Pe e Tāua Tali?

“E iloa e outou le upu moni, e tuusaʻoloto foʻi outou e le upu moni.”—IOANE 8:32.

O LOO iai i le Tusi Paia upu moni e tuusaʻoloto ai i tatou mai i talitonuga sesē ma fenuminumiaʻi e uiga iā Iesu. Ae pe e tāua la o tatou talitonuga e uiga iā te ia? Ioe, e tāua. E tāua iā Ieova, e tāua iā Iesu, ma e tatau foʻi la ona tāua iā i tatou.

● Aiseā e tāua ai iā Ieova? O le māfuaaga, ona o le “Atua o le alofa lava ia.” (1 Ioane 4:8) E finagalo Ieova ina ia tatou ola fiafia e faavavau. Na fetalai Iesu: ʻO le alofa tele o le Atua i le lalolagi [o tagata], na ia foaʻi mai ai lona Atalii e toʻatasi, ina ia faatuatua tagata uma ma maua le ola e faavavau.’ (Ioane 3:16) Na foaʻi mai e le Atua lona Alo o Lē e togiolaina i tatou, ma tatala mai le avanoa e tatou te ola ai e faavavau i le lalolagi Parataiso, e tusa ai ma Lana uluaʻi fuafuaga. (Kenese 1:28) E naunau le Atua e foaʻi mai lana meaalofa o le ola e faavavau i ē o loo aʻoaʻoina upu moni e uiga i lona Alo, ma gaoioi e tusa ai ma lenā upu moni.—Roma 6:23.

● Aiseā e tāua ai iā Iesu? E alofa foʻi Iesu i tagata. Sa ia faaalia le alofa faataulaga e ala i le lotomalie e maliu mo i tatou. (Ioane 15:13) Na malamalama lelei o ia, e na o le auala lea ua ia saunia, e maua ai le faaolataga. (Ioane 14:6) Pe e faateʻia la i tatou ona e manaʻo Iesu ia toʻatele ni tagata e maua aogā mai i lana taulaga togiola? O le māfuaaga lenā na ia faatonu ai ona soo faamaoni ina ia ō atu e aʻoaʻo tagata i le lalolagi atoa, e uiga i le finagalo o le Atua ma lana fuafuaga.—Mataio 24:14; 28:19, 20.

● Aiseā e tatau ai ona tāua iā i tatou? Seʻi mafaufau i mea e mautinoa e sili ona tāua iā te oe e pei o lou soifua mālōlōina ma lou aiga. Pe e te faanaunau e maua se soifua mālōlōina ma se olaga lelei mo oe ma ē e pele iā te oe? E ala iā Iesu, ua foaʻi mai ai e Ieova iā te oe ma ē e pele iā te oe, se lalolagi fou e maua ai le soifua mālōlōina e lelei atoatoa ma le ola e faavauvau, ma e leai foʻi ni tigā ma ni mafatiaga. (Salamo 37:11, 29; Faaaliga 21:3, 4) Pe e te fia ola i se lalolagi faapena? Pe afai e te manaʻo i ai, e iai la se mea e tatau ona e faia.

Seʻi toe tagaʻi i le mau o loo taʻua i le ulutala: “E iloa e outou le upu moni, e tuusaʻoloto foʻi outou e le upu moni.” O le upu moni e uiga iā Iesu ma lana matafaioi i le faataunuuina o fuafuaga a le Atua, e mafai ona tuusaʻoloto ai i tatou mai i le tulaga pologa e sili ona leaga, o le agasala ma le oti. Ae ina ia maua lenā saʻolotoga, e tatau ona e “iloa le upu moni.” Aiseā e te lē aʻoaʻoina atili ai mea e uiga i lenei upu moni, ma le auala e maua ai e oe ma ē e pele iā te oe ni aogā? E fiafia Molimau a Ieova e fesoasoani iā te oe.