Kuqakathekile Na Ukwazi Iimpendulo?

“Nizakwazi iqiniso, iqiniso lizanitjhaphulula.”—JWANISI 8:32.

IBHAYIBHILI lineqiniso elingasitjhaphulula ekuhlangahlanganeni namtjhana eemfundisweni ezikhohlisako ngoJesu. Kodwana kunendaba na bona khuyini esiyikholelwako ngaye? Iye, kunendaba. Kuqakathekile kuJehova nakuJesu. Begodu kufuze kuqakatheke nakithi.

● Kubayini kuqakathekile kuJehova? Bulula singathi, ngombana “uZimu ulithando.” (1 KaJwanisi 4:8) UJehova ufuna siphile ngokungapheliko sithabile. UJesu wathi: “Ngombana uZimu walithanda kangako iphasi [lesintu], wabe wanikela ngeNdodana yakhe ekukuphela kwayo, khona kuzakuthi kiloyo okholwa ngiyo . . . abe nobuphilo obungapheliko.” (Jwanisi 3:16) UZimu wathumela iNdodanakhe bona ibe Sihlengo begodu isivulele indlela eya ekuphileni okungapheliko eParadeyisini ephasini, ngokuvumelana Nomnqophwakhe wekuthomeni. (Genesisi 1:28) UZimu uzimisele ukubapha isipho sokuphila okungapheliko labo abafunda iqiniso ngeNdodanakhe begodu benze ngokuvumelana nalo.—KwebeRoma 6:23.

● Kubayini kuqakathekile kuJesu? UJesu naye uyabathanda abantu. Watjengisa ithando lokuzidela ngokunikela ngokuphila kwakhe ngokuzithandela ngebanga lethu. (Jwanisi 15:13) Bekazwisisa bona bekanikela lokho okukuphela kwendlela eya ekusindisweni. (Jwanisi 14:6) Kufuze kusirare na bona uJesu ufuna ukubona abantu abanengi ngendlela ekungakghoneka ngayo bazuza emhlatjelweni wakhe wesihlengo? Ngikho athumela abalandeli bakhe bamambala bona bafundise abantu ngentando nangomnqopho kaZimu ephasini mazombe.—Matewu 24:14; 28:19, 20.

● Kubayini kufuze kuqakatheke kithi? Akhe ucabange kancani ngezinto eziqakatheke khulu kuwe—ipilwakho begodu nomndenakho. Uyayilulukela na ipilo ehle nokuphila okungcono kuwe nabathandekako bakho? NgoJesu uJehova ukuthembisa ipilo epheleleko nengapheliko ephasini elitjha nabathandekako bakho, enganabo ubuhlungu nokutlhaga. (IRhalani 37:11, 29; ISambulo 21:3, 4) Ungakuthanda ukuphila ephasini elinjalo? Nengabe ungakuthanda, kunokuthileko okufuze ukwenze.

Godu qala umtlolo odzubhulwe hlanu kwesihloko othi: “Nizakwazi iqiniso, iqiniso lizanitjhaphulula.” Iqiniso ngoJesu nendimakhe ekuzalisekeni komnqopho kaZimu lingasitjhaphulula ehlotjeni lobugqila obumbi khulu kunabo boke—ukuthunjelwa esonweni nekufeni. Kodwana bona uthabele ukutjhaphulukokho, kufuze ‘wazi iqiniso.’ Kubayini ungafundi okungeziweko ngeqinisweli nendlela wena nabathandekako bakho eningazuza ngayo? AboFakazi BakaJehova bangakuthabela ukukusiza.