?Ɔ ti cinnjin kɛ e si kosan sɔ’m be su tɛlɛ’n?

“Amún sí ndɛ ng’ɔ ti nanwlɛ’n, yɛ ndɛ nanwlɛ sɔ’n ti amún nyán amun ti.”​—Zan 8:32.

ZEZI i su ndɛ sukusuku nga sran’m be kan’n m’ɔ kwla mlin e’n, Biblu’n maan e kwla si nanwlɛ nga mɔ maan e su faman be su’n. ?Sanngɛ, Zezi i su ndɛ nga e si i mɔ e fa su’n, ɔ ti cinnjin? Ɛɛn, ɔ ti cinnjin. Ɔ ti Zoova i cinnjin. Ɔ ti Zezi i cinnjin, yɛ ɔ fata kɛ ɔ yo e cinnjin wie.

● ?Ngue ti yɛ ɔ ti Zoova i cinnjin ɔn? Sɛ e waan é kpɛ́ i kpo’n, é sé kɛ ɔ ti i cinnjin afin “Nyanmiɛn’n yɛ ɔ ti sran klofuɛ nin-ɔn.” (1 Zan 4:8) Zoova kunndɛ kɛ e di aklunjuɛ tititi. Zezi seli kɛ: “Nyanmiɛn kloli mɛn’n lele ɔ fɛ i Wa kunngba cɛ’n mannin naan sran kwlaa ng’ɔ lafi i su’n [...] ɔ nyan anannganman nguan.” (Zan 3:16) Ɲanmiɛn sunmɛnnin i Wa’n naan ɔ wa kpɔ e ti. Yɛ ɔ yo naan like nga i bɔbɔ Ɲanmiɛn sunnzunnin i klɔ sran’m be lika i klikli nun’n, ɔ kpɛn su. Yɛle kɛ ɔ yo naan be kwla ɲan anannganman nguan asiɛ’n m’ɔ́ wá káci mɛn klanman’n i su. (Bo Bolɛ 1:28) Be nga be suan Ɲanmiɛn i Wa’n i su ndɛ nanwlɛ’n mɔ be niɛn i sɔ’n su be nanti’n, Ɲanmiɛn klo kpa kɛ ɔ́ fá anannganman nguan’n cɛ́ be.​—Rɔmfuɛ Mun 6:23.

● ?Ngue ti yɛ ɔ ti Zezi i cinnjin ɔn? Zezi kusu klo klɔ sran mun wie. Like ng’ɔ fa kleli sɔ’n yɛle i nguan mɔ i klunklo su, ɔ fa mannin’n. (Zan 15:13) Ɔ wunnin i wlɛ kɛ i sɔ m’ɔ yoli’n i ngunmin ti yɛ maan sran’m be kwla ɲan be ti ɔ. (Zan 14:6) ?Ɔ maan sɛ Zezi kunndɛ kɛ sran kpanngban kpa be ɲan e ti kpɔlɛ tɛ’n i su ye’n, ɔ fata kɛ ɔ bo e nuan? Kɛ m’ɔ kunndɛ i sɔ’n ti’n, ɔ sunmɛnnin i sɔnnzɔnfuɛ kpa mun naan be fa Ɲanmiɛn i klun sa’n kle sran mun asiɛ wunmuan’n su.​—Matie 24:14; 28:19, 20.

● ?Ngue ti yɛ ɔ fata kɛ ɔ yo e cinnjin ɔn? Amun bu ninnge kɛ aunkpinndiɛ nin amun awlobofuɛ mun, mɔ be ti amun cinnjin kpa’n be akunndan kan nian. ?Amun kunndɛ kpa kɛ amun nin amun awlɛn su sran mun amun wun kpinndin amun titi, naan kusu amun mɛn dilɛ wafa’n yo kpa tra laa’n? Zoova sinnin Zezi i lika yoli naan amun nin amun awlɛn su sran mun, amun a kwla yo juejue tititi. Kpɛkun amun kwla tran mɛn uflɛ mɔ afɛ’n nin ɲrɛnnɛn be su tranman nun’n i nun tititi. (Jue Mun 37:11, 29; Sa Nglo Yilɛ 21:3, 4) ?Amun konvi sɔmɛn i sɔ liɛ’n? Sɛ ɔ ti sɔ’n, ɔ le like kun m’ɔ fata kɛ amun yo ɔ.

Maan amun nian Biblu’n nun ndɛ mma ng’ɔ o ndɛ nga i flɛlɛ’n i bo lɛ’n ekun. Ɔ se kɛ: “Amún sí ndɛ ng’ɔ ti nanwlɛ’n, yɛ ndɛ nanwlɛ sɔ’n ti amún nyán amun ti.” Like nga be kwla yo naan y’a ɲan e ti kanga dilɛ i tɛtɛ kpafuɛ’n i sa nun’n, yɛle Zezi i su ndɛ nanwlɛ’n ɔ nin junman ng’ɔ di i Ɲanmiɛn i klun sa’n i su kpɛnlɛ’n nun’n i su nanwlɛ’n. Yɛle kɛ e kwla ɲan e ti sa tɛ’n nin wie’n be sa nun. Sanngɛ sɛ amun kunndɛ kɛ amún ɲán amun ti’n, ɔ fata kɛ amun ‘si ndɛ ng’ɔ ti nanwlɛ’n.’ ?Sɛ amun nin amun awlɛn su sran’m be suan ndɛ ng’ɔ ti nanwlɛ’n ɔ nin wafa nga amun kwla ɲan su ye’n i su like kpa ekun’n, amun wunman kɛ ɔ ti kpa? Sɛ amun waan amún yó i sɔ’n, Zoova i Lalofuɛ’m bé úka amun aklunjuɛ su.