Mahalaga daw an mga Simbag?

“Maaaraman nindo an katotoohan, asin bubutasan kamo kan katotoohan.” ​—⁠JUAN 8:32.

YAON sa Biblia an katotoohan na makakapatalingkas sa sato sa nakakaribaraw o mapandaya pa nganing mga paniniwala dapit ki Jesus. Pero, talaga daw na mahalaga kun ano an tinutubod niato manongod sa saiya? Iyo nanggad. Mahalaga iyan ki Jehova. Mahalaga iyan ki Jesus. Asin dapat na iyo man sa sato.

● Taano ta mahalaga iyan ki Jehova? Sa simpleng pagtaram, huling “an Dios pagkamoot.” (1 Juan 4:⁠8) Gusto ni Jehova na kita mabuhay nin maogma sagkod lamang. Si Jesus nagsabi: ‘An Dios namoot na gayo sa kinaban [nin katawohan], na itinao nia an saiyang Aking bugtong, tanganing an siisay man na minatubod sa saiya magkaigwa nin buhay na dai nin katapusan.’ (Juan 3:16) Isinugo nin Dios an Aki nia sa katuyohan na magin Parabalukat niato asin buksan an dalan tanganing mabuhay kita sagkod lamang sa Paraiso digdi sa daga, kaoyon kan Saiyang orihinal na katuyohan. (Genesis 1:28) Gustong-gusto nin Dios na itao an regalong buhay na daing katapusan sa mga nakakanood kan katotoohan dapit sa Aki nia asin minahiro kaoyon kaiyan.​—⁠Roma 6:⁠23.

● Taano ta mahalaga iyan ki Jesus? Namomotan man ni Jesus an katawohan. Nagpaheling sia nin mapagsakripisyong pagkamoot paagi sa gikan sa boot na pagtao kan saiyang buhay para sa sato. (Juan 15:13) Aram nia na paagi kaiyan binubuksan nia an solamenteng dalan pasiring sa kaligtasan. (Juan 14:⁠6) Dapat daw kitang magngalas na gustong maheling ni Jesus an pinakadakol na tawo na makinabang sa atang na pantubos? Iyan an dahelan kaya isinugo nia an saiyang tunay na mga parasunod na tokdoan an mga tawo sa bilog na kinaban dapit sa kabotan asin katuyohan nin Dios.​—⁠Mateo 24:14; 28:​19, 20.

● Taano ta dapat na mahalaga iyan sa sato? Isip-isipa nguna an mga bagay na seguradong mahalagang marhay sa saimo​—⁠an saimong salud asin pamilya. Gustong-gusto mo daw na ika asin an saimong mga mahal sa buhay magkaigwa nin marahay na salud asin mas magayon na buhay? Paagi ki Jesus, inaalok ni Jehova sa saimo asin sa mga mahal mo sa buhay an oportunidad na magkaigwa nin perpektong salud saka buhay na daing katapusan sa sarong bagong kinaban, na mayo nin kolog pati pagsakit. (Salmo 37:​11, 29; Kapahayagan 21:​3, 4) Gusto mo daw mabuhay sa arog kaiyan na kinaban? Kun iyo, may kaipuhan kang gibohon.

Balikan niato an kinotar na teksto na nasa ibaba kan titulo kan artikulong ini: “Maaaraman nindo an katotoohan, asin bubutasan kamo kan katotoohan.” An katotoohan dapit ki Jesus asin sa papel nia sa kaotoban kan katuyohan nin Dios makakapatalingkas sa sato sa pinakamaraot na klase nin pagkaoripon​—⁠an pagigin oripon nin kasalan asin kagadanan. Pero, tanganing maeksperyensiahan an siring na katalingkasan, kaipuhan mong ‘maaraman an katotoohan.’ Taano ta dai mo pag-adalan nin orog pa an dapit sa katotoohan na ini asin kun paano ka saka an mga mahal mo sa buhay makikinabang dian? Maoogma an mga Saksi ni Jehova na tabangan ka.