Ov, Chidi cha Usey Kwijik Yakul?

“Ukez kwijikany uyakin, chad uyakin ukez kukukwolany.”—YOHAN 8:32.

BIBIL ukwet uyakin ukutwisha kutukwol ku kanvundangesh ap ku yitiyij ya kupumbwish piur pa Yesu. Pakwez, ov, yidi chakin kamu ya usey, yom tuchingejina piur pend? Mwaning, yidi ya usey. Yidi ya usey kudi Yehova. Yidi ya usey kand ni kudi Yesu. Ni yifanyidin kwikal ya usey kudi etu.

● Ov mulong wak yidi ya usey kudi Yehova? Mulong “Nzamb udi rukat.” (1 Yohan 4:8) Yehova usotin etu tushakama nich musangar chikupu. Yesu walonda anch: “Nzamb wakata ngand nakash, ndiy wamupana Mwanend kapwokal chakwel muntu mwawonsu ukumwitiyija ndiy kakujiyap, pakwez ukez kwikal nich mwom wa chikupu.” (Yohan 3:16) Nzamb watuma Mwanend chakwel kwikal Mupandish ni kwazuril njil yetwetu kushakam chikupu mu Paradis pa divu, kulondulijan nich rutong Rend ra kusambish. (Disambishil 1:28) Nzamb usotil kuyinkish antu ilejina uyakin piur pa Mwanend ni kuusadil difut dia mwom wa chikupu.—Rom 6:23.

● Ov, mulong wak chidi cha usey kudi Yesu? Yesu uyikatin antu. Ndiy wamekesha kwipan kwa rukat kusutil ku kupan amwinend mwom wend mulong wetwetu. (Yohan 15:13) Chawiy lel, watesha anch wading ni kulet njil yimwing kusu ya dipandish. (Yohan 14:6) Ov, chinech chikutwish kutukashimwish anch Yesu usotin kuyiman antu avud ataninamu ukwash mu chakupesh chend cha rufu? Chawiy chapanay kudi in kwilejend akashinsh mbil ya kuyilej antu pa mangand mawonsu rusot ni rutong ra Nzamb.—Mateu 24:14; 28:19, 20.

● Ov, mulong wak chidi cha usey kudi etu? Tong bil pakemp piur pa yom ya usey nakash kudi ey—ukash wey wa mujimbu ni dijuku diey. Ov, usotin anch ey ni akatish ney wikalany ni ukash uwamp wa mujimbu ni mwom uwamp? Kusutil kudi Yesu, Yehova ukwinkishin ey ni akatish ney ruchingej ra ukash wa mujimbu uwanyidina ni mwom wa chikupu mu mangand masu, mwakad kusansan ap mar. (Kuseng 37:11, 29; Kujingunik 21:3, 4) Ov usotin kushakam mu mangand mudi minam? Anch mwawiy, kudi chom ufanyidina kusal.

Tal kand mu verse wa mukand wa Nzamb ujimbwilau mu mutu wa mulong anch: “Ukez kwijikany uyakin, chad uyakin ukez kukukwolany.” Uyakin piur pa Yesu ni mudimu wend mu kuwanyin kwa rutong ra Nzamb ukutwish kutukwol kudiokal ku uswik uyimp nakash wa moj—wawonsu wa chitil ni rufu. Pakwez pa kuman kukwolik kwinoku, ufanyidin “kwijikany uyakin.” Mulong wak ukutwishap kwilej yivud piur pa uyakin winou ni pa mutapu ukutwisha ey ni akatish ney kutaninamu? Atuman a Yehova akez kusanger kukukwash.