Mukonda Diahi ku Bhinga Kuijiia o Itambuijilu?

“Mua-nda kuijiia o kidi, anga o kidi ki mi bhulula.”—NZUÁ 8:32, NW.

MU BIBIDIA tu sanga-mu o kidi ki tena ku tu bhulula ku ilongesu ia makutu ia lungu ni Jezú. O kuila kiki, kia lungu ué ni ibanzelu ietu ia lungu ni muéne? Kiene muene. Jihova ni Jezú a mesena etu tuijiia o itambuijilu, n’etu ué tua tokala tuijiia.

● Mukonda diahi Jihova ua mesena tuijiia o itambuijilu? Ua mesena mukonda “Nzambi henda.” (1 Nzuá 4:8) Jihova ua mesena tu zediua katé ku hádia ni hádia. Jezú uambe: ‘Nzambi ua zolo o mundu, [o athu] katé kia suku mu ku bhana Mon’ê umoxi-élele, phala uoso u mu xikana, . . . a kale ni muenhu ki ua ka bhua.’ (Nzuá 3:16) Nzambi ua tumikisa Mon’ê phala ku tu Bhulula, iu ua jikula o njila phala tu kale ku muenhu ua kalelaku mu ixi, kala kia mesenene ku dimatekenu. (Dimatekenu 1:28) Nzambi ua mesena ku bhana muenhu ua kalelaku kua ió a di longa o kidi kia lungu ni Mon’ê, ni ku ki kumbidila.—Loma 6:23.

● Mukonda diahi Jezú ua mesena tuijiia o itambuijilu? Jezú ua zolo ué o mundu. Muéne ua londekesa henda mu ku bhana o muenhu ué phala ku tu bhulula. (Nzuá 15:13) Muéne uejidile kuila muéne ngó ueji tena ku bhulula o athu. (Nzuá 14:6) O kuila kiki, kia tokala ku tu sasumukisa mu kuijiia kuila Jezú, ua mesena kuma athu oso a katula mbote mu kukula kuê? Mukonda dia kiki, muéne ua tumina o akaiedi’ê ku longa o athu ku mundu uoso ia lungu ni vondadi ia Nzambi, ni ikanenu iê.—Matesu 24:14; 28:19, 20.

● Mukonda diahi etu tua tokala ué ku kuijiia o itambuijilu? Xinganeka bhofele mu ima iala ni valolo ia dikota phala eie—o sauidi iê ni muiji uê. O kuila eie ua mesena sauidi iambote phala eie ni muiji uê? Jihova bhu kaxi ka Jezú, ua mesena u ku bhana sauidi iambote n’eie ni muiji uê, ni muenhu ua kalelaku ku mundu ubhe, sé ku kata, né jiphaxi. (Jisálamu 37:11, 29; Dijingunuinu 21:3, 4) O kuila eie ua mesena ku kala ku mundu iú? Se ua mesena, saí kima ki ua tokala o ku bhanga.

Tanga dingi o kibatulu kia Bibidia ki tua tange kiá ku dimatekenu kiambe: “Mua-nda kuijiia o kidi, anga kidi ki mi bhulula.” O kidi kia lungu ni Jezú ni kikalakalu kiê ku utuminu ua Nzambi, ki tena ku tu bhulula ku ubhika ua beta-kota—o kituxi ni kufuá. Maji phala u mone o ku bhuluka kuku, eie ua tokala “kuijiia o kidi.” Ku tokala u di longa dingi ia lungu ni kidi kiki, ni kiebhi eie ni muiji uê ki mu tena ku katula mbote? O Jimbangi ja Jihova a mesena ku u kuatekesa.