Ndi Ibọrọ Emi Ẹdi Akpan N̄kpọ?

“Mbufo ẹyefiọk akpanikọ, akpanikọ oyonyụn̄ anam mbufo ẹwọrọ ufụn.”—JOHN 8:32.

BIBLE anam nnyịn inen̄ede ifiọk owo emi Jesus edide. Akpanikọ emi iyakke nnyịn idụk ufụn inọ nsunsu ekikere emi mîyakke nnyịn idiọn̄ọ Jesus. Edi, ndi se nnyịn inịmde ke akpanikọ iban̄a Jesus edi akpan n̄kpọ? Ih, edi akpan n̄kpọ. Jehovah ada enye ke akpan n̄kpọ. Jesus ada enye ke akpan n̄kpọ. Ndien ana nnyịn ida enye ke akpan n̄kpọ n̄ko.

● Ntak emi Jehovah adade enye ke akpan n̄kpọ? Ke nditịn̄ ibio ibio, edi koro “Abasi edi ima.” (1 John 4:8) Jehovah oyom nnyịn ikop inemesịt inyụn̄ idu uwem ke nsinsi. Jesus ọkọdọhọ ete: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye . . . enyene nsinsi uwem.” (John 3:16) Abasi okosio Eyen esie ọnọ man edifak nnyịn onyụn̄ anam nnyịn ikeme ndidu uwem ke nsinsi ke Paradise ke isọn̄ nte Enye akaduakde toto ke editọn̄ọ. (Genesis 1:28) Enen̄ede ọdọn̄ Abasi ndinọ mbon oro ẹkpepde akpanikọ ẹban̄a Eyen esie ẹnyụn̄ ẹnamde se ẹkpepde, nsinsi uwem.—Rome 6:23.

● Ntak emi Jesus adade enye ke akpan n̄kpọ? Koro Jesus n̄ko ama ubonowo. Enye ndikenyịme ndiwa uwem esie nnọ nnyịn owụt nte enye amade nnyịn. (John 15:13) Enye ama ọdiọn̄ọ nte ke imọ ndikpa edinam owo ekeme ndinyene edinyan̄a. (John 14:6) Nso ikpanam idem akpa nnyịn ndifiọk nte ke Jesus oyom ata ediwak owo ẹbọ ufọn uwa ufak esie? N̄kọ ntak akam edi oro enye ọkọdọn̄de ata mme anditiene enye ete ẹkekpep mme owo uduak Abasi ke ofụri ererimbot.—Matthew 24:14; 28:19, 20.

● Ntak emi nnyịn ikpadade enye ke akpan n̄kpọ? Kere ban̄a mme n̄kpọ emi afo adade ke akpan n̄kpọ, oro edi, idem fo ye ufọk fo. Ndi omoyom idem ọsọn̄ fi onyụn̄ ọsọn̄ mme iman fo? Jehovah ada Jesus ọnọ fi ye mme iman fo idotenyịn edikop nsọn̄idem nnyụn̄ ndu uwem ke nsinsi ke obufa ererimbot emi owo mîdidọn̄ọke inyụn̄ ibọ ufen aba. (Psalm 37:11, 29; Ediyarade 21:3, 4) Ndi akpama utọ uwem oro? Edieke amade, odu n̄kpọ emi anade anam.

Mbọk fiak se itie N̄wed Abasi oro ẹdade ẹtọn̄ọ ibuotikọ emi: “Mbufo ẹyefiọk akpanikọ, akpanikọ oyonyụn̄ anam mbufo ẹwọrọ ufụn.” Edieke nnyịn ifiọkde akpanikọ, oro edi, se Bible ekpepde aban̄a Jesus, idaha esie, ye nte Abasi adade enye anam uduak esie, emi oyosio nnyịn ke ufụn idiọkn̄kpọ ye n̄kpa. Omokụt do ke ‘ndifiọk akpanikọ’ edinam iwọrọ ke ufụn emi. Ntre, nnyịn imesịn udọn̄ inọ fi ite ekpep akpanikọ emi, onyụn̄ ekpep se afo ye mme iman fo ẹkpenamde man ẹnyene edinyan̄a. Mme Ntiense Jehovah ẹyema ndin̄wam fi.