Talaga Kasin Importante Iray Ebat?

“Naamtaan yo so katuaan, tan say katuaan so mangibulos ed sikayo.”​—JUAN 8:32.

WALAD Biblia so katuaan ya mangibulos ed sikatayo manlapud makawetwet odino makapalingo iran bangat nipaakar ed si Jesus. Balet, talaga kasin importante no antoy sisiaen tayo nipaakar ed sikato? On, importante itan ed si Jehova, importante itan ed si Jesus. Tan nepeg ya importante met itan ed sikatayo.

● Akin ya importante itan ed si Jehova? Lapud “say Dios et aro.” (1 Juan 4:8) Labalabay to itayon manbilay ya andi-anggaan. Inkuan nen Jesus: ‘Ontan lay panangaro na Dios ed totoo ya inter to so bogbogtong ya Anak to, ta pian balang sakey a mangipapanengneng na pananisia ed sikato et nawalaan na bilay ya andi-anggaan.’ (Juan 3:16) Imbaki na Dios so Anak to pian magmaliw a Mananondon tayo tan mangiter na pankanawnawad sikatayon manbilay ya andi-anggan ed Paraison dalin, unong ed orihinal a gagala na Dios. (Genesis 1:28) Labalabay Ton iter so regalon bilay ya andi-anggaan ed saramay manaaral na katuaan nipaakar ed Anak to tan mangiyaaplikad naaaralan da.​—Roma 6:23.

● Akin ya importante itan ed si Jesus? Inaro met nen Jesus iray totoo. Impanengneng toy masakripisyon aro to diad mabulos ya impangiter toy bilay to parad sikatayo. (Juan 15:13) Amta ton satan so alenleneg a paraan pian niliktar so totoo. (Juan 14:6) Agtayo la sirin pankelawan ya labalabay ton dakel so nagunggonaan ed dondon to. Satan so rason no akin ya ingganggan to ray tuan papatumbok to ya ibangat day totoo diad interon mundo nipaakar ed linawa tan gagala na Dios.​—Mateo 24:14; 28:19, 20.

● Akin ya importante itan ed sikatayo? Nonot mo pan magano iray bengatlan importante ed sika​—say bunigas mo tan pamilyam. Agta labalabay moy maabig a bunigas tan mainawan bilay parad sika tan ed saray inad-arom? Diad panamegley nen Jesus, iyoopresi nen Jehova ed sika tan ed saray inad-arom so pankanawnawan nawalaan na perpekton bunigas tan agmanganggan bilay ed balon mundo, ya anggapo lay sakit tan kairapan. (Salmo 37:11, 29; Apocalipsis 21:3, 4) Labay mo kasi manbilay ed ontan ya kipapasen? No labay mo, walay kaukolan mon gawaen.

Imanoen pa lamet iyan ibabaga na Biblia: “Naamtaan yo so katuaan, tan say katuaan so mangibulos ed sikayo.” Say katuaan nipaakar ed si Jesus tan say betang tod pakasumpal ed gagala na Dios so mangibulos ed sikatayo manlapud panangaripen na kasalanan tan patey. Balet, pian nibulos itayo, kaukolan tayon ‘amtaen so katuaan.’ Agta marakep no aralen yo nin nagkalalo iyan katuaan tan no panon a sikayo tan saray inad-aro yo so nagunggonaan ed satan? Maliket iray Tasi nen Jehova ya ontulong ed sikayo.