Komana Chalema Kwiluka Ñakwilu?

“Mukwiluka nsañu yalala, ninsañu yalala yikuyifumisha muwuduñu.”—YOWANU 8:32.

MuBayibolu mwekala nsañu yalala yinateli kutufumisha muwuduñu wayuma yaluwañeshaña yakuhwelelawu antu hadi Yesu. Komana chalema kwiluka yuma yitwakuhwelela mudi Yesu? Eña. Yehova wamonaña nindi chalema. Chalema nikudi Yesu. Nawa chalema nikudi etu.

● Muloñadi chichalemena kudi Yehova? Muloña “Nzambi diyi kukeña.” (1 Yowanu 4:8) Yehova wakeñaña nindi twakekali amuzañalu haya nyaka. Yesu wahosheli nindi: “Chaswejeliyi Nzambi kukeña mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka.” (Yowanu 3:16) Nzambi watemesheli Mwanindi kulonda yekali Nkuuli yetu nikutwenzulwila njila yakushakama haya nyaka muParadisa hamaseki kwesekeja nakufuukula Kwindi kwatachi. (Kutachika 1:28) Nzambi wafwilaña kwinka chawaana chawumi wahaya nyaka antu adizaña chalala hadi Mwanindi nikulondela yuma yadizañawu.—Aroma 6:23.

● Muloñadi chichalemena kudi Yesu? Yesu niyena wakeña antu. Wamwekesheli kukeña kwasweja kuhitila mukuhana wumi windi hanyijimba yetu. (Yowanu 15:13) Welukili nindi watuloñesheleleña njila yimu hohu yawamwinu. (Yowanu 14:6) Komana twatela kuhayama hakwiluka netu Yesu wakeñaña antu amavulu kuhetela mumulambu windi wefutu danyiloña? Dichalejeleliyi atumbanji twindi alala nindi adizishi antu amukaayi kejima mwaya muchima waNzambi niyuma yafuukulayi.—Matewu 24:14; 28:19, 20.

● Muloñadi chichalema kudi etu? Toñojokenu ntahi hayuma yimwalemesha chikupu, chidi neyi kubula kukatakata nichisaka chenu. Komana mwafwilaña kwikala akola kumujimba nikwikala nachihandilu chachiwahi niantu imwakeña? Kuhitila mudi Yesu, Yehova wayinka enu niantu imwakeña kuchiñeja kwakwikala akola kumujimba niwumi wahaya nyaka mwituña dadiha, mwakabula kwikala kukata nimakabi. (Masamu 37:11, 29; Chimwekeshu 21:3, 4) Komana munakukeña kushakama mwituña damuchidiwu? Neyi munakukeña, kudi chuma chimwatela kwila.

Talenu cheñi nsona yinasonekuwu hamu namutu wansañu: “Mukwiluka nsañu yalala, ninsañu yalala yikuyifumisha muwuduñu.” Nsañu yalala yahosha hadi Yesu nimudimu wukwetiyi hakushikija yuma yafuukulayi Nzambi yinateli kutufumisha muwunduñu wasweja kutama, wanshidi nikufwa. Hakwila mufumi muniwu wunduñu mwatela ‘kwiluka nsañu yalala.’ Komana kwila mudiza yuma yayivulu kutalisha hansañu yalala nichimwatela kuhetelamu hamu nawantu imwakeña nehi? A Yinsahu jaYehova akutiya kuwaha kuyikwasha.