Na go Bohlokwa go Tseba Dikarabo?

“Le tla tseba therešo gomme therešo e tla le lokolla.”—JOHANE 8:32.

BEIBELE e hupere therešo yeo e ka re lokollago ditumelong tše di gakantšhago goba tšeo di timetšago mabapi le Jesu. Lega go le bjalo, na go bohlokwa gore re dumela’ng ka yena? Ee, go bjalo. Go bohlokwa go Jehofa. Go bohlokwa go Jesu. E bile go swanetše go ba bohlokwa go rena.

● Ke ka baka la’ng go le bohlokwa go Jehofa? Ka go lebanya, ke ka gobane “Modimo ke lerato.” (1 Johane 4:8) Jehofa o nyaka gore re phele re thabile ka mo go sa felego. Jesu o itše: “Modimo o ratile lefase [la batho] kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena . . . a be le bophelo bjo bo sa felego.” (Johane 3:16) Modimo o rometše Morwa wa gagwe gore a re lopolle le go re bulela tsela ya go phela ka mo go sa felego Paradeiseng mo lefaseng, e lego seo se dumelelanago le morero wa Gagwe wa mathomong. (Genesi 1:28) Modimo o ikemišeditše go nea bao ba ithutago therešo ka Morwa wa gagwe le go dira ka go dumelelana le yona mpho ya bophelo bjo bo sa felego.—Baroma 6:23.

● Ke ka baka la’ng go le bohlokwa go Jesu? Jesu le yena o rata batho. O ile a bontšha lerato ka go gafa bophelo bja gagwe ka go rata bakeng sa rena. (Johane 15:13) O be a kwešiša gore ka go dira bjalo o be a bula tsela e nnoši ya phološo. (Johane 14:6) Na re swanetše go makatšwa ke gore Jesu o nyaka go bona ba bantši ka mo go kgonegago ba holwa ke sehlabelo sa gagwe sa topollo? Ke ka baka leo a laetšego balatedi ba gagwe ba kgonthe gore ba rute batho lefaseng ka bophara ka thato ya Modimo le morero wa gagwe.—Mateo 24:14; 28:19, 20.

● Ke ka baka la’ng go swanetše go ba bohlokwa go rena? Nagana go se nene ka dilo tšeo ntle le pelaelo di lego bohlokwa go wena—boemo bja gago bja tša maphelo le lapa la gago. Na o hlologetše go ba le boemo bjo bobotse bja tša maphelo le bophelo bjo bokaone bakeng sa gago le baratiwa ba gago? A diriša Jesu, Jehofa o nea wena le baratiwa ba gago tebelelo ya boemo bjo bo phethagetšego bja tša maphelo le bophelo bjo bo sa felego lefaseng le lefsa, leo le se nago bohloko le tlaišego. (Psalme 37:11, 29; Kutollo 21:3, 4) Na o ka rata go phela lefaseng le bjalo? Ge e ba go bjalo, go na le selo seo o swanetšego go se dira.

Lebelela gape lengwalo la sehlogo leo le tsopotšwego gotee le sehlogo leo le rego: “Le tla tseba therešo gomme therešo e tla le lokolla.” Go tseba therešo ka Jesu le tema yeo a e kgathago go phethagatšweng ga morero wa Modimo go ka re lokolla bokgobeng bjo bogolo bjoo bo fetago bjohle—bokgoba bja sebe le lehu. Eupša gore o thabele tokologo ye, o swanetše go “tseba therešo.” Ke ka baka la’ng o sa ithute ka mo go oketšegilego ka therešo ye le kamoo e ka holago wena le baratiwa ba gago ka gona? Dihlatse tša Jehofa di tla thabela go go thuša.