Okuti Tyakolela Okuvasa Omakumbululo?

“Mamunoñgonoka otyili, iya otyili atyimuyovola.”—JOÃO 8:32.

OMBIMBILIYA ipopia otyili tyipondola okutuyovola komatutu ine omatavelo ounkhembi konthele ya Jesus. Okuti tyilityili etyi tutavela konthele yae tyakolela umwe? Enga, ku Jeova tyakolela. Ku Jesus tyakolela. Nokuonthue tyakolela.

● Omokonda yatyi ku Jeova tyakolela? Mokonda “Huku oluembia.” (1 João 4:8) Jeova uhanda tukaleko apeho nehambu. Jesus wati: “Huku una oluembia olunene nouye [wovanthu], waava omona wae wongunga, opo kese omunthu ukala nekolelo mwe . . . akakale nomuenyo uhapu.” (João 3:16) Huku watuma Omona wae Etuyovole, nokutuikulila ondyila opo tukaleko apeho Momphangu Yombembwa pano pohi, ngetyi ahandele tunde konthyimbi. (Gênesis 1:28) Huku uhanda unene okuavela omuenyo wahapu vana velilongesa otyili konthele Yomona wae nokuendelamo.—Romanos 6:23.

● Omokonda yatyi ku Jesus tyakolela? Jesus nae uhole ovanthu. Walekesa ohole onene etyi aava omuenyo wae opo etuyovole. (João 15:13) Ankho utyii okuti ngotyo ukahi nokuikula ondyila yeyovo. (João 14:6) Okuti tyituhuvisa okunoñgonoka okuti Jesus uhanda ovanthu ovanyingi vapole ouwa kotyilikutila tyae tyeyovo? Otyo atumina ovalongwa vae votyotyili vaivise kovanthu ouye auho konthele yehando nevangelo lia Huku.—Mateus 24:14; 28:19, 20.

● Kuonthue tyakolela mokonda yatyi? Soka kovipuka ove wapanda unene, ekongoko liove no liombunga yove. Okuti ove kumwe na vana uhole muhanda okukala nekongoko ewa? Jeova menyina lia Jesus wavela ove na vana uhole omphitilo yokukakala nekongoko ewa, nomuenyo wahapu mouye omupe, tyehena oluihamo nononkhumbi. (Salmo 37:11, 29; Revelação 21:3, 4) Okuti uhanda okukakala mouye ngoo? Inkha uhanda, pena etyi wesukisa okulinga.

Tala vali otestu ikahi pombuelo yosapi: “Mamunoñgonoka otyili, iya otyili atyimuyovola.” Otyili konthele ya Jesus, notyilinga tyae mokufuiswapo kuevangelo lia Huku tyipondola okutuyovola koupika wonkhali nononkhia. Mahi opo ukamone eyovo olio, wesukisa “okunoñgonoka otyili.” Oityi uhelilongesila konthele yotyili otyo, noñgeni ove nombunga yove mupondola okupolako ouwa? Onombangi mba Jeova mavakala nehambu enene liokukukuatesako.