Be Ng’eyo Adiera e Wi Yesu Dwarore?

“Unung’e adiera, kendo adiera nomiu bedo thuolo.”​—JOHANA 8:32.

MUMA oting’o adiera manyalo ketowa thuolo kuom puonj machocho kata mawito ji e wi wach Yesu. Be ng’eyo adiera e wi Yesu en gima dwarore? Ee, dwarore. Jehova dwaro ni wang’e adiera e wi wach Yesu. Yesu bende dwaro kamano. Omiyo dwarore ni wan bende wang’e adierago.

● Ang’o momiyo Jehova dewo wachno? Koket e yo mayot, en nikech “Nyasaye en hera.” (1 Johana 4:8) Jehova dwaro ni wadag gi mor nyaka chieng’. Yesu nowacho niya: “Nyasaye nohero piny ahinya, omiyo nochiwo Wuode ma miderma, mondo ng’a ma oyie kuome . . . obed gi ngima mochwere.” (Johana 3:16) Nyasaye ne ooro Wuode mondo obed Jawarwa kendo mondo oyawnwa yo mar dak nyaka chieng’ e Paradis e piny, kaluwore gi kaka Nyasaye ne dwaro mokwongo. (Chakruok 1:28) Nyasaye nigi siso mar chiwo ngima mochwere ne joma dwaro puonjore adiera e wi Wuode kendo timo kaluwore gi gik ma gipuonjore.—Jo Rumi 6:23.

● Ang’o momiyo Yesu dewo wachno? Yesu bende ohero dhano. Ne onyiso hera mar chiwruok kuom thonwa. (Johana 15:13) Ne ong’eyo ni mano e yo kende mar warruok. (Johana 14:6) Ok kawwa gi wuoro ni Yesu dwaro ni ji mang’eny kaka nyalore onwang’ ber mar misangone mar rawar. Mano e momiyo nochiko jolupne madier mondo opuonj ji e piny mangima e wi dwaro mar Nyasaye.—Mathayo 24:14; 28:19, 20.

● Ang’o momiyo onego wadew wachno? Par ane matin kuom weche midewo ahinya e ngimani—ngima mar dendi koda joodi. Be igombo ni in iwuon kaachiel gi joma ihero udag e ngima majaber kendo maonge tuoche? Kokalo kuom Yesu, Jehova chiwoni kaachiel gi joma ihero thuolo mar bedo gi ngima maber chuth maonge tuoche kendo manyaka chieng’ e piny manyien, piny maonge rem kata chandruok. (Zaburi 37:11, 29; Fweny 21:3, 4) Be geno ma kamano mori? Ka en kamano, nitie gima dwarore ni itim.

Non ane kendo ndiko moket e chak sulani: “Unung’e adiera, kendo adiera nomiu bedo thuolo.” Adiera e wi Yesu koda migawo motimo e chopo dwaro mar Nyasaye nyalo gonyowa kik wabed wasumb richo kod tho—ma gin e twech marachie moloyo. To mondo ibed thuolo kamano, nyaka ‘ing’e adiera.’ Donge ber ka ipuonjori adierani koda kaka in kaachiel gi joma ihero nyalo yudo ber mokelo? Joneno mag Jehova biro mor konyi.