kun lurañ wakisispa?

¿Aka qallta yatichäwin Biblian mä jiskʼa tʼaqap qhanañchaniwayktan uk amtasktati? Ukanjja, ‘uñtʼapjjarakïtawa kunatejj cheqäki ukjja, ukat ukaw qhespiyapjjarakïtam’ sänwa. Uka arunakajja Jesusata ukat kunjamsa jupajj Diosan amtap phoqhasiñapatakejj yanaptʼäni, ukat uka toqerak juchatsa jiwañatsa qhespiyistani ukwa qhanañchaskäna. Ukhamajj jiwasatï qhespiyasiñ munstan ukhajja, kunatï cheqäki ukjja sum uñtʼañasawa. Ukhamajja, ¿Jesusat jukʼamp yatjjatañ munasmati? ukat ¿kunjamsa jupar cheqpach uñtʼasinjja jumas ukat familiamas askinak apsupjjasma? Ukatakejj Jehová Diosan Qhanañchirinakapaw yanaptʼapjjatam.