¿Jëjpˈam nnijäˈäjëm pën Jesusˈäjt?

“Mˈixyˈattëp ja tëyˈäjtën, es yëˈë [...] myajwëˈëmëdëp awäˈätstuuy.” (FWANK 8:32)

BIIBLYË mbäät xytyukniˈˈijxëm ja tëyˈäjtën mä pënën Jesus, ets xyaˈˈawäˈätspëtsëˈëmëm mä tukniˈˈijxënë diˈib kyaj tyëyˈäjtënëty. Per ¿jëjpˈam ets nˈijxëm ti nmëbëjkëm? Jëjpˈam. Jyobaa mëdë Jesus jëjpˈam tˈixy, ets ëtsäjtëm nanduˈun mbäät nˈijxëm.

● ¿Tiko Jyobaa jëjpˈam tˈixy? Yëˈko “yëˈë dëˈën ja tsojkën” (1 Fwank 4:8). Yëˈë tsyejpy ets njukyˈäjtëm winë xëë ets agujk jotkujk. Fwank 3:16 jyënaˈany: “Dios nëgoo oj tˈoktsojknë ja naxwinyëdë jäˈäyëty, pääty ttuknigejxy ja tyuˈukˈUˈunk, es pënaty myëbëjktëp jikyˈattëp winë xëë”. Jyobaa kyajxë yˈUˈunk yä Naxwiiny ets ojts xyjuˈuybyëtsëˈëmëm, parë mbäät njukyˈäjtëm xëmëkyëjxm ko netyë tyäˈädë Naxwinyëdë të jyëmbity jantsy tsuj extëm ojts ttuknibëjtäägë (Génesis 1:28). Dios tyukumayaambyë jukyˈäjtënë winë xëëbë pënaty nyijäˈädëp ja tëyˈäjtën mä pënën Jesus ets tmëmëdowdë (Romanʉs 6:23).

● ¿Tiko Jesus jëjpˈam tˈixy? Yëˈko nan tsyejpyë naxwinyëdë jäˈäy, extëm dyaˈijxë ko tkëyajkyë jyukyˈäjtën ëtsäjtëmgyëjxm (Fwank 15:13). Jesus nyijäˈäbë nety ko mët yëˈëgyëjxm yajpäädäˈäny ja nitsokën (Fwank 14:6). ¡Ets tsyejpy parë mayë jäˈäy ttukˈoyˈatët ja wintsëˈkën diˈib yäjk! Pääty ttuknipejky ja yˈëxpëjkpëty ets tkäjpxwäˈkxtët abëtsemy nyaxwinyëdë ti Dios tsyejpy ets ti tyuknibëjtakëp (Matewʉ 24:14; 28:19, 20).

● ¿Tiko mbäät ëtsäjtëm jëjpˈam nˈijxëm? Diˈib mas jëjpˈam mä jukyˈäjtën, yëˈë familyë ets ko nˈoyˈäjt nmëkˈäjtëm. ¿Këdii mˈitäämp oy mëk ets agujk jotkujk mëdë familyë? Pes yëˈë duˈun diˈibë Jyobaa xyˈawäˈänëm mët yëˈëgyëjxmë Jesus: jukyˈäjtën winë xëë mä nˈitäˈänëm oy mëk ets mä kyaj jyamˈatäˈänyë ayoˈon ets ni pëjk ijxën (Salmo 37:11, 29; Diˈibʉ Jatanʉp [Apocalipsis] 21:3, 4). ¿Mtsojkënyëˈajtypy jam mjukyˈatäˈäny? Pën duˈun, min nˈokˈijxëm ti mbäät xytyuny.

Tyäˈädë artikulo të tsyondaˈaky mëdë tyäˈädë tekstë: “Mˈixyˈattëp ja tëyˈäjtën, es yëˈë [...] myajwëˈëmëdëp awäˈätstuuy”. Ko nnijäˈäjëm ja tëyˈäjtën mä Jesus ets tijaty yëˈë tyuumpy parë yˈadëy ja Diosë tyuknibëjtakën, yëˈë xyaˈˈawäˈätspëtsëˈëmëm mä ja poky kaytyey etsë oˈk tëgoˈoyën diˈib xymyëdäjtëm tsumy matsypyëm. Per parë nˈawäˈätspëtsëˈëmëm, jëjpˈam ets nnijäˈäjëm ja tëyˈäjtën. ¿Mnijawëyaampy mas niˈigyë ja tëyˈäjtënë mä Jesus ets wiˈix mbäät mëdë mfamilyë xytyukˈoyˈaty? Jyobaa tyestiigëty mbudëkëyanëp xondaˈakyˈää xondaˈakyjyot.