¿Imaraykú Jesusmanta yachana tiyan?

“Cheqa kajta rejsinkichej, chay cheqa kajtaj kacharichisonqachej.” (JUAN 8:32)

BIBLIAPEQA, cheqa kaj tarikun, Jesusmanta llullata yachachisqankumantataj kacharichiwasunman. Chaywanpis, ¿pillatapis imapichus creesqanchej interesanchu? Arí, Jehovaman, Jesusman interesan. Noqanchejmanpis interesanawanchej tiyan.

● ¿Imaraykú cheqa kajta Jehová yachakunanchejta munan? Imaraykuchus Payqa “munakuymin” (1 Juan 4:8). Kusisqas wiñaypajtaj kausananchejta munan. Kay Juan 3:16 nin jina “Diosqa chay jinatapuni kay pachapi kaj chhikata munakusqanrayku, uj kʼata Churinta qorqa. Ajinamanta pillapis paypi creejqa [...] wiñay kawsayniyoj kanqa”. Diosqa, Churinta kay Jallpʼaman kachamorqa juchamanta rantinawanchejpaj. Ajinallamanta paraisopi wiñaypaj kausasun, Jehová qallariypi munarqa jina (Génesis 1:28). Diosqa, Churinmanta cheqata yachakojkunaman, chayman jinataj kausajtinku, wiñay kausayta regalota jina qonqa (Romanos 6:23).

● ¿Imaraykú cheqa kajta Jesús yachakunanchejta munan? Runasta munakusqanrayku, chaytataj kausayninta qospa rikucherqa (Juan 15:13). Payqa, kausayninta qojtillan salvayta atiwasqanchejta yacharqa (Juan 14:6). Chayraykuchá Jesusqa, ashkha runas wañuyninrayku salvasqa kanankuta munan. Chayrayku discipulosninta, tukuy runasman Diosmanta, munayninmanta ima, willanankuta kamacherqa (Mateo 24:14; 28:19, 20).

● ¿Imaraykú cheqa kajta yachakunanchej tiyan? Familiaykipi, mana onqosqa kausakunaykipi ima tʼukuriy. ¿Cheqamantacharí familiaykiwan, mana onqospa kusisqa kausakuyta munanki? Jehovaqa, Jesús kausayninta qosqanrayku, paraisopi mana onqospa, mana ñakʼarispa, wiñaypaj kausananchejta munan (Salmo 37:11, 29; Apocalipsis 21:3, 4). ¿Munawajchu paraisopi kausakuyta? Imatachus ruwanaykita qhawarina.

Kay yachaqanaj qallariyninpi, “cheqa kajta rejsinkichej, chay cheqa kajtaj kacharichisonqachej”, nisqamanta yachakusqanchejta, ¿yuyarinkichu? Jesús, Diospa munaynin juntʼakunanpaj yanapasqanmanta yachay ima, juchamanta, wañuymanta ima kacharichiwasun. Kacharichisqa kayta munanchej chayqa, cheqa kajta rejsinanchej tiyan. ¿Manachu astawan Jesusmanta, payta rejsiy, ima bendicionestachus qanpaj, familiaykipaj ima, apamunanta yachakuyta munawaj? Munanki chayqa, Jehovamanta sutʼinchajkuna yanapasonqanku.