Kumanya mandamuna kudiku ne mushinga anyi?

‘Nenumanye bualu bulelela, ne bualu bulelela nebunupe budishikaminyi.’​—YONE 8:32.

MU Bible mudi bulelela budi mua kutuambuluisha bua kubenga kubuejakaja anyi kupambuka ku malu atudi bitabuje bua Yezu. Malu a Yezu atudi tuitabuja adiku ne mushinga anyi? Eyowa, adi nawu. Adi ne mushinga kudi Yehowa, kudi Yezu ne adi ne bua kuikala ne mushinga kutudi.

● Kudi ne mushinga kudi Yehowa bua tshinyi? Mu tshikoso, bualu “Nzambi udi dinanga.” (1 Yone 4:8) Yehowa mmusue bua tuikale ne muoyo wa kashidi ne disanka. Yezu wakamba ne: ‘Nzambi wakatamba kusua ba pa buloba, yeye wakabapa Muanende umuepele mulela bua muntu yonso wamuitabuja ikale ne muoyo wa tshiendelele.’ (Yone 3:16) Nzambi wakatuma muanende bua kutupikula ne kutunzuluila njila bua tupete muoyo wa tshiendelele mu Mparadizu pa buloba anu muvuaye mulongolole ku tshibangidilu. (Genese 1:28) Nzambi musue kupesha aba bonso badi balonga malu malelela adi atangila muanende ne baatumikila dipa dia muoyo wa tshiendelele.​—Lomo 6:23.

● Kudi ne mushinga kudi Yezu bua tshinyi? Yezu pende uvua munange bantu. Wakaleja mudiye mutunange pakitabaye bua kulambula muoyo wende bua bualu buetu. (Yone 15:13) Uvua mumanye ne: kuenza nunku ke mushindu umuepele uvuaye mua kupetesha bantu njila wa lupandu. (Yone 14:6) Bidiku mua kutukemesha patudi tumanya ne: Yezu mmusue kumona bantu ba bungi bapetela masanka ku mulambu wende udi upikula bantu anyi? Ke bua tshinyi wakatuma bayidi bende balelela bua kulongesha bantu ba pa buloba bujima disua dia Nzambi ne malu adiye mulongolole.​—Matayo 24:14; 28:19, 20.

● Kudi ne bua kuikala ne mushinga kutudi bua tshinyi? Anji elabi meji bua malu autu utamba kuangata ne mushinga bu mudi makanda ebe a mubidi ne bena mu dîku dienu. Utuku ujinga bua wewe ne bantu baudi munange nuikale ne makanda a mubidi ne nsombelu muimpe anyi? Ku diambuluisha dia Yezu, Nzambi udi ulaya bua kukupesha wewe ne bantu baudi munange makanda a mubidi ne muoyo wa tshiendelele mu bulongolodi bupiabupia mudi kamuyi ntatu ne makenga. (Musambu 37:11, 29; Buakabuluibua 21:3, 4) Udiku musue kuikala ne muoyo mu bulongolodi bua nunku anyi? Wewe musue, kudi bualu buudi ne bua kuenza.

Tangila kabidi mvese utuvua batele ku ntuadijlu kua tshiena-bualu etshi eu: ‘Nenumanye bualu bulelela, ne bualu bulelela nebunupe budishikaminyi.’ Bulelela budi butangila Yezu ne mudimu udiye nawu mu malu adi Nzambi mulongolole bidi mua kutupikula ku bupika bubi butambe ebu, bupika bua bubi ne lufu. Kadi bua wewe kupikudibua, udi ne bua ‘kumanya bulelela.’ Kuenaku mua kulonga malu a bungi adi atangila bulelela ebu ne mushindu udiwu mua kukuambuluisha wewe ne bantu baudi munange anyi? Bantemu ba Yehowa nebikale ne disanka bua kukuambuluisha.