?From Wanem Yumi Mas Save Ansa?

“Bambae yufala i save trutok, mo trutok ya bambae i mekem yufala i fri man.”—JON 8:32.

TRUTOK we i stap long Baebol, i mekem yumi fri long ol giaman tijing we oli mekem tingting blong yumi i fasfas se Jisas hem i hu. ?Olsem wanem? ?Yumi mas bilif long trutok long saed blong Jisas? Yes. Trutok ya i impoten long Jehova, long Jisas, mo long yumi tu.

● ?From wanem hem i impoten long Jehova? From we “God i stamba blong fasin ya blong lavem man.” (1 Jon 4:8) Jehova i wantem se yumi harem gud long laef, gogo i no save finis. Jisas i talem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi . . . oli gat laef we i no save finis.” (Jon 3:16) God i sanem Pikinini blong hem i kam, blong i pemaot yumi long sin. Mo hem i mekem rod blong yumi kasem laef we i no save finis long Paradaes long wol. Hemia nao tingting we God i gat fastaem olgeta. (Jenesis 1:28) God i wantem tumas blong givim laef ya long ol man we oli lanem trutok long saed blong Jisas, mo oli folem long laef blong olgeta.—Rom 6:23.

● ?From wanem hem i impoten long Jisas? Jisas tu i lavem ol man. Hem i lego samting we hem nomo i wantem, blong givim laef blong hem blong sevem yumi. (Jon 15:13) Hem i save se i gat wan rod nomo blong ol man oli kasem laef. Hem nao i rod ya. (Jon 14:6) Jisas i wantem se olgeta man oli kasem blesing from sakrefaes blong hem. Hemia nao from wanem hem i talem long ol man blong hem se oli mas tijim ol man long olgeta ples long wol, blong oli save samting we God i wantem mo stamba tingting blong God.—Matiu 24:14; 28:19, 20.

● ?From wanem hem i impoten long yumi? Yu traem tingbaot ol samting we yu tinghae long olgeta. Ating yu tingbaot famle blong yu mo helt blong yu. ?Yu wantem se bodi blong yu i strong? ?Yu wantem se yu mo famle blong yu, yufala i kasem wan gudfala laef? Jehova i givim janis long yu mo long famle blong yu, blong kasem laef we i no save finis long niufala wol. Long taem ya, bambae man i no moa sik, i no moa harem bodi blong hem i soa, mo i no moa harem nogud. Jehova i yusum sakrefaes blong Jisas blong mekem ol promes ya oli kamtru. (Ol Sam 37:11, 29; Revelesen 21:3, 4) ?Yu yu wantem kasem laef ya? Sipos yes, i gat wan samting we yu mas mekem.

Plis yu ridim bakegen ol tok blong Jon 8:32 we i se: “Bambae yufala i save trutok, mo trutok ya bambae i mekem yufala i fri man.” Trutok long saed blong Jisas mo wok we hem i mekem blong tingting blong God i kamtru, i save mekem yumi fri long sin mo ded. Sipos yu wantem fri long sin mo ded, yu mas “save trutok.” I gud yu lanem moa long saed ya, mo yu faenemaot wanem we yu mo famle blong yu i mas mekem blong trutok ya i mekem i gud long yufala. Ol Witnes blong Jehova oli glad blong givhan long yu.