Be Gblọndo lọ lẹ Yinyọnẹn Yin Nujọnu Ya?

“Mìwlẹ nasọ yọ́n nugbo lọ, nugbo lọ nasọ hẹn mì jẹ mẹdekannu.”—JOHANU 8:32.

BIBLU bẹ nugbo he sọgan hẹn mí jẹ mẹdekannu sọn bẹwlu kavi nuyise agọ̀ gando Jesu go mẹ lẹ hẹn. To whelọnu lo, be nuhe mí yise gando ewọ go lẹ yin nujọnu ya? Mọwẹ. E yin nujọnu na Jehovah. E yin nujọnu na Jesu. Podọ e dona yin nujọnu na mílọsu.

● Naegbọn e do yin nujọnu na Jehovah? To kleun mẹ, na “Jiwheyẹwhe wẹ owanyi” wutu wẹ. (1 Johanu 4:8) Jehovah jlo dọ mí ni zan gbẹzan ayajẹ tọn kakadoi. Jesu dọ dọ ‘Jiwheyẹwhe yiwanna aihọn gbẹtọvi tọn lọ sọmọ bọ e namẹ Visunnu detọ́n dopo akàn etọn, na mẹdepope he do yise hia to ewọ mẹ nido tindo ogbẹ̀ madopodo.’ (Johanu 3:16) Jiwheyẹwhe do Visunnu etọn hlan nado fli mí gọ̀ podọ nado hùn dotẹnmẹ dote na mí nado nọgbẹ̀ kakadoi to Paladisi mẹ to aigba ji, to kọndopọ mẹ hẹ lẹndai dowhenu tọn Etọn. (Gẹnẹsisi 1:28) Ojlo vẹkuvẹku Jiwheyẹwhe tọn wẹ nado na ogbẹ̀ madopodo mẹhe plọn nugbo lọ gando Visunnu etọn go bosọ yinuwa sọgbe hẹ nuhe yé plọn lẹ.—Lomunu lẹ 6:23.

● Naegbọn e do yin nujọnu na Jesu? Jesu lọsu yiwanna gbẹtọvi lẹ. E do owanyi mẹde-yido-sanvọ́ tọn hia gbọn didesọn ojlo mẹ nado ze ogbẹ̀ etọn jo do ota mítọn mẹ dali. (Johanu 15:13) E yọnẹn dọ gbọn mọwiwà dali, emi to awuwlena aliho whlẹngán tọn dopo gee lọ. (Johanu 14:6) Be e na paṣa mí dọ Jesu jlo dọ mẹsusu ni mọaleyi sọn avọ́sinsan ofligọ etọn tọn mẹ wẹ ya? Nuhewutu e do deazọ́nna hodotọ nugbonọ etọn lẹ nado plọnnu gbẹtọ lẹ lẹdo aihọn pé gando ojlo po lẹndai Jiwheyẹwhe tọn po go niyẹn.—Matiu 24:14; 28:19, 20.

● Naegbọn e dona yin nujọnu na mílọsu lẹ? Lẹnnupọn vude do nuhe yin nujọnu hugan na we lẹ ji—vlavo agbasalilo po whẹndo towe po. Be e nọ jlo we dọ hiẹ po mẹyiwanna towe lẹ po ni tindo agbasalilo po gbẹzan dagbe de po ya? Gbọn Jesu gblamẹ, Jehovah ze todido agbasalilo pipé gọna ogbẹ̀ madopodo to aihọn he vò sọn awufiẹsa po yajiji po si tọn donukọnna hiẹ po mẹyiwanna towe lẹ po. (Psalm 37:11, 29; Osọhia 21:3, 4) Be e jlo we nado nọgbẹ̀ to aihọn mọnkọtọn mẹ ya? Eyin mọ wẹ, nude tin he hiẹ dona wà.

Wefọ he yin dide to bẹjẹeji hosọ ehe tọn dọmọ: “Mìwlẹ nasọ yọ́n nugbo lọ, nugbo lọ nasọ hẹn mì jẹ mẹdekannu.” Nugbo lọ yinyọnẹn gando Jesu po azọngban etọn to lẹndai Jiwheyẹwhe tọn hinhẹndi mẹ po go sọgan hẹn mí jẹ mẹdekannu sọn wunmẹ kanlinmọgbenu tọn he ylan hugan lọ mẹ—yèdọ sọn ylando po okú po si. Ṣigba nado duvivi mẹdekannujẹ enẹ tọn, hiẹ dona “yọ́n nugbo lọ.” Naegbọn hiẹ ma na plọn nususu dogọ gando nugbo ehe gọna lehe hiẹ po mẹyiwanna towe lẹ po sọgan mọaleyi sọn e mẹ do go? Homẹ Kunnudetọ Jehovah tọn lẹ tọn na hùn nado gọalọna we.