E Contestanan Ta Importante?

“Boso lo conoce e berdad, y e berdad lo haci boso liber.”​—JUAN 8:32.

BIJBEL ta siña nos e berdad tocante Hesus, y e berdad ey ta haci nos liber di creencianan falso cu ta confundi hende. Pero ta importante loke nos ta kere tocante Hesus? Si, sigur cu si. E ta importante pa Jehova y pa Hesus, pues e mester ta importante pa nos tambe.

● Dicon e ta importante pa Jehova? Simplemente, pasobra “Dios ta amor.” (1 Juan 4:8) Jehova kier pa nos ta feliz y disfruta di bida pa semper. Hesus a bisa: “Dios a stima mundo [humanidad] asina tanto cu el a duna su Yiu unigenito, pa tur cu pone fe den dje . . . haya bida eterno.” (Juan 3:16) Si, Jehova a manda su Yiu unigenito como nos Redentor pa habri caminda pa nos por biba pa semper den un paradijs aki riba tera, loke semper tabata Dios su proposito. (Genesis 1:28) Pesey, Dios ta ansioso pa duna e regalo di bida eterno na tur hende cu siña e berdad tocante su Yiu y cu ta biba na harmonia cu esey.​—Romanonan 6:23.

● Dicon e ta importante pa Hesus? Hesus tambe stima humanidad. El a entrega su bida pa nos, demostrando asina cu e stima nos. (Juan 15:13) E tabata sa cu esey ta e unico manera pa hende haya salbacion. (Juan 14:6) Pues, no ta nada straño cu Hesus kier pa mas tanto hende posibel beneficia di su sacrificio di rescate. Ta pesey mes el a duna su berdadero siguidonan e mandato pa siña hende rond mundo e boluntad di Dios y Su proposito.​—Mateo 24:14; 28:19, 20.

● Dicon e ta importante pa nos? Pensa un rato riba e cosnan cu sigur ta importante pa bo​—bo salud y bo famia. Awor, bo no ta desea un mihor salud y un mihor bida pa bo y pa bo sernan keri? Pa medio di Hesus, Jehova ta ofrece abo y bo sernan keri e speransa di biba pa semper cu salud perfecto den un mundo nobo, liber di dolor y sufrimento. (Salmo 37:11, 29; Revelacion 21:3, 4) Bo no ta desea di biba den un mundo asina? Si ta asina, tin algo cu bo mester haci.

Laga nos lesa e texto di Bijbel cu tin cita te ariba hunto cu e titulo un biaha mas: “Boso lo conoce e berdad, y e berdad lo haci boso liber.” E berdad tocante Hesus y e papel cu e ta hunga den cumplimento di Dios su proposito por libra nos di e pio sclavitud​—sclavitud na pica y morto. Pero pa bo por ser libra di esaki, bo mester “conoce e berdad.” Bo no ta desea di siña mas tocante e berdad aki y haya sa con esaki por beneficia abo y bo sernan keri? Testigonan di Jehova lo ta contento pa yuda bo.