Bushe Ukwishiba Amasuko Kwalicindama?

“Mukeshiba icine, ne cine cikamulenga ukuba abantungwa.”—YOHANE 8:32.

MULI Baibolo mwaliba icine icingatulenga ukuba abantungwa ku fisambilisho fya bufi ifingalenga twakaana ukwishiba icine pali Yesu. Lelo bushe ukwishiba icine pali Yesu kwalicindama? Ee, kwalicindama. Kwalicindama kuli Yehova na kuli Yesu, kabili kufwile ukucindama na kuli ifwe bene.

● Mulandu nshi kwacindamina kuli Yehova? Pantu “Lesa kutemwa.” (1 Yohane 4:8) Yehova afwaya ukuti tube ne nsansa kabili tukekale umuyayaya. Yesu atile: “Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela . . . akabe no mweo wa muyayaya.” (Yohane 3:16) Lesa atumine Umwana wakwe ukwisa mu kutulubula no kutupeela ishuko lya kwikala umuyayaya muli Paradaise pe sonde, nge fyo alefwaya pa kutendeka. (Ukutendeka 1:28) Lesa alafwaya sana ukupeela umweo wa muyayaya kuli bonse abasambilila icine pa Mwana wakwe no kulakonka ifyo basambilila pali Yesu.—Abena Roma 6:23.

● Mulandu nshi kwacindamina kuli Yesu? Yesu na o alitemwa abantunse. Alangile ukuti alitutemwa nga nshi ilyo atufwilile. (Yohane 15:13) Alishibe ukuti ukutufwila e yali fye e nshila ya kupusushishamo abantu. (Yohane 14:6) Kanshi te kuti citupapushe ukwishiba ukuti Yesu afwaya abantu abengi nga nshi ukwisapusuka pa mulandu wa cilubula apeele. E mulandu wine aebele na basambi bakwe aba cine ukulasambilisha abantu mu calo conse pali Lesa ne fyo afwaya.—Mateo 24:14; 28:19, 20.

● Mulandu nshi kufwile ukucindamina kuli ifwe? Taleni tontonkanyeni pa fintu ifyacindama sana kuli imwe, pamo nga ulupwa lwenu no bumi bwenu. Bushe mulafwaya ukuba no bumi ubusuma no kulaikala bwino ukubikako na bantu mwatemwa? Yehova, ukupitila muli Yesu afwaya imwe nabo mwatemwa ukuba ne subilo lya kukwata ubumi ubusuma kabili ubwa muyayaya mu calo cipya umushakabe ukukalipwa no kucula. (Amalumbo 37:11, 29; Ukusokolola 21:3, 4) Bushe kuti mwatemwa ukwikala mu calo ca musango yu? Nga kuti mwatemwa, kuli ifyo mufwile ukucita.

Moneni na kabili ilembo lili pa ntendekelo, ilileti: “Mukeshiba icine, ne cine cikamulenga ukuba abantungwa.” Ukwishiba icine pali Yesu no mulimo akwata mu kufikilisha ukufwaya kwa kwa Lesa kuti kwatulubula ku busha bwabipisha, ubwa lubembu ne mfwa. Lelo pa kulubuka kuli ubu busha, mufwile ‘ukwishiba icine.’ Kuti cawama nga mwaishibe na fimbi pali ici icine ne fyo imwe na bantu mwatemwa mwingalubuka. Inte sha kwa Yehova bakatemwa sana ukumwafwa ukwishiba ifi.