Hihi Macokio nĩ ma Bata?

“Nĩmũkamenya ũhoro-ũrĩa-wa-ma, naguo ũhoro-wa-ma ũmũkũũre ũkombo-inĩ.”​—JOHANA 8:32.

BIBILIA ĩkoragwo na ũhoro wa ma, ũrĩa ũngĩtũkũũra ũkombo-inĩ wa mawĩtĩkio mogomu kana marĩa mangĩtũhĩtithia megiĩ Jesu. No ũndũ ũrĩa twĩtĩkĩtie ũmwĩgiĩ hihi kũna nĩ wa bata? Ĩĩ nĩ wa bata. Nĩ wa bata harĩ Jehova. Nĩ wa bata harĩ Jesu. O na nĩ wagĩrĩirũo gũkorũo wĩ wa bata harĩ ithuĩ.

● Ũndũ ũcio nĩ wa bata harĩ Jehova nĩkĩ? Na njĩra nguhĩ, nĩ tondũ ‘Ngai nĩ wendani.’ (1 Johana 4:8) Jehova endaga tũtũũre na gĩkeno tene na tene. Jesu oigire ũũ: “Ngai, tondũ wa ũrĩa endete kĩrĩndĩ gĩa gũkũ thĩ, nĩaarutire Mũrũ wake wa mũmwe, nĩ getha mũndũ o wothe ũmwĩhokete . . . agĩe muoyo wa tene na tene.” (Johana 3:16) Ngai aatũmire Mũriũ wake atuĩke Mũhonokia witũ na atũhingũrĩre njĩra ya gũgaatũũra thĩinĩ wa Paradiso gũkũ thĩ, o ta ũrĩa muoroto Wake waarĩ o kĩambĩrĩria. (Kĩambĩrĩria 1:28) Ngai nĩ akoragwo akĩenda mũno kũheana kĩheo kĩa muoyo wa tene na tene harĩ arĩa merutaga ma ĩgiĩ Mũrũwe na mageka kũringana nayo.—Aroma 6:23.

● Ũndũ ũcio nĩ wa bata harĩ Jesu nĩkĩ? Jesu o nake nĩ endete andũ. Nĩ onanirie wendo wa kwĩima rĩrĩa aarutire muoyo wake nĩ ũndũ witũ. (Johana 15:13) Nĩ aamenyaga atĩ gwĩka ũguo nĩ kũngĩahingũrĩire andũ njĩra ĩrĩa yo iiki ya ũhonokio. (Johana 14:6) Hihi nĩ ũndũ wa magegania atĩ Jesu nĩ endaga kuona andũ aingĩ o ũrĩa kũngĩhoteka makĩgunĩka nĩ igongona rĩake rĩa ũkũũri? Kĩu nĩkĩo gĩatũmire aathe arũmĩrĩri ake a ma marute andũ ũhoro wĩgiĩ wendi na muoroto wa Ngai thĩinĩ wa thĩ yothe.—Mathayo 24:14; 28:19, 20.

● Ũndũ ũcio wagĩrĩirũo gũkorũo ũrĩ wa bata harĩ ithuĩ nĩkĩ? Ta wĩcirie hanini ũhoro wa maũndũ mamwe wonaga marĩ ma bata, ta ũgima wa mwĩrĩ na famĩlĩ yaku. Hihi nĩ wĩriragĩria ũgima mwega wa mwĩrĩ o na ũtũũro mwega waku na wa endwa aku? Jehova arakũhe wee na endwa aku mweke wa kũgĩa na ũgima mwega wa mwĩrĩ na muoyo ũtagathira thĩinĩ wa thĩ njerũ ĩtarĩ na ruo na mĩnyamaro akĩhũthĩra Jesu. (Thaburi 37:11, 29; Kũguũrĩrio 21:3, 4) Wee no wende gũtũũra thĩ ta ĩyo? Angĩkorũo no wende-rĩ, harĩ ũndũ ũbatiĩ gwĩka.

Ta rora rĩandĩko rĩrĩa rĩgwetetwo kĩongo-inĩ rĩngĩ: “Nĩmũkamenya ũhoro-ũrĩa-wa-ma, naguo ũhoro-wa-ma ũmũkũũre ũkombo-inĩ.” Ma ĩrĩa ĩgiĩ Jesu na itemi rĩake harĩ kũhinga kwa muoroto wa Ngai no ĩtũrute ũkombo-inĩ ũrĩa wa mũthemba mũũru makĩria—wa mehia na gĩkuũ. No nĩguo ũrutwo ũkombo-inĩ ũcio, nĩ ũrabatara ‘kũmenya ũhoro ũrĩa wa ma.’ Nĩ wega wĩrute ũhoro makĩria wĩgiĩ ma ĩyo na ũrĩa wee o na endwa aku mũngĩgunĩka nĩyo? Aira a Jehova no makenere gũgũteithia.