Kana ki Kwa Butokwa ku Ziba Likalabo?

“Mu ka ziba niti, mi niti i ka mi lukulula.”—JOANI 8:32.

MWA Bibele ku fumaneha niti ye kona ku lu lukulula kwa litumelo ze lyanganisa kamba ze yaulula ka za Jesu. Kana ze mu keta ku lumela ka za Jesu ki za butokwa? Eni. Ki za butokwa ku Jehova. Ki za butokwa ku Jesu. Mi li swanela ku ba za butokwa ku luna beñi.

● Ki kabakalañi ze lu lumela ha li li za butokwa ku Jehova? Libaka kikuli “Mulimu ki lilato.” (1 Joani 4:8) Jehova u bata kuli lu be ba ba tabile kamita. Jesu naa ize: “Mulimu u latile hahulu lifasi [batu] kuli mane naa file Mwanaa hae wa libanda, kuli mutu kaufela ya bonisa tumelo ku yena . . . a be ni bupilo bo bu sa feli.” (Joani 3:16) Mulimu naa lumile Mwanaa hae kuli a be Muliululi wa luna mi naa lu kwalulezi nzila ya kuli lu kone ku pila ku ya ku ile mwa Paradaisi fa lifasi, ka ku lumelelana ni mulelo wa hae wa kwa makalelo. (Genese 1:28) Mulimu u lakaza hahulu ku fa mpo ya bupilo bo bu sa feli ku ba ba ituta niti ka za Mwanaa hae ili ba ba pila ka ku lumelelana ni ze ba ituta.—Maroma 6:23.

● Ki kabakalañi ze lu lumela ha li li za butokwa ku Jesu? Jesu ni yena wa lata batu. Naa bonisize lilato le li tuna ka ku itatela ku lu shwela. (Joani 15:13) Naa utwisisize kuli ka ku eza cwalo, naa kwaluzi nzila i nosi yeo batu ne ba ka puluswa ka yona. (Joani 14:6) Ha lu swaneli ku komokiswa ki taba ya kuli Jesu u bata kuli batu ba bañata ba kone ku tusiwa ki sitabelo sa tiululo. Ki lona libaka ha naa file balateleli ba hae ba niti musebezi wa ku luta batu mwa lifasi kamukana ka za tato ya Mulimu ni mulelo wa hae.—Mateu 24:14; 28:19, 20.

● Ki kabakalañi ze lu lumela ha li li za butokwa ku luna beñi? Mu nahane ka nakonyana ka za lika ze mu nga kuli ki za butokwa hahulu, inge cwalo buikangulo bwa mina ni lubasi lwa mina. Kana mu na ni takazo ya kuli mina hamohocwalo ni lubasi lwa mina mu be ni buikangulo bo bunde ni ku ikola bupilo? Jehova ka Jesu u sepisa mina ni lubasi lwa mina buikangulo bo bu petehile ni bupilo bo bu sa feli mwa lifasi le linca, mo ku si ke kwa ba ni ku utwa butuku kamba ku nyanda. (Samu 37:11, 29; Sinulo 21:3, 4) Kana mwa tabela ku pila mwa lifasi le li cwalo? Haiba mwa tabela, ku na ni ze mu tokwa ku eza.

Ha mu bone hape liñolo le li mwatasaa toho ya taba ye fa halimu, le li li: “Mu ka ziba niti, mi niti i ka mi lukulula.” Ku ziba niti ka za Jesu ni buikalabelo bwa peta bo bu ama mulelo wa Mulimu ku kona ku lu lukulula kwa butanga bo bu maswe ka ku fitisisa, bona butanga bwa sibi ni lifu. Kono kuli mu ikole tukuluho ye, mu tokwa ku “ziba niti.” Kana ne mu ka tabela ku ituta ze ñata ka za niti yeo ni mo mina ni lubasi lwa mina mu kona ku tusezwa ki yona? Lipaki za Jehova ba ka ba ba ba tabile ku mi tusa.